ايماقتار • 13 شىلدە، 2020

تۇركىستاندا جومارت جاندار اۋرۋحانالارعا اسا قاجەتتى اپپاراتتاردى تارتۋ ەتۋدە

61 رەت كورسەتىلدى

تۇركىستان وبلىسىنداعى "تايماس" كومپانياسىنىڭ وكىلى، كاسىپكەر تيمۋر قىرىقباەۆ جەتىساي اۋدانى ورتالىق اۋرۋحاناسىنا ارقايسىسىنىڭ قۇنى 700 مىڭ تەڭگە تۇراتىن 2 جاساندى تىنىس الۋ اپپاراتىن سىيعا تارتتى، دەپ حابارلايدى Egemen.kz.

جالپى جەتىساي اۋدانى بويىنشا بۇگىنگى كۇنگە دەيىن 700 ناۋقاس پنەۆمونيادان ەمدەلىپ شىققان. قازىر 250 ناۋقاس ەم الۋدا. "تيمۋر سياقتى جومارت ازاماتتاردىڭ ارقاسىندا اۋرۋحانامىز 7 جاساندى تىنىس الۋ اپپاراتىمەن تولىعىپ وتىر. بىزدەر ءۇشىن ءاربىر ازاماتتىڭ ءومىرى قىمبات. سول ازاماتتاردى امان الىپ قالۋعا بۇل اپپاراتتىڭ كومەگى وراسان زور"، دەيدى جاقسىلىق جاساپ جاتقان جومارت جاندارعا ريزاشىلىعىن بىلدىرگەن جەتىساي اۋدانى ورتالىق اۋرۋحاناسىنىڭ باس دارىگەرى نۇرلان جولداسبەكوۆ.

1

ال تۇلكىباس اۋدانىندا ەرىكتىلەر ورتالىق اۋرۋحاناعا 210 دانا وتتەگى بالونىن تارتۋ ەتتى. تۇلكىباس اۋدانى اكىمدىگىنىڭ ۇيىتقى بولۋىمەن دەمەۋشىلەر مەن ەرىكتى تۇرعىندار ەسەبىنەن جەتكىزىلگەن بالونداردىڭ وتتەگىسى تاۋسىلعان جاعدايدا شىمكەنت قالاسىنداعى وتتەگى قۇيۋ بەكەتىنەن تولتىرىپ كەلۋ ءۇشىن اۋدان اكىمدىگىنەن جۇرگىزۋشىسى مەن "گازەل" اۆتوكولىگى بولىنگەن. سونىمەن قاتار، بارلىق اۋىلدىق وكرۋگ، كەنت اكىمدەرى وزدەرىنىڭ قىزمەتتىك كولىكتەرى مەن جۇرگىزۋشىلەرىن اق حالاتتى ابزال جاندارعا بەرىپ، بۇگىندە 17 كولىك پەن بريگادالار ۇيلەرىندە سىرقاتتانىپ جاتقان تۇرعىندارعا ەم-دومدارىن جاساپ كەلەدى.

قازىعۇرت اۋدانىندا جەرگىلىكتى كاسىپكەر ەرلان دوسانباەۆ اۋداندىق ورتالىق اۋرۋحاناعا 5 دانا وتتەگى كونتسەنتراتورىن تارتۋ ەتتى. "ناۋقاستار اۋرۋحاناعا كوپ كەلۋدە. دارىگەرلەر كۇنى-ءتۇنى ايانباي ەڭبەك ەتىپ جاتىر. قۇرىلعىنىڭ مۇمكىندىگى زور. ەندى دارىگەرلەر ەمدەلۋشىلەرگە وتتەگى كونتسەنتراتورىنىڭ كومەگىمەن ۋاقىتىلى جاردەم كورسەتە الادى. قيىن كەزدە قول ۇشىن سوزعان كاسىپكەرگە العىسىمىز شەكسىز"، دەيدى اۋداندىق اۋرۋحانانىڭ باس دارىگەرى ب.ەرەجەپوۆ.

سوڭعى جاڭالىقتار

اداسقان بالالار امان-ەسەن تابىلدى

ايماقتار • 07 تامىز، 2020

ۇقساس جاڭالىقتار