حاكەرلەر ولاردىڭ اككاۋنتتارىن بۇزعاننان كەيىن تومەندەگىدەي حابارلاما قالدىرعان: «كورسەتىلگەن شوتقا جىبەرىلگەن بۇكىل بيتكوين ەكى ەسە بولىپ قايتادى. ەگەر 1000 دوللار اۋدارساڭىز, 2000 دوللار ەتىپ قايتارامىن. مۇنى 30 مينۋت ىشىندە عانا ورىندايمىن».
ايتا كەتەرلىگى, شابۋىلعا ۇشىراعان اككاۋنتتىڭ بارىندە جاريالانعان ءماتىن بىردەي.
ال Twitter كومپانياسىنىڭ ءوزى وقيعادان حاباردار ەكەنىن, ونى جويۋمەن اينالىسىپ جاتقانىن مالىمدەدى. «Twitter-دەگى بارشامىز ءۇشىن قيىن كۇن. ءبارىمىز بولعان وقيعاعا نالىپ وتىرمىز», دەدى كومپانيانىڭ باسشىسى دجەك دورسي.
سونداي-اق حاكەرلەردىڭ شابۋىلىنا ۇشىراعاندار قاتارىندا اقش-تىڭ بۇرىنعى پرەزيدەنتى باراك وباما, اقش دەموكراتيالىق پارتياسىنىڭ جەتەكشىسى دجو بايدەن, يزرايل پرەمەر-ءمينيسترى بينيامين نەتانياحۋ جانە تاعى باسقا بەلگىلى تۇلعالار بار. بۇدان بولەك, Apple جانە Uber سەكىلدى الپاۋىت كومپانيالاردىڭ اككاۋنتتارى دا شابۋىلعا ۇشىراعان.
تۋيتتەردە مۇنداي جاعداي العاش رەت تىركەلىپ وتىرعان جوق. بىلتىر حاكەرلەر دجەك ءدورسيدىڭ اككاۋنتىن بۇزىپ, راسيزمگە تولى جازبالار قالدىرعان ەدى.
