ايماقتار • 09 شىلدە، 2020

باتىس قازاقستان ىندەتكە قارسى كۇرەستە 2 ملرد 130 ملن تەڭگە جۇمسادى

25 رەت كورسەتىلدى

باتىس قازاقستان وبلىسىنىڭ اكىمى عالي ەسقاليەۆ وڭىردەگى ەپيدەميولوگيالىق احۋال تۋرالى سۇقبات بەرىپ، كەيبىر ورىن العان قيىندىقتار ءۇشىن حالىقتان كەشىرىم سۇرادى، دەپ حابارلايدى Egemen.kz

وڭىردە كوروناۆيرۋسقا قاتىستى جاعداي كۇردەلى كۇيىندە قالىپ وتىر. بۇگىنگى تاڭدا 571 ادام جۇقپالى اۋرۋلار اۋرۋحاناسىندا، 369 ناۋقاس پروۆيزورلىق اۋرۋحانادا ەم الۋدا. ونىڭ ىشىندە 473 ادامنىڭ جاعدايى ورتاشا بولسا، 92 ادام اۋىر حالدە جاتىر.

– اۋرۋعا شالدىققان ادامدار وبلىس ورتالىعىندا جانە بارلىق اۋدانداردا انىقتالدى. ەڭ كوبى ورال قالاسى بويىنشا – 2100 ادام نەمەسە 61،1%. ءبورلى اۋدانىندا – 223 ادام، بايتەرەك اۋدانىندا - 208 ادام جانە اقجايىق اۋدانىندا – 141 ادام اۋرۋعا شالدىعىپ وتىر، – دەدى عالي ەسقاليەۆ.

اكىمنىڭ ايتۋىنشا، 1 ساۋىردە وڭىردە كوروناۆيرۋس جۇقتىرعان ناۋقاستارعا 380 كەرەۋەت ازىرلەنگەن. بىراق ول جەتكىلىكسىز بولعاندىقتان ءۇش ەسەگە جۋىق كوبەيتۋگە ءماجبۇر بولعان. قازىر مۇنداي كەرەۋەت سانى 1125-كە جەتتى.

– الدىن الا بولجام مۇنداي بولعان جوق. كارانتين اشىلعاننان كەيىن بىزدە پنەۆمونيامەن اۋىرعان ادام سانى ەداۋىر ءوسىپ كەتتى. ءبىزدىڭ وبلىستاعى بارلىق ناۋقاستىڭ 82%-ى ماۋسىم-شىلدە ايلارىندا تىركەلىپ وتىر. شىنى كەرەك، ءبىز بۇعان دايىن بولعان جوقپىز. وڭىردەگى پروۆيزورلىق اۋرۋحانالار 100 پايىزعا جاقىن تولىق. ەرتەڭ بىزگە قوسىمشا مەديتسينالىق جابدىقتار كەلۋى كەرەك. ياعني ەرتەڭ-بۇرسىگۇنى ءبىز ورال قالاسىندا قوسىمشا 230 توسەك-ورىن اشامىز، – دەدى ءوڭىر باسشىسى.

ءدال بۇگىن وڭىردە وكپەنى جاساندى جەلدەتەتىن 130 اپپارات بار. اكىمنىڭ پىكىرىنشە بۇل جەتكىلىكتى.

ال وتتەگى كونتسەنتراتورلارى كەرەك. ونىڭ سانى ازىرگە 46 دانا ەكەن. سوڭعى كۇندەرى دەمەۋشىلەردىڭ كومەگىمەن قاجەتتى جابدىق شەتەلدەن ساتىپ الىنعان، جاقىن كۇندەرى جەتكىزىلۋى ءتيىس. "بۇعان قوسا مەديكتەر بوبروۆ اپپاراتىن دا قولدانىپ جاتىر. ءبىز جاقىن كۇندەرى ورال قالاسىنداعى كاسىپورىنداردىڭ بىرىندە بوبروۆ اپپاراتىن ءوزىمىز شىعارا باستايمىز"، دەدى اكىم.

قازىرگى تاڭداعى وتكىر ماسەلەنىڭ ءبىرى – مەديتسينالىق كادر جەتىسپەۋشىلىگى. اسىرەسە كىشى جانە ورتا مەديتسينالىق ماماندار جەتىسپەۋدە. "بۇگىنگى تاڭدا ىندەتپەن كۇرەسكە مەديتسينالىق قىزمەتكەرلەردىڭ جالپى سانىنىڭ تەك 50%-ى عانا جۇمىلدىرىلعان. مەديتسينالىق قىزمەتكەرلەردىڭ كوبى اۋرۋعا شالدىققان نەمەسە ءماجبۇرلى دەمالىستارعا كەتكەن. وسى ماسەلەنى شەشۋ ءۇشىن ورال قالاسىنداعى 2 مەديتسينالىق كوللەدج تۇلەكتەرىن اۋرۋحانالاردا جۇمىس ىستەۋگە جەدەلدەتىپ وقىتۋ جۇمىسى باستالدى. 15 كۇننەن سوڭ ءبىزدىڭ دارىگەرلەرگە 200 جۋىق جاڭا مەديتسينالىق قىزمەتكەر كومەككە كەلەدى. سونىمەن قاتار، ءبىز باسقا قالالارداعى جوعارى مەديتسينالىق وقۋ ورىندارىنىڭ تۇلەكتەرىن تارتۋدى جوسپارلاپ وتىرمىز. سونداي-اق، جەكە مەديتسينالىق كلينيكالاردان 9 دارىگەر ارىپتەستەرىنە كومەكتەسۋگە كەلىستى"، دەيدى عالي ەسقاليەۆ.

مامان جەتىسپەۋشىلىگىنە جانە پنەۆمونيانىڭ وسۋىنە بايلانىستى وڭىردە ناۋقاستاردى جوسپارلى ەمدەۋ ۋاقىتشا توقتاتىلدى. وسىعان بايلانىستى تۇرعىندار ۇيدە كەڭەس الۋ جانە ەمدەلۋ ءۇشىن بارلىق امبۋلاتوريالاردا موبيلدىك كلينيكالار ۇيىمداستىرىلدى. سونداي-اق، بارلىق ەمحانادا تۇرعىنداردىڭ تەلەفون قونىراۋلارىن قابىلدايتىن ورتالىق جۇمىس ىستەۋدە. ەمحانا تەلەفون نومىرلەرى www.stopcovid.kz سايتىندا تۇر. وبلىس تۇرعىندارى 109 نومىرىنە قوڭىراۋ شالىپ، مەديتسينالىق كەڭەس الۋعا، ەمحانالاردىڭ جۇمىسى تۋرالى ءوز ۇسىنىسى مەن شاعىمىن ايتۋعا بولادى. ايتا كەتەيىك، ناۋقاستارعا تەلەفونمەن اقىل-كەڭەس بەرۋ ىسىنە زەينەت دەمالىسىنا شىققان بۇرىنعى دارىگەرلەر كومەككە كەلىپتى. "109" نومىرىندەگى وپەراتورلار قاجەت بولعان جاعدايدا ناۋقاستى جۇقپالى اۋرۋلار دارىگەرلەرى مەن پۋلمونولوگتارمەن قوسا الادى.

ەگەر تۇرعىندار قانداي دا ءبىر سەبەپتەن ۇيدەن شىعا الماسا، ەرىكتىلەر ءدارى-دارمەكتەر مەن ازىق-ت ۇلىكتەردى جەتكىزۋگە كومەكتەسەدى. ول ءۇشىن دە "109" نومىرىنە قوڭىراۋ شالۋ كەرەك. ايماقتاعى كوروناۆيرۋس تۋرالى بارلىق اقپارات stopcovid.kz سايتىندا تۇر.

سوڭعى اي ىشىندە وڭىردە ساتىلعان ۆيرۋسقا قارسى جانە قىزۋ تۇسىرەتىن ءدارى-دارمەكتىڭ كولەمى 5 ەسە ارتقان. قازىر قۇرامىندا پاراتسەتامول بار پرەپاراتتار، اتسەتيلساليتسيل قىشقىلى، تسەفترياكسون، ۆيرۋسقا قارسى پرەپاراتتار، ازيتروميتسين، اسكوربين قىشقىلى سەكىلدى دارىلەردىڭ قورى جاساقتالعان. پاراتسەتامول، لەۆوفلوكساتسين جانە انتيكواگۋليانتتار تاپشىلى سەزىلۋدە. "وڭىردەگى بار ءدارى-دارمەك ورنىمەن، ۋاقىتىمەن پايدالانىلسا، جەتكىلىكتى. ەل پرەزيدەنتى قاسىم-جومارت توقاەۆتىڭ تاپسىرماسىنا سايكەس دارىلەردى كوتەرىپ ساتىپ الۋشىلاردى، باعاسىن نەگىزسىز وسىرۋشىلەردى انىقتاۋعا كىرىستىك"، دەيدى ءوڭىر باسشىسى.

باتىس قازاقستان وبلىسىندا سوڭعى كەزدە ءبىر كۇندە جەدەل جاردەم قىزمەتىنە حابارلاساتىندار سانى 600-دەن 1100-گە دەيىن ءوسىپ كەتكەن. وسىعان بايلانىستى جەدەل جاردەم بريگادالارىنىڭ سانى كوبەيتىلدى. قازىر 61 بريگادا جۇمىس ىستەپ تۇر، بۇل وتكەن جىلمەن سالىستىرعاندا 24 كولىككە ارتىق.

"الداعى 2 اي ىشىندە جەدەل جاردەم ستانتسياسىنا تاعى 37 كولىك ساتىپ الامىز، ونىڭ 20-سى – رەانيموبيل"، دەپ حابارلادى عالي ەسقاليەۆ .

بۇگىندە باتىس قازاقستان وبلىسىندا كوروناۆيرۋستى انىقتاۋ ءۇشىن 5 زەرتحانادا كۇنىنە 1200-1400 زەرتتەۋ تەستى جاسالادى. تەست قورىتىندىسىن شىعارۋدا كىدىرىس بار، ويتكەنى زەرتحانا قىزمەتكەرلەرىنىڭ ءوزى ىندەت جۇقتىرىپ الادى ەكەن. سوندىقتان بۇل زەرتحانالاردا دەزينفەكتسيالىق شارالار ءجيى جاسالىپ، كارانتينگە دە جابىلادى. مۇنداي جاعدايدى بولدىرماس ءۇشىن ماماندار تەستى تەك ستاتسيونارلاردا جانە ناۋقاستارمەن جاقىن قارىم-قاتىناستا بولعان ادامدارعا جاساۋدى ۇسىنىپ وتىر.

ارينە، كوروناۆيرۋسقا قارسى شارالاردىڭ ءبارى وڭىردە قۇرىلعان جەدەل شتابتىڭ باقىلاۋىمەن جاسالىپ وتىر. بۇل ىسكە بارلىق قۇقىق قورعاۋ ورگاندارى جۇمىلدىرىلعان. مىسالى، ەكونوميكالىق قىلمىستاردى تەرگەۋ دەپارتامەنتى شەكارادان وتكىزبەك بولعان كونتراباندالىق تاۋار – 4 ملن دانا بەتپەردەنى تاركىلەپ، دەنساۋلىق ساقتاۋ دەپارتامەنتىنە تاپسىردى. ارنايى مونيتورينگتىك توپتار باعا مەن سانيتارلىق تالاپتاردىڭ ساقتالۋىن ۇنەمى تەكسەرەدى. بۇل ىسكە جەكەلەگەن ازاماتتار دا ۇلەس قوسۋدا.

باتىس قازاقستان وبلىسىندا كوروناۆيرۋسپەن كۇرەسكە وسى كەزگە دەيىن رەسپۋبليكا جانە وبلىس بيۋدجەتىنەن 2 ملرد 130 ملن تەڭگە جۇمسالىپتى. سونىڭ ىشىندە 835 ملن تەڭگە دارىگەرلەر ءۇشىن جەكە قورعانىش كيىمدەرىن ساتىپ الۋعا كەتكەن. "بۇل وتە كوپ قارجى، بىراق سونىڭ وزىندە جەتكىلىكسىز"، دەيدى اكىم. ويتكەنى تالاپ بويىنشا ينفەكتسيالىق اۋرۋحانادا دارىگەر ەكى ساعات سايىن قورعانىش كوستيۋمىن اۋىستىرىپ تۇرۋى كەرەك. ءبىر كوستيۋمنىڭ قۇنى 20-30 مىڭ تەڭگە ارالىعىندا تۇرادى. ءبىر تاۋلىك قىزمەت ەتكەن دارىگەر وسى كوستيۋمدى 12 مارتە اۋىستىرىپ كيۋى كەرەك. مەملەكەتتىك بيۋدجەتكە ۇلكەن شىعىن بولىپ وتىر.

سونداي-اق ناۋرىز-مامىر ايلارىندا 500 ملن تەڭگەدەن استام قارجى ىندەتكە قارسى كۇرەسكەن دارىگەرلەردىڭ جالاقىسىنا ۇستەماقى رەتىندە تولەنگەن. ونى 3066 دارىگەر العان. ۇستەمە الۋشىلاردىڭ سانى ماۋسىم ايىندا ودان دا كوبەيەدى.

كوروناۆيرۋسقا قارسى كۇرەس شىعىندارى ىشىندە وبلىس بيۋدجەتىنەن مەديتسينالىق قۇرال-جابدىق الۋعا بولىنگەن 254 ملن تەڭگە، دەزينفەكتسيالىق شارالارعا ارنالعان 119 ملن تەڭگە دە بار. مەديكتەردىڭ تاماقتانۋى، قوناقۇيدە تۇرۋى سەكىلدى شىعىندار دا ەسەپتەلگەن.

بۇعان قوسىمشا دەمەۋشىلەردىڭ كومەگىمەن «اقجايىق» قورى ارقىلى 130 ملن تەڭگەدەي قاراجات كەلدى. ودان بولەك ەشبىر ەسەپكە الىنباعان سپونسورلاردىڭ قاراجاتى دا بار ەكەن.

"بۇگىندە الەم بويىنشا بىرقاتار ەلدەردە احۋال تۇراقتانىپ كەلەدى. ولارداعى جاعداي ءبىزدىڭ وڭىردەگىدەن دە اۋىر بولعان ەدى. بىراق، ولار ىشكى ءتارتىپتىڭ ارقاسىندا ەپيديميولوگيالىق احۋالدى جاقسارتا الدى. شەتەلدىك مامانداردىڭ پايىمداۋىنشا، كوروناۆيرۋسپەن كۇرەستە ەڭ ءتيىمدى ءتاسىل – كوپشىلىك جەرلەرگە بارماۋ، توي-تومالاق وتكىزبەي يزولياتسيادا بولۋ. وكىنىشكە وراي، ءبىزدىڭ ەلدىڭ ازاماتتارى وسى پوزيتسيانى ۇستانا الماي وتىر. مىنا اسا قاۋىپتى دەرت تەك دەنساۋلىعىمىزدى جويىپ قانا قويمايدى. اسىل قازىنامىزدان ايىرىپ، ءۇرىم-بۇتاعىمىزعا قاۋىپ ءتوندىرىپ تۇر. ساقتىق شارالارىنا سالعىرت قارامايىق. كوروناۆيرۋس بەيقامدىقتى كەشىرمەيدى. مەن بارلىق قيىندىقتاردى بىرگە جەڭە الاتىنىمىزعا سەنىمدىمىن. جاقىنىمىزعا جاناشىر بولىپ، قاۋىپتىڭ بەتى قايتقانشا امان بولايىق!" دەدى ءوڭىر تۇرعىندارىنا ارناعان ءسوزىن قورىتىندىلاعان باتىس قازاقستان وبلىسىنىڭ اكىمى عالي ەسقاليەۆ.

 

باتىس قازاقستان وبلىسى

سوڭعى جاڭالىقتار

قحل: ۆيزا بەرمەي جاتىر

حوككەي • بۇگىن، 15:18

COVID-19 ادامنان يتكە جۇققان

كوروناۆيرۋس • بۇگىن، 14:15

قيىن كەزەڭ ارتتا قالدى - مينيستر

قازاقستان • بۇگىن، 11:14

ۇقساس جاڭالىقتار