قوعام • 13 شىلدە، 2020

ۇلىقبەك ەسداۋلەت: ءار قازاق – قازاقستان قازىناسى!

318 رەت كورسەتىلدى

كۇللى الەمدى قۇيىنداي جايپاپ وتكەن كەسىرلى، كەساپاتتى كەسەل قازاقستان حالقىنا اۋىر ءتيدى. جۇقپالى ناۋقاسقا شالدىققاندار، كوز جۇمعاندار سانى كۇرت ءوستى. كۇن سايىن ءتۇرلى جامانات حاباردان جەر سەلكىلدەيدى. الەۋمەتتىك جەلىگە كىرۋگە قورقاتىن بولدىق. كوۆيد پەن پنەۆمونيا دەسە جۇرتتىڭ جۇرەگى دىرىلدەيدى. بەينە ءبىر ەشكىمدى اسكەرگە الماي-اق، ساپقا تۇرعىزباي-اق، قان مايداننىڭ قاسابىنا ۇشىراتاتىن، كوزگە كورىنبەيتىن قىرعىن سوعىس ءجۇرىپ جاتقانداي.

بۇل الاپاتقا قارسى تۇرار كۇشىمىز ءالسىز بولىپ شىقتى. اسا قاۋىپتى قاتەرمەن بەتپە-بەت كەلگەن ساتتە بۇرىنعى "كوروناۆيرۋس دەگەن شەتەلدىكتەردىڭ وتىرىك ساندىراعى ەكەن"، "كارانتين، توتەنشە جاعداي" دەگەندەر جۇرتتى ميتينگىگە شىعارماۋ ءۇشىن بيلىكتىڭ ويلاپ تاپقان امالى ەكەن» دەگەن قاڭقۋ سوزدەردىڭ ك ۇلى كوككە ۇشتى. "بىزدە مەديتسينا مىقتى، ءدارى دە، دارىگەر دە جەتكىلىكتى، اۋرۋحانالار ساي تۇر" دەپ جۇرگەن سەنىمىمىز سۋعا كەتتى. "جاسىرعان كەسەلدى ءولىم اشكەرەلەيدى"دەگەننىڭ كەرى كەلدى. "جەدەل جاردەم" ء"ولدىم" دەسەڭ كەلمەيدى. ويتكەنى اۋرۋحانالاردا ورىن جوق. ورىن تاپقاندارعا ءدارى-دارمەك پەن وتتەگى باللوندارى جەتىسپەيدى. ءدارىحانالاردا كەرەكتى ءدارى جوق، بارىنىڭ باعاسى ۋداي قىمبات. جۇرت، اركىم وزىنشە تال قارماۋعا كوشتى. مەملەكەت باسشىسى ق.توقاەۆ جاعدايدى تۇزەۋگە ۇكىمەتكە ەكى اپتا مۇرسات بەردى. پرەزيدەنتتىڭ كوروناۆيرۋسقا قاتىستى جاقىندا جاريالاعان ۇندەۋىنەن كەيىنگى تەكسەرىستە شەتەلدەردەن كەلگەن گۋمانيتارلىق كومەكتەردى، قاسقالداقتىڭ قانىنداي قات دارىلەردى جۇرت ەش جەردەن تاپپاي، تەڭسەلىپ جۇرگەندە، حالىقتان جاسىرىپ، قىمتاپ ۇستاپ، قىمقىرىپ ساتىپ، قۇلقىنىن ويلاعان قاسكۇنەمدەر اشكەرەلەندى. بۇل - مالتابارلىق ەمەس، مارودەرلىك قىلمىس!

ءار شاڭىراقتى قايعىنىڭ قارا بۇلتى تورلاپ، ءار بوساعانى ءولىم اڭدىپ جۇرگەندەي. الىسىڭ دا، جاقىنىڭ دا باقيعا كەتىپ جاتىر. اجال ادام تاڭدامايدى، ەشكىمنىڭ باسىنان سيپاپ، مۇسىركەمەيدى. قاراپايىم حالىقتىڭ قاتارىندا نەبىر جاقسى مەن جايساڭدار، تالانتتىلار مەن دارىندىلار دا قايتپاس ساپارعا اتتانۋدا. كەشە عانا جانىمىزدا جۇرگەن جانداردان قاپىدا ايىرىلىپ قالىپ جاتىرمىز. اللا پاناسىنا السىن! توپىراقتارى تورقا بولسىن!

قاسيەتتى قازاقستان قاسىرەتتى كۇندەردى باسىنان كەشىرۋدە.
مەملەكەت باسشىسىنىڭ پارمەنىمەن بەلگىلەنگەن ۇلتتىق ازا تۇتۋ كۇنى بۇكىل ەلىمىزدە اتاپ ءوتىلدى. قارعىس اتقىر كوروناۆيرۋس دەرتى مەزگىلسىز ءومىرىن قيىپ، ارامىزدان ج ۇلىپ اكەتكەن عازيز جانداردى، جازىقسىز قۇربانداردى بۇكىل ەلىمىز بولىپ تىك تۇرىپ، ءبىر مينۋت ەسكە الىپ، كوككە ورلەگەن تۋىمىزدى ءتۇسىرىپ، قارا جامىلىپ، ازا تۇتتىق، قۇران، دۇعا باعىشتادىق. بۇل - بىرىنشىدەن، ءبىزدىڭ ارۋاقتارعاا كورسەتىلگەن قۇرمەت، تاعزىمىمىز بولسا، ەكىنشىدەن ۇرپاقتارعا ءتالىم-تاربيە، ونەگەلى ساباق. "ولگەنگە قۇرمەت – تىرىگە مىندەت" دەيدى حالقىمىز.

ايدىڭ، كۇننىڭ امانىندا ىندەتتىڭ قۇربانى بولعان ازاماتتاردى ەسكە الىپ، قۇران باعىشتاپ، تاۋبەمىزگە كەلىپ جاتىرمىز. كەلمەسكە كەتكەندەردىڭ اۋلەتتەرىنە كوڭىل ايتۋدامىز. ء"ولى ريزا بولماي ءتىرى بايىمايدى". تاريح تالقىسىندا نە كورمەگەن حالىقپىز؟! "اقتابان شۇبىرىندىنى" دا، قىزىل قىرعىندى دا، اقسۇيەك اشتىقتىڭ دا نەشە اتاسىن، نازالى ناۋبەتىن كورگەن ۇلى قازاق - تامىرى تازا، ءدىڭى مىقتى ۇلتپىز! بۇل قىستالاڭ كۇندەر دە وتەر-كەتەر. سالىمىز سۋعا كەتىپ، ساعىمىز سىنباسىن! ءاربىر قازاق - قازاقستاننىڭ قازىناسى، مەملەكەت بايلىعى! قاسىمىزدا جۇرگەن ءار ادامعا قازىنانى قورىعانداي قامقورلىقپەن قاراپ، كوزىمىزدىڭ قاراشىعىنداي ساقتاي بىلەيىك. اڭدىپ جۇرگەن اجالعا الدىرمايىق، قۇردان-قۇر ايىرىلىپ، قول قۋسىرىپ قاراپ وتىرمايىق. ءبىر-بىرىمىزگە قول ۇشىن بەرىپ، جاناشىرلىقپەن جان ساقتايىق. ۇمىتپەن ءومىر سۇرەيىك. ەلىمىزدىڭ ىرگەتاسىن ۇستاپ تۇرعان بىرلىگىمىزدى قادىرلەيىك. ار-نامىسىمىز امان بولسىن. كەلەشەككە دەگەن سەنىمنەن ايىرىلمايىق! اۋىرىپ-سىرقاعانداردىڭ تەزىرەك ساۋىعۋىن تىلەيىك! ساقتانىپ جۇرىڭىزدەر! عۇمىرلى بولىڭىزدار!

ۇلىقبەك ەسداۋلەت،
مەملەكەتتىك سىيلىقتىڭ لاۋرەاتى

سوڭعى جاڭالىقتار

اداسقان بالالار امان-ەسەن تابىلدى

ايماقتار • 07 تامىز، 2020

ۇقساس جاڭالىقتار