مەديتسينا • 14 شىلدە، 2020

«كاز-ديا-تەست» كوروناۆيرۋستى انىقتاۋ تەستىن وندىرەدى

19 رەت كورسەتىلدى

كلينيكالىق زەرتحانالىق دياگنوستيكا سالاسىنداعى العاشقى وتاندىق وندىرۋشىلەردىڭ ءبىرى «كاز-ديا-تەست» كومپانياسىنىڭ تاريحى وتكەن عاسىردىڭ سەكسەنىنشى جىلدارىمەن تۇسپا-تۇس كەلەدى. «قالقامان» شاعىن اۋدانىنداعى اۋرۋحانا جەرتولەسىندەگى ەكى بولمەدەن باستاۋ العان زەرتحانا جيىرما جىلدان استام مەرزىمدە وتاندىق تەستىلەۋ ون­دىرىسىندە باسەكەگە قابىلەتتى ونىمدەر شىعا­را­تىن كومپانياعا اينالدى.

«كاز-ديا-تەست» جشس باس ديرەكتورى كۇلبارشىن جيەمباەۆا كومپانيانىڭ وندىرىستىك الەۋەتىن جەتىلدىرۋدى باسشىلىققا الا وتىرىپ، قولدانىستاعى جەلىنى كەڭەيتۋ ماقساتىندا ءارتۇرلى جەدەل تەستەر مەن دا­يىن ونىمدەر شىعاراتىن زاۋىت جۇمىسىنىڭ جولعا قويىلعانىن جەتكىزدى. الماتى يندۋستريالىق ايماعىندا بيىل ىسكە قوسىلاتىن زاۋىتتىڭ قازىرگى كەزدە ينفراقۇرىلىمى جاسالعان. وندىرىستىك ونەركاسىپ ايماعىندا ىسكە اساتىن جوبانىڭ ماقساتى – بەسىنشى بۋىن جەدەل تەحنولوگيالارىن دامىتا وتىرىپ، ISO 13485 حالىقارالىق ستاندارتتارىنا سايكەس مەديتسينالىق-دياگنوستيكالىق سىناق جۇيەلەرىن ءوندىرۋ اياسىن كەڭەيتۋ. ەسەپتى كەزەڭدە كىرىس كولەمىن 40 پايىزعا جەتكىزىپ، جوبا ىسكە اسقان مەرزىمنەن باستاپ 3-4 جىل ىشىندە العاشقى ينۆەستيتسيانى قايتارۋ جوس­پارلانۋدا.

مەديتسينادا جانە كلينيكالىق ميكروبيولوگيادا جۇقپالى اۋرۋلاردىڭ دياگنوستيكاسىن انىقتاۋدا كوشباسشى بولۋدى ماقسات ەتە وتىرىپ، كومپانيا الەمگە تونگەن كوروناۆيرۋس ينفەكتسياسىن انىقتاۋ تەستىلەرىن شىعارۋدى جولعا قويۋدا. ناقتى ايتقاندا، ءوندىرىس پتر تەست جيىنتىقتارى، كوروناۆيرۋسقا جەدەل تەستىلەرمەن قاتار ونكولوگيالىق اۋرۋلاردى ەرتە كەزەڭدە انىقتاۋدىڭ اۆتوماتتاندىرىلعان زاماناۋي جەلىسىن ىسكە قوسۋىمەن ەرەكشەلەنەدى. ك.جيەمباەۆانىڭ اي­­تۋىنشا، كومپانيا ءوندىرىسى رەسپۋبليكا جۇرتشىلىعىنىڭ دەن­ساۋلىعىن جاقسارتۋدا، ونىڭ ىشىندە جۇقپالى اۋرۋ­لار مەن ۆيرۋستارعا قارسى كۇرەسكە، اعزاداعى وزگەرىستەردى بىلدىرەتىن ارنايى ماركەرلەردى جىلدام انىقتاۋعا مۇمكىندىك بەرەدى. ال زەرتحانالاردىڭ سەنىمدى ناتيجەلەرگە جىلدام قول جەتكىزۋى – ناۋقاستار مەن ەمدەۋ مەكەمەلەرى ءۇشىن اسا ماڭىزدى. «كاز-ديا-تەست» جشس ونىمدەرىنىڭ جەلىسى العاشقى دياگنوستيكالىق ەكسپرەسس-تەستىلەردى انىقتاۋ يحەد فورماتىندا جۇزەگە اسادى. بۇل يممۋنوحروماتوگرافيالىق جەدەل دياگنوزدى (ICED) قولدانۋ مۇمكىندىگىن ازايتادى ءارى تەحنولوگيالىق تۇرعىدان العاندا جاڭا وندىرىستىك سالا.

كومپانيا الەۋمەتتىك ماڭىزدى اۋرۋلاردى جەدەل دياگنوستيكالاۋدا كارديوماركەرلەر، ىسىك ماركەرلەرى، اقتق، گەپاتيت، جىنىستىق جولمەن بەرىلەتىن ينفەكتسيالار، ناشاقورلىقتى دياگنوستيكالاۋداعى جۇيەلىك سەريالىق وندىرىسپەن قاتار، قان قۇرامىنداعى قانت مولشەرىن، ەسىرتكى مەن ىشىمدىكتى، سونداي-اق جۇكتىلىكتى، قان قۇرامىن، Rh فاكتورىن، گورمونداردى، سونىمەن قاتار ۆەتەريناريا سالاسىنداعى ينفەكتسيالاردى دا انىقتاۋ مۇمكىندىگىنە دە يە.

بۇگىنگى تاڭدا ELISA نەگىزىندە يفا جاڭا بۋىنىن جەدەل تەستىلەۋدىڭ ءۇش ءتۇرىن، ونىڭ ىشىندە: جەدەل ءدارى-دارمەك سىناعىنىڭ 2 ءتۇرى، ۆ، س گەپاتيتى، تۋبەركۋلەزدىڭ جەدەل سىناعىن شىعارادى. رەسەي، قىرعىزستان، ارمەنيا جانە بەلارۋس، ت.ب. ەلدەرمەن جۇمىس ىستەيتىن كومپانيا زاماناۋي تەحنولوگيالاردى وندىرىسكە ەنگىزۋدە زور تاجىريبە جيناقتاي وتىرىپ، مەديتسيناسى دامىعان يزرايل، اقش، جاپونيا، ت.ب. ەلدەردىڭ ءوندىرىس سالاسىنداعى كومپانيا­لارمەن ارىپتەستىك ىنتىماقتاستىعىن جولعا قويعان.

«قازىرگى كەزدە وتە جىلدام تارالاتىن COVID-19 ۆيرۋسىمەن دەر كەزىندە كۇرەسۋ جانە جەدەل انىقتاۋ، وقشاۋلاۋ، جان-جاقتى باقىلاۋ سياقتى كەشەندى دەنساۋلىق ساقتاۋ شارالارى قولدانىلعان جاعدايدا كورسەتكىشتى تومەندەتىپ، ادام ءولىمىنىڭ الدىن الۋعا بولادى. دەگەنمەن الەمدىك احۋالعا بايلانىستى ەلىمىز بۇرىن-سوڭدى بولماعان اۋىرتپالىقتى باستان كەشىرۋدە. COVID-19 ۆيرۋسىن جەڭۋدىڭ جالعىز جولى – عالامدىق ىنتىماقتاستىقپەن بىرلەسىپ ارەكەت ەتۋ»، دەيدى ك.جيەمباەۆا. ال اۋرۋ قايتالانباس ءۇشىن ادام دەنساۋلىعى تۇراقتى باقىلاۋدا بولۋى ءارى ۆيرۋستىڭ تارالۋى مەن جاڭا ينفەكتسيالاردى بولدىرماۋ ءۇشىن ۋاقتىلى سىناق جۇمىستارى ءجۇرىپ وتىرۋى ءتيىس. وسى باعىتتا كومپانيانىڭ يننوۆاتسيا جانە دامۋ جونىندەگى ارنايى بولىمدەرى، سونداي-اق جەكە ءوندىرىس الاڭدارى جوعارى ساپالى ونىمدەرمەن قامتاماسىز ەتۋگە مۇمكىندىك بەرەدى.

كۇلبارشىن امانتايقىزى ءوز ىسىنە تاباندىلىعى ارقىلى شاعىن زەرتحانانى زاماناۋي كومپانيا دەڭگەيىنە جەتكىزە وتىرىپ، وسى ۋاقىت ىشىندە كەدەرگىلەرگە مويىماي، وتاندىق ءوندىرىستى جولعا قويۋ جولىندا كوپتەگەن قيىندىقپەن بەتپە-بەت كەلگەنىن ايتادى.

«العاشقى كەزەڭدە ونىمدەرىمىزدىڭ جوعارى ساپالى ەكەنىنە كۇمانمەن قاراعان مەكەمەلەر بولدى. بىراق بولاشاعى زور ءوندىرىستىڭ مۇمكىندىكتەرىن وتاندىق ماماندار ەمەس، ءيزرايلدىڭ ۇزدىك وندىرىستەرى نازار اۋدارىپ، قولداۋ كورسەتە باستادى. تىپتەن، العان قارىزداردى كەشىكتىرىپ وتەگەن كەزدەرىمىزدە دە شەتەلدىك ارىپتەستەرىمىز تۇسىنىستىكپەن قارادى»، دەيدى كومپانيا باسشىسى. دەگەنمەن دە وتاندىق ءونىم ۇكىمەتتىڭ قولداۋىنسىز دامىمايتىنى انىق. وسى تۇرعىدان العاندا ءوندىرىستى قولدايتىن كوپتەگەن مەكەمەنىڭ ارەكەتسىزدىگىنە قىنجىلعان كۇلبارشىن امانتايقىزى ەلىمىزدە ءوندىرىستىڭ دامۋىنا كەدەرگى بولاتىن جايتتار كوپ ەكەنىن ايتادى. دەسەك تە، قانداي جاعدايدا دا ءوندىرىستى توقتاتىپ الماۋدىڭ، زاماناۋي كەڭىستىككە شىعارۋعا ىقپال ەتىپ، اكىمشىلىك كەدەرگىلەرمەن كۇرەسۋگە تۋرا كەلدى. بۇگىندە الەمدىك نارىقتا باسەكەگە قابىلەتتىگىن دالەلدەپ ۇلگەرگەن ءوندىرىستىڭ دامۋىنا جەكەلەگەن ازاماتتاردىڭ قوسقان ەڭبەگىنىڭ زور ەكەنىن اتاپ وتكەن كومپانيا باسشىسى وتاندىق وندىرىسشىلەردىڭ قولداۋىمەن مەديتسينا سالاسىنىڭ بارلىق مۇمكىندىكتەرىن الەمگە پاش ەتە وتىرىپ، كوروناۆيرۋسپەن كۇرەسكە جۇمىلدىرۋعا نەگىز بار ەكەنىن جەتكىزدى.

سوڭعى جاڭالىقتار

اداسقان بالالار امان-ەسەن تابىلدى

ايماقتار • 07 تامىز، 2020

ۇقساس جاڭالىقتار