الماتى قالاسىندا يندۋستريا جانە جاڭا تەحنولوگيالار مينيسترلىگى, «اتامەكەن» ۇلتتىق كاسىپكەرلەر پالاتاسى, «سامۇرىق-قازىنا» ۇلتتىق ءال-اۋقات قورى, «بايتەرەك» ۇبح جانە ىسكەر توپ وكىلدەرىنىڭ قاتىسۋىمەن ەل يندۋستريالىق-يننوۆاتسيالىق دامۋىنىڭ ەكىنشى كەزەڭىن قامتيتىن تۇجىرىمدامانى دايارلاۋ بويىنشا جۇمىس شتابىنىڭ وتىرىسى بولىپ ءوتتى.
الماتى قالاسىندا يندۋستريا جانە جاڭا تەحنولوگيالار مينيسترلىگى, «اتامەكەن» ۇلتتىق كاسىپكەرلەر پالاتاسى, «سامۇرىق-قازىنا» ۇلتتىق ءال-اۋقات قورى, «بايتەرەك» ۇبح جانە ىسكەر توپ وكىلدەرىنىڭ قاتىسۋىمەن ەل يندۋستريالىق-يننوۆاتسيالىق دامۋىنىڭ ەكىنشى كەزەڭىن قامتيتىن تۇجىرىمدامانى دايارلاۋ بويىنشا جۇمىس شتابىنىڭ وتىرىسى بولىپ ءوتتى.
يندۋستريا مينيسترلىگى وڭىرلەردەگى ەڭ ءىرى يندۋستريالىق جوبالاردىڭ ۋاقىتىندا ىسكە قوسىلۋى مەن ساپالى جۇرگىزىلۋىنە باقىلاۋ جاساپ وتىرعانى بەلگىلى. وسىعان وراي پرەمەر-ءمينيستردىڭ ورىنباسارى – يندۋستريا جانە جاڭا تەحنولوگيالار ءمينيسترى اسەت يسەكەشەۆتىڭ باسشىلىعىمەن جۇمىس توپتارى ەلىمىزدىڭ بارلىق ايماقتارىندا بولىپ, قازىرگى تاڭدا جۇمىس ىستەپ تۇرعان كاسىپورىنداردىڭ جاي-كۇيىمەن تانىسىپ, يندۋستريالاندىرۋ كارتاسىنا ەنگىزىلگەن جاڭا جوبالاردىڭ قۇرىلىسىن تەكسەرۋدە.
الماتىدا وتكەن القالى جيىن بارىسىندا ۆيتسە-پرەمەر اسەت يسەكەشەۆ يندۋستريالىق-يننوۆاتسيالىق دامۋ باعدارلاماسىنا قاتىسۋشىلارعا جاڭا كەزەڭنىڭ ماڭىزدىلىعى مەن ەرەكشە توقتالا كەتەتىن تۇستارىنا كوڭىل اۋدارتا وتىرىپ, يندۋستريالاندىرۋدىڭ ەكىنشى كەزەڭىنىڭ تۇجىرىمداماسىن ازىرلەۋ كەزىندە بيزنەس قاۋىمداستىقتاردىڭ ۇسىنىستارىن ەسكەرۋ قاجەت ەكەنىن ۇعىندىردى. سونداي-اق, اتالمىش ماڭىزدى قۇجاتتىڭ قاتىسۋشى بارلىق مۇددەلى تاراپتاردىڭ پىكىرلەرىن ەسكەرە وتىرىپ دايارلانۋى كەرەكتىگىنە باسا نازار اۋداردى.
القالى جيىندا ۆيتسە-پرەمەر «يندۋستريالاندىرۋدىڭ ءبىرىنشى بەس جىلدىعىنىڭ اتقارىلۋ بارىسى جانە ەكىنشى بەسجىلدىق ماقساتتارى» دەگەن تاقىرىپتا ءسوز سويلەپ, ودان ءارى مامانداندىرىلعان توپتىڭ تەڭ ءتوراعاسى ا.يدريسوۆ «2015-2019 جىلدارعا باعىتتالعان يندۋستريالاندىرۋدىڭ جاڭا تۇجىرىمداماسى تۋرالى», «ءبايتەرەك» ۇلتتىق باسقارۋ حولدينگى باسقارما توراعاسىنىڭ ورىنباسارى ا.الدامبەرگەن «قازاقستان يندۋستريالاندىرۋ باعدارلاماسى مودەلىن دامىتۋ جوباسىنىڭ جۇزەگە اسىرىلۋى تۋرالى» ەسەپتىك بايانداما جاسادى.
ەسكە سالا كەتسەك, 2020 جىلعا دەيىنگى يندۋستريالىق-يننوۆاتسيالىق باعدارلامانىڭ ەكىنشى بەسجىلدىعىنىڭ تۇجىرىمداماسى مەملەكەت باسشىسى نۇرسۇلتان نازارباەۆتىڭ تاپسىرماسى بويىنشا ازىرلەنە باستاعانى بەلگىلى. بۇل ماقساتتا پرەمەر-ءمينيستردىڭ توراعالىعىمەن باسقارۋشى كوميتەت, جۇمىس شتابى جانە سالالار مەن كلاستەرلەر ءۇشىن, وندىرىستىك كۇشتەردى ورنالاستىرۋ جانە وڭىرلىك دامىتۋ شاراسى ءۇشىن, قارجى جۇيەسىن دامىتۋ جانە يندۋستريالاندىرۋ باعدارلاماسىنىڭ ەكىنشى بەسجىلدىعىن قارجىلاندىرۋ ۇلگىسىن ازىرلەۋ ءۇشىن, ونەركاسىپتىك ساياساتتىڭ قۇرالدارىن جانە ىسكە اسىرۋ تەتىكتەرىن ازىرلەۋ ءۇشىن جاۋاپتى ءتورت بىردەي توپ قۇرىلىپ وتىر. وسى اتالعان 4 جۇمىس توبىنىڭ قۇرامىنا ءتيىستى مەملەكەتتىك ورگانداردىڭ جانە دامۋ ينستيتۋتتارىنىڭ وكىلدەرى كىرەدى.
پرەمەر-ءمينيستردىڭ ورىنباسارى يندۋستريالىق-يننوۆاتسيالىق دامۋىنىڭ ەكىنشى كەزەڭىن قامتيتىن تۇجىرىمدامانىڭ اعىمداعى جىلدىڭ سوڭىنا دەيىن قابىلدانىپ, الداعى 2014 جىلدىڭ مامىر ايىندا يندۋستريالاندىرۋدىڭ ەكىنشى بەس جىلدىعىنىڭ باعدارلاماسى بەكىتىلۋى ءتيىس ەكەندىگىن ناقتىلادى.
اسەت يسەكەشەۆ باستاعان جۇمىس توبى الماتى قالاسىنداعى بىرقاتار جۇمىس ىستەپ تۇرعان ءوندىرىس ورىندارىنا باردى جانە «الاتاۋ» يننوۆاتسيالىق تەحنولوگيا پاركى ارنايى ەكونوميكالىق ايماعىنىڭ ەكىنشى كەزەڭدىك قۇرىلىسىمەن تانىستى. دالىرەك ايتقاندا, «ەل سي ترەيد» جشس-ءنىڭ (LogyCom) كومپيۋتەرلىك تەحنيكانىڭ وندىرىسىندە بولىپ, جۋىردا عانا كومپانيا سۇيىق كريستالدى مونيتورلاردى جيناۋ بويىنشا ىسكە قوسقان جاڭا قۇراستىرۋ باعىتىنىڭ جۇمىسىن تاماشالادى. بۇل كومپانيانىڭ وندىرىستىك قۋاتتىلىعى جىلىنا 100 مىڭ مونيتور جيناۋمەن بىرگە, بيىلعى 2013 جىلدىڭ سوڭىنا دەيىن 5 مىڭعا جۋىق سۇيىق كريستالدى مونيتور جاساۋ جانە ساتۋ ءىسىن جوسپارلاپ وتىر.
سونداي-اق, ۆيتسە-پرەمەر كۇردەلى-تۇرمىستىق ەلەكتروندى تەحنيكانى وندىرۋمەن جانە ساتۋمەن اينالىسىپ وتىرعان «LG Electronics Almaty Kazakhstan» اق-تىڭ باسشىلىعىمەن كەزدەستى. قازىرگى تاڭدا اتالمىش كاسىپورىندا 398 ادام جۇمىس ىستەيدى. اعىمداعى جىلدىڭ ءبىرىنشى 6 ايىندا كومپانيا 9,1 ملرد. تەڭگەگە ءونىم شىعاردى. ونىڭ ىشىندە 8 098 كىر جۋعىش ماشينا, 9 270 توڭازىتقىش جانە 120 669 تەلەديدار قۇراستىرىپ, حالىققا ۇسىنعانىن كومپانيا مامانى العا تارتتى. تاياۋدا بۇل كومپانيا «الاتاۋ» يتپ اەا اۋماعىندا ەكىنشى وندىرىستىك الاڭدى اشۋدى كوزدەپ وتىر. اسەت يسەكەشەۆ يتپ قۇرىلىس الاڭىندا بولىپ, ونىڭ اۋماعىنداعى بىرقاتار كاسىپورىنداردىڭ قىزمەتىمەن دە ەتەنە تانىستى. ايتا كەتەرلىگى, سوڭعى ءۇش جىلدىڭ ىشىندە اەا قاتىسۋشىلاردىڭ سانى 100-دەن 150-گە دەيىن كوبەيگەن.
«الاتاۋ» يتپ باسشىلىعىنىڭ بولجامى بويىنشا, اەا ەكىنشى كەزەگىنىڭ قۇرىلىسىمەن قاتىسۋشىلار سانى ارتادى. قازىرگى ۋاقىتتا تاعى دا 22 ينۆەستيتسيالىق جوبا قارالۋدا.
قانات ەسكەندىر,
«ەگەمەن قازاقستان».
الماتى.
