مەديتسينا • 09 شىلدە، 2020

ماڭعىستاۋعا وزگە ايماقتاردان دارىگەر-ماماندار شاقىرتىلۋدا

56 رەت كورسەتىلدى

بۇل تۋرالى ماڭعىستاۋداعى كوروناۆيرۋسپەن كۇرەس شارالارى تاقىرىبىنا ارنالعان ونلاين-بريفينگتە وبلىس اكىمى سەرىكباي ترۇموۆ مالىمدەدى، دەپ حابارلايدى Egemen.kz

بۇگىنگى كۇنى مەديتسينالىق مامانداردىڭ جۇمىس كولەمى ارتتى. دارىگەرلەر ناۋقاستاردىڭ ءومىرى ءۇشىن كۇن-ءتۇن دەمەي ايانباي كۇرەسۋدە. الايدا، ناۋقاستاردىڭ كوبەيۋىنە بايلانىستى وڭىردە مەديتسينا ماماندارىنىڭ جەتىسپەۋشىلىگى بايقالادى. ەم الۋ شارالارىنا 200 مەديتسينالىق قىزمەتكەر جۇمىلدىرىلعان. دەسە دە، وڭىردە رەانيماتولوگتار، ينفەكتسيونيستتەر، تەراپەۆتتەر جانە جالپى پراكتيكا دارىگەرلەرى تاپشى.

اتالعان مامانداردى وبلىسقا الدىرۋ بويىنشا جۇمىستار جۇرگىزىلىپ جاتىر. وزگە ايماقتان جوعارى بىلىكتى ماماندار شاقىرتىلۋدا. الداعى ۋاقىتتا وزگە وبلىستان دارىگەرلەر كەلەتىن بولادى. سونىمەن بىرگە ماڭعىستاۋعا رەسەيلىك 5 ماماننىڭ كەلۋى كۇتىلۋدە. جاڭاوزەن قالاسىنا دا وبلىس ورتالىعىنان قوسىمشا 3 دارىگەر مامان جىبەرىلەتىن بولادى. بۇل قوسىمشا كۇش ءوڭىر دارىگەرلەرىنە ۇلكەن قولداۋ بولماق.

"بارلىق دارىگەرلەردى قولداۋ ماقساتىندا ولاردىڭ قاۋىپسىزدىگى ءۇشىن جايلى قوناق ۇيلەرگە ورنالاستىرىلىپ، ۇزدىكسىز تاماقتاندىرىلىپ، ۇستەماقىلارى تولىق كولەمدە تولەنىپ جاتىر"، دەدى مو اكىمى سەرىكباي ترۇموۆ.

سونىمەن قاتار ايماقتاعى قالا مەن اۋدانداردا بىرقاتار مەكتەپتەردىڭ ىشىندە ورنالاسقان ەگۋ بولمەلەرى حالىققا مەديتسينالىق قىزمەت كورسەتۋ جۇمىستارىنا جۇمىلدىرىلدى. مەكتەپتەردىڭ ەگۋ كابينەتتەرىندە كاسىبي بىلىكتى مەيىربيكەلەر تولىققاندى مەديتسينالىق ەم-شارالارىن جاسايتىن بولادى.

"كوروناۆيرۋسپەن كۇرەس شارالارىنا ۆولونتەرلار دا اتسالىسىپ جاتىر. وبلىس بويىنشا پروۆيزورلىق ورتالىقتاردا 80-گە جۋىق ەرىكتى قىزمەت ەتۋدە. ولاردىڭ ىشىندە، وبلىستىق ۆولونتەرلار كورپۋسىنىڭ جاستارى، مەديتسينالىق كوللەدج ستۋدەنتتەرى، ءوڭىردىڭ سپورتشىلارى، سونىمەن بىرگە قالىپتاسقان جاعدايعا بەي-جاي قاراي الماعان بىرقاتار ازاماتتار بار. وسى ورايدا، بارشا ۆولونتەرلارعا العىس بىلدىرەمىن"، دەدى س.ترۇموۆ.

سوڭعى جاڭالىقتار

شىمكەنتتە 5 شاعىناۋدانعا گاز جۇيەسى تارتىلۋدا

وڭتۇستىك قازاقستان • بۇگىن، 16:05

COVID-19: ابدىراعان ارگەنتينا

الەم • بۇگىن، 11:25

ۇقساس جاڭالىقتار