9 قىركۇيەك كۇنى الماتىدا ارداگەرلەر ۇيىمدارىنىڭ ونداعان وكىلى اسكەر ۇيىنە كىرەبەرىستەگى اقش-تىڭ شلاگباۋمىن بۇزىپ تاستادى. بۇل تۋرالى «ۆرەميا» گازەتى جازدى.
اسكەر ۇيىنە كەلەتىن ارداگەرلەردى ۇنەمى كىرەبەرىستەگى باقىلاۋ بەكەتىندە اقش اسكەرىنىڭ كيىمىن كيىپ العان كۇزەتشىلەر تەكسەرەدى ەكەن. ارداگەرلەر اقش-تىڭ مۇندا نەلىكتەن باقىلاۋ بەكەتىن ورنالاستىرعانىن تۇسىنبەي دال بولۋدا. ولار بۇل سۇراقتى اقش ەلشىلىگىنە دە, ەلىمىزدىڭ مەملەكەتتىك ورگاندارىنا دا ايتقان ەكەن. دەگەنمەن, ولاردىڭ ەشقايسىسى ءالى كۇنگە دەيىن بۇل ماسەلەنى سارالاپ ءتۇسىندىرىپ بەرە الماي وتىر. اقىرى اۋعان سوعىسى مەن چەرنوبىل , ۇلى وتان سوعىسى ارداگەرلەرىنىڭ قولداۋىمەن جولدارىنا توسقاۋىل بولعان شلاگباۋمدى ءوز كۇشتەرىمەن بۇزۋعا بەكىندى.
«بۇل شلاگباۋم ءبىزدىڭ ازاماتتاردىڭ ارىنا نۇقسان كەلتىرىپ تۇر, – دەيدى اۋعان سوعىسىنىڭ ارداگەرلەرى مەن مۇگەدەكتەرى قوعامدىق بىرلەستىگى ۇيلەستىرۋشى كەڭەسىنىڭ توراعاسى مۇرات ابدىشۇكىروۆ. – ءبىز امەريكالىقتارعا بۇل جەردە قوناق ەكەنىن ەستەرىنە سالعىمىز كەلەدى. قازاق – قوناقجاي حالىق, الايدا, ونى پايدالانىپ ءبىزدى باسىنۋعا بولمايدى».
ارداگەرلەر باقىلاۋ بەكەتىنە گاز باللوندار مەن دانەكەرلەيتىن قۇرال اكەلىپ, شلاگباۋمنىڭ قۇلپىن كەسىپ تاستادى. ولاردىڭ بۇل ارەكەتتەرىنە پوليتسيا قىزمەتكەرى توسقاۋىل جاساماق بولدى, الايدا, اشىنعان ارداگەرلەرگە قارسى شىعۋعا باتا المادى. ال ارداگەرلەردى كىرەبەرىستە كۇندە تەكسەرىپ تۇراتىن كۇزەتشىلەر ءتىپتى بەكەتتەرىنەن شىعۋعا نيەت بىلدىرمەدى. اقىرى ارداگەرلەر ۇيىمدارىنىڭ وكىلدەرى اسكەر ۇيىنە كەدەرگىسىز كىرىپ-شىعۋ ءۇشىن شلاگباۋمدى جوعارى كوتەرگەن بويى دانەكەرلەپ تاستادى. سونداي-اق ولار الداعى 10 كۇن ىشىندە شلاگباۋم ءالى دە ورنىندا تۇرا بەرەتىن بولسا, ونى مۇلدەم الىپ تاستايتىندارىن ەسكەرتتى.
ايدار ورىسباەۆ.
