ايماقتار • 08 شىلدە، 2020

سولتۇستىك قازاقستان وبلىسىندا جاعداي تولىق باقىلاۋدا

49 رەت كورسەتىلدى

سولتۇستىك قازاقستان وبلىسى اكىمى قۇمار اقساقالوۆتىڭ ايماقتىق كوممۋنيكاتسيا قىزمەتىندە بەرگەن بريفينگىنىڭ نەگىزگى لەيتموتيۆى وسى بولدى، دەپ حابارلاي Egemen.kz.

راس، قازىر حالىق پاندەمياعا قاتتى الاڭداۋلى. وبلىس اكىمدىگىنىڭ سايتى مەن مەنىڭ جەكە پاراقشاما كۇن سايىن ونداعان سۇراقتار ءتۇسىپ جاتىر. ساۋالداردىڭ كوپشىلىگىنە وتكەن اپتادا ينستاگرامداعى تىكەلەي ەفيردە جاۋاپ بەردىم. بۇگىنگى بريفينگتە تۇرعىندار مەن جۋرناليستەردەن سوڭعى 3–4 كۇندە تۇسكەن ساۋالدارعا جاۋاپ بەرەيىن، دەي كەلىپ، ودان ءارى قۇمار اقساقالوۆ جامان ىندەتتىڭ وبلىستاعى بۇگىنگى تارالىمىنا توقتالدى. 8 شىلدەدەگى مالىمەتكە قاراعاندا قازىر 1 446 وقيعا تىركەلدى. سونىڭ ىشىندە 480 ادام اۋرۋدىڭ سيمپتومدى تۇرىمەن، ال 67 پروتسەنتى سيپتومسىز تۇرىمەن ناۋقاستانعان. وتكەن تاۋلىكتە ناۋقاستانعاندار سانى – 1،9 پروتسەنتكە ءوستى نەمەسە بۇل 28 ادام، ونىڭ 19-ى سيمپتومدى، 9-ى سيمپتومسىز.

ينفەكتسيالىق ستاتسيونارلاردا قازىر 136 ادام ەمدەلىپ جاتىر. 545 ادام ەمدەلىپ شىقتى.

مەديتسينالىق قىزمەتكەرلەرگە ەڭبەكاقى قالاي تولەنۋدە دەگەن سۇراققا اكىم ولاردىڭ ەڭبەكتەرىن جوعارى باعالايتىنىن جانە ولارعا ءوزىنىڭ ريزاشىلىعىن جەتكىزدى. بۇگىنگى تاڭدا پرەزيدەنتتىڭ اتىنان 15 دارىگەرگە جوعارى مەملەكەتتىك ناگرادالار تاپسىرىلدى. ال ەڭبەكاقى جونىندە ايتاتىن بولساق، بارلىق ينفەكتسيالىق، پروۆيزورلىق ستاتسيونارلاردىڭ، سونداي-اق جەدەل جاردەم قىزمەتكەرلەرىنە، قابىلداۋ بولمەلەرىندەگى فيلترلەردە ىستەيتىندەرگە اي سايىنعى ۇستەمە اقى دەنساۋلىق ساقتاۋ ءمينيسترىنىڭ 2020 جىلدىڭ 4 ساۋىرىندەگى بۇيرىعىنا سايكەس تولەنەدى. بارلىق مەديتسينا قىزمەتكەرلەرى تاۋەكەلدىلىگى بويىنشا 3 توپقا بولىنگەن، سونىڭ ىشىندەگى ءبىرىنشى توپتا 184 ادام بار. وسىنداعى ءاربىر دارىگەردىڭ نەگىزگى ەڭبەكاقىسىنا 120 مىڭنان باستاپ 825 مىڭ تەڭگەگە دەيىن ىستەگەن ۋاقىتتارىنا سايكەس تولەنەدى. ەكىنشى توپتاعى تاۋەكەلدەگىلەرگە 425 مىڭ تەڭگەگە دەيىن تولەنەدى. مۇندايلار سقو-دا - 258 ادام. ال ءۇشىنشى توپتاعىلاردىڭ سانى  744 ادام، ولاردىڭ ارقايسىنا قوسىمشا 225 مىڭ تەڭگەگە دەيىن تولەنەدى. وسىلايشا ءبىز ناۋرىز ايىندا 48،6.، ساۋىردە 161،2 ملن.، مامىردا 150،3. جانە ماۋسىمدا 209،8 ملن تەڭگە قوسىمشا اقى تولەدىك. 

مەديتسينا قىزمەتكەرلەرىنە ارنالعان جەكە قورعانىش قۇرالدارى جەتكىلىكتى، الداعى 2 اپتاعا دا  جەتەدى، ناقتى ايتساق ءبىر رەتتىك بەتپەردە – 338 مىڭ دانا، قورعانىش كاستوم – 4 مىڭ، قولعاپ – 596 مىڭ دانا، انتيسەپتيك – 9 توننا بار. بولشەك ساۋدا جاسايتىن ءدارىحانالار جەلىسىندە بەتپەردە مەن انتيسەپتيك تاپشىلىعى جوق. قازىرگى ۋاقىتتا سۇرانىستىڭ ارتۋىنا بايلانىستى ءبىرىنشى قالالىق اۋرۋحانا، وبلىستىق فتيزيوپۋلمونولوگيا ورتالىعى جانە م.جۇماباەۆ، ع.مۇسىرەپوۆ اۋداندارىندا پاتسيەنتتەرگە ارنالعان توسەك-ورىن سانىن 65-تەن 435-كە دەيىن كوبەيتتىك. پروۆيزورلىق ستاتسيونارلارداعى ورىندار 100-دەن 905-كە دەيىن ارتتىرىلدى، سونىڭ ىشىندە وبلىستىق اۋرۋحانادا 200، قالالىق اۋرۋحانادا 110، قىزىلجار اۋداندىق اۋرۋحاناسىندا 120-عا دەيىن قوسىمشا ورىندار اشىلدى. باسقا اۋدانداردا ورىندى كوبەيتۋ قولعا الىنعان.

كارانتين سالدارىنان ۋاقىتشا جۇمىسسىز قالعانداردى جۇمىسقا ورنالاستىرۋ بويىنشا 3 شىلدە كۇنى بوس قىزمەت ورىندارىنىڭ جارمەڭكەسى ءوتىپ، وعان 29 كاسىپورىن مەن 280 ادام قاتىستى. 103 ادام جۇمىسقا تۇرۋ ءۇشىن قۇجاتتار جيناپ جاتىر. بۇگىن ساعات 16.00-دە پوگودين اتىنداعى تەاتردا ەكىنشى رەت جارمەڭكە وتكىزىلەدى.

ءسوزىنىڭ سوڭىن قۇمار ىرگەباي ۇلى سقو جامان ىندەتتىڭ تارالۋى تولىق باقىلاۋدا ەكەنىنە حالىقتى سەندىرە كەلىپ، "دەگەنمەن «ساقتىقتا قورلىق جوق» دەگەن جاقسى ءسوز بار عوي. ءوزىمىز دە ساقتانىپ جۇرەيىك اعايىن"، دەپ اياقتادى.

سوڭعى جاڭالىقتار

ۇقساس جاڭالىقتار