قوعام • 13 شىلدە، 2020

وڭايگۇل تۇرجان: ەندىگى امال نە بولماق؟

66 رەت كورسەتىلدى

تاپ وسىنداي ازالى كۇندى بۇكىل ەل بولىپ باستان كەشەمىز دەپ ويلاپ پا ەدىك! تاريحقا قاراپ وتىرساق، تالاي ىندەتتى ادامزات باستان وتكەرگەن ەكەن. سونداي كەزدە ەل ءىشىن ۇرەي بيلەگەنى سونشالىق، جۇرت اۋرۋ جۇقتىرعان كىشكەنتاي سابيلەرىن، قارت اتا-انالارىن تاستاي قاشىپتى. بىراق ىندەت قاشقانداردى دا قۋىپ جەتىپتى.

​مىناۋ ىندەت تە الەمگە ءدال سونداي ۇرەي شاشىپ تۇر. قازىر جەر شارى باستان كەشىپ وتىرعان جاعداي ءبىزدىڭ ەلدى دە جايلادى. وسىنداي اۋىر كەزەڭدە جاۋاپتى دەگەن كەيبىر شەنەۋنىكتەردىڭ جاۋاپسىزدىعى ىندەتتى ودان سايىن اسقىندىردى. وتانشىلدىق دەگەن وسىندايدا كورىنەدى عوي. 

​قاراپايىم حالىقتىڭ ىشىنەن شىققان ىسكەر ادامدار وزدەرى ۇيىمداستىرىپ، قينالىپ جاتقاندارعا قول ۇشىن بەرىپ جاتىر، ءدارى-دارمەگىن شەت ەلدەردەن الدىرتىپ جاتىر. سونداي جانداردىڭ قىزمەتى ەسەلەپ قايتسىن دەپ تىلەيمىز.

​قر پرەزيدەنتى ق.ك.توقاەۆ ءار مينيسترلىككە قاتاڭ تاپسىرمالار بەرىپ، قاتال تالاپتار قويدى. سول تاپسىرمالار ءوز دارەجەسىندە ورىندالسا ەكەن دەپ تىلەپ وتىرمىز ەندى.

​وكىنىشتىسى – قازاقتىڭ تالاي ارىستاي ازاماتتارى قۇربان بولدى. ەندىگى امال نە بولماق؟ ارينە، ەڭسەنى ءتۇسىرىپ وتىرا بەرۋ ەمەس. ۇرەيگە بوي الدىرماي، سىرقاتتانىپ جاتقان ادامدارعا جىگەر بەرىپ، بالا-شاعانىڭ كوزىنشە ءولىم تۋرالى اڭگىمە ايتا بەرمەي، اركىم ءوز وشاعىندا بارلىق ساقتىق شارالارىن جاساۋى كەرەك دەپ ويلايمىن.

​جاۋاپتى مەكەمەلەر مەن شەنەۋنىكتەر «بۇگىن ءدارى كەلدى، ەرتەڭ تاراتامىز» دەگەن سياقتى جايباسارلىق اڭگىمە ايتپاي، "قازىر كەلدى، قازىر تاراتامىز" دەپ سويلەيتىندەي جەدەلدىكپەن جۇمىس ىستەسە ەكەن. تاۋلىكتىڭ ءار مينۋتى تالاي ادامدى الىپ كەتىپ جاتقاندا "ەرتەڭ" دەگەن ءسوز بولماۋ كەرەك.

​ازالى وتباسىلارىنا قايعىرىپ كوڭىل ايتامىز. قازاق "ارتىنىڭ قايىرى بولسىن" دەپ ارتىنىڭ قايىرىن سۇرايدى. ءار وتباسىندا امانشىلىق بولسىن! سىرقاتتانىپ جاتقاندارعا جەڭىلدىگىن بەرسىن!

وڭايگۇل تۇرجان

سوڭعى جاڭالىقتار

اداسقان بالالار امان-ەسەن تابىلدى

ايماقتار • 07 تامىز، 2020

ۇقساس جاڭالىقتار