«جاۋ جاعادان العاندا, ءبورى ەتەكتەن تارتادى» دەگەندەي, وبلىس كولەمىندە پنەۆمونيا
اۋرۋى كەڭ تارالۋدا. بۇگىنگى تاڭدا 1000-نان اسا ناۋقاس ەم الىپ جاتىر, ونىڭ ىشىندە 60 ادام اۋىر جاعدايدا, 35 ادام وتە اۋىر حالدە. كۇنىنە ورتاشا ەسەپپەن پنەۆمونيا اۋرۋى بويىنشا 300-گە جۋىق ادام شاعىمدانىپ, سونىڭ ىشىندە 200-گە جۋىق ادام اۋرۋحاناعا جاتقىزىلۋدا. الايدا ماڭعىستاۋ وبلىستىق قوعامدىق كوممۋنيكاتسيا قىزمەتى ورتالىعى تاراتقان مالىمەتكە ساي, سوڭعى كۇندەرى ناۋقاستار سانىنىڭ تومەندەۋى بايقالۋدا.
ىندەتكە قارسى ءىس-شارا قاي دەڭگەيدە؟
جالپى, دەنساۋلىق ساقتاۋ ۇيىمدارىندا بارلىعى 1667 توسەك-ورىن دايىندالدى. سونىڭ ىشىندە, ينفەكتسيالىق ستاتسيوناردا 230 توسەك-ورىن, پروۆيزورلىق ستاتسيوناردا 1047 توسەك-ورىن جانە كارانتيندىك ستاتسيوناردا 390 توسەك-ورىن جاساقتالدى. بۇگىندە ولاردىڭ سىيىمدىلىعى 74%-دى قۇراپ وتىر. سونىمەن بىرگە وبلىس بويىنشا قوسىمشا 300 توسەك-ورىنعا پروۆيزورلىق ستاتسيونار دايىندالدى. وبلىستىق پەريناتالدىق ورتالىقتا – 25 توسەك-ورىن, جاڭاوزەن قالاسىندا – 70 توسەك-ورىن, تۇپقاراعان اۋدانىندا – 20 توسەك-ورىن, ماڭعىستاۋ اۋدانىندا – 35 توسەك-ورىن, قاراقيا اۋدانىندا – 40 توسەك-ورىن, مۇنايلى اۋدانىندا – 40 توسەك-ورىن, «ارحيمەد» دەنساۋلىق ساقتاۋ ورتالىعىندا جۇكتى ايەلدەرگە ارنالعان – 100 توسەك-ورىن جۇمىس ىستەي باستادى. ماڭعىستاۋ وبلىستىق اۋرۋحاناسىنىڭ 5 جانە 6-قاباتتارىنا جوندەۋ جۇمىستارى اپتا سوڭىندا اياقتالىپ, پروۆيزورعا 150 ورىن قوسىمشا قوسىلاتىن بولادى, رەزەرۆتە اقتاۋ قالاسىنداعى تەننيس ورتالىعىندا قوسىمشا 150 توسەك-ورىن دايىن تۇر.
ال اۋىرعان جانعا قاجەتتى قۇرال-جابدىقتارعا كەلەر بولساق, وبلىستا 122 بىرلىك وكپەنى جاساندى جەدەلدەتۋ اپپاراتى بار, ونىڭ ىشىندە 53 اپپارات ىندەت جۇقتىرعان ناۋقاستاردى ەمدەۋگە جۇمىلدىرىلعان. قوسىمشا «ماڭعىستاۋمۇنايگاز» اق – 20 اپپارات, «NCOC» كومپانياسى – 12 اپپارات, «قاراجانباس» اق – 30 وتتەگى كونتسەنتراتورلارىن ساتىپ الۋعا دەمەۋشىلىك كورسەتتى. رەسپۋبليكالىق بيۋدجەت ەسەبىنەن 40 اپپارات الىنسا, جەرگىلىكتى بيۋدجەتتەن قوسىمشا 30 بىرلىك وتتەگى كونتسەنتراتورلارى ساتىپ الىنۋدا.
ىندەتتىڭ ورشۋىنە بايلانىستى اتالعان اپپاراتتاردىڭ جەتىسپەۋشىلىگى بۇكىل الەمدە بايقالۋدا. سوندىقتان ماسەلەنى شەشۋ ءۇشىن مۇمكىندىكتەر قاراستىرىلىپ جاتىر.
قيىن كەزدە مەديتسيناعا, حالىققا اتىمتاي ازاماتتار قولۇشىن سوزۋدا. قۇرىلىسشىلار س.مۇساباەۆ, ا.جولدىباەۆ, ب.وڭداسىنوۆ, ج.ادىلبەكوۆ, ي.بيمىرزاەۆ, ن.كۇنشىعاروۆ, س.مۇڭالباەۆ, ا.كەرەلباەۆ وبلىسقا 25 دانا وتتەگى كونتسەنتراتورىن, ماڭعىستاۋ اۋدانىنا 15 دانا «بوبروۆا» اپپاراتىن الدىرىپ جاتسا, «فورتە» بانكتىڭ ماڭعىستاۋ وبلىستىق فيليالى ديرەكتورى ا.ورىسباەۆ 4 دانا وتتەگى كونتسەنتراتورىنا قولداۋ كورسەتۋدە.
ال «NCOC» كومپانياسى قوسىمشا 8 دانا وكپەنى جاساندى جەدەلدەتۋ اپپاراتتارىن الۋعا, 200 دانا كوپفۋنكتسيالى مەديتسينالىق كەرەۋەت, 50 دانا وتتەگى كونتسەنتراتورىن, 1 مىڭ دانا كوپ پايدالانىلاتىن مەديتسينالىق كوستيۋم مەن 10 مىڭ دانا ءبىر رەتتىك مەديتسينالىق كوستيۋمدەردى ساتىپ الۋعا قولداۋ بىلدىرۋدە.
ىزگى شارادان «ماڭعىستاۋمۇنايگاز» اق تىس قالعان جوق. ولار 1 دانا كت اپپاراتىن ساتىپ الۋعا قولداۋ بىلدىرسە, «ەرساي» كومپانياسى مەديتسينالىق قۇرال- جابدىقتارمەن قامتاماسىز ەتۋگە, قوسىمشا «وليمپ» لابوراتورياسىنىڭ جوندەۋ جۇمىستارىنا قارجىلاي دەمەۋشىلىك كورسەتۋگە جانە ونى 10 مىڭ پتر-تەستپەن قامتاماسىز ەتۋگە كەلىسىم بەردى.
جەدەل جاردەم دارمەنى قانداي؟
جەدەل جاردەم قىزمەتى ىندەت باستالىسىمەن بەلسەندى قىزمەت كورسەتۋگە تىرىستى. اتالعان مەكەمەدە قىزمەت ەتەتىن دارىگەرلەردىڭ ەڭبەگى – مايداندا العى شەپتە جۇرگەن ساربازدارمەن بىردەي بولدى دەۋگە بولادى. الايدا قامساۋى كەتكەن, عيماراتى بولماعاندىقتان بۇگىنگە دەيىن ء«ۇي جالداپ» ولمەشىنىڭ كۇنىن كورىپ جۇرگەن, كولىكتەرىنىڭ ساۋىنان بۇزىلعانى كوپ مەكەمە بىرازعا دەيىن «ارىعىن بىلدىرگەن جوق». بىراق ىندەت كۇشەيگەن شاقتا ولاردىڭ دا ءىسى قوجىراي باستادى. جەدەل جاردەم قىزمەتى ۇلگەرمەي, شاقىرۋلاردان باس كوتەرە الماي ساستى.
قۇزىرلى ورىنداردىڭ مالىمەتتەرىنە سۇيەنسەك, قازىر وبلىس بويىنشا جەدەل جاردەمنىڭ 45 بريگاداسى تىنباي ەڭبەك ەتۋدە. اقتاۋ قالاسىندا كۇندىزگى ۋاقىتتا 12 بريگادا, تۇنگى مەزگىلدە 14 بريگادا قىزمەت كورسەتەدى. بۇگىندە جەدەل جاردەم بريگادالارىنا كوپ كۇش تۇسۋدە. وبلىس بويىنشا سوڭعى كۇنى 783 شاقىرۋ تۇسكەن, سونىڭ ىشىندە 292 شاقىرۋ اقتاۋ قالاسى بويىنشا ەكەن. الدىڭعى اپتادا ەڭ كوپ ياعني, 1 مىڭنان استام شاقىرۋ تۇسكەن.
بۇل باعىتتا, جەدەل جاردەم بريگادالارىن قولداۋ ءۇشىن وبلىستىق جەدەل جاردەم بالانسىنا دەمەۋشىلەر كومەگىمەن 6 بىرلىك سانيتارلىق اۆتوماشينا تابىستالدى.
وبلىس اكىمدىگى جانىندا اشىلعان Call-ورتالىققا كۇندەلىكتى ورتا ەسەپپەن وبلىس تۇرعىندارىنان 100-دەن استام قوڭىراۋ تۇسەدى دەسەك, نەگىزگى سۇراقتار ءدارى-دارمەك ماسەلەسى, اۋرۋدىڭ سيمپتومدارى تۋرالى جانە كارانتيندىك شەكتەۋ شارالارى جونىندە.
بارلىق وڭىردەگى سىندى ماڭعىستاۋ وبلىسىندا ءدارىحانالاردا ءدارى-دارمەكتىڭ جەتىسپەۋشىلىگى وتە وزەكتى. اقتاۋ قالاسىندا ءدارى-دارمەكتەردى تاسىمالداۋمەن «مەدسەرۆيس» جشس, «ەميتي» جشس, «ىڭكار» جشس جانە «ادا-فارم» جشس سىندى 4 مەكەمە اينالىسۋدا. قازىرگى تاڭدا «ىڭكار» جانە «مەدسەرۆيس» مەكەمەلەرىنە دارىلەر كەلىپ, دارىحانالارعا جەتكىزىلۋدە. ال «ادا-فارم» جشس ءوزىنىڭ 22 اپتەكاسىن قامتاماسىز ەتۋدە. جاقىن ۋاقىتتاردا «مەدسەرۆيس» جشس جانە «ەميتي» جشس وڭىرگە قاجەتتى ءدارى-دارمەكتەردى جەتكىزەتىن بولادى. وسىعان وراي الداعى اپتانىڭ ورتاسىندا وبلىستاعى ءدارى-دارمەكتەردىڭ قاجەتتىلىگى قاناعاتتاندىرىلۋى ءتيىس. قازىرگى تاڭدا اقتاۋ قالاسىندا انتيبيوتيكتەر 18 اتاۋدا, ۆيرۋسقا قارسى پرەپاراتتار 9 اتاۋدا, قىزۋ تۇسىرەتىن دارىلەر 17 اتاۋدا بار.
ءدارى-دارمەك ماسەلەسىن شەشۋ ءۇشىن ماڭعىستاۋ وبلىسىنىڭ اكىمدىگى, وبلىستىق پروۆيزورلار مەن فارماتسەۆتەر قاۋىمداستىعى جانە تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى اراسىندا دارىلىك زاتتارعا قاجەتتىلىكتىڭ وسۋىنە قاتىستى ماسەلەلەر بويىنشا ىنتىماقتاستىق تۋرالى مەموراندۋم جاساقتالدى.
سوڭعى كۇندەرى وڭىردەگى كۇردەلى ەپيدەميالىق احۋالعا بايلانىستى مەديتسينالىق قىزمەتتەر مەن پروتسەدۋرالىق كابينەتتەرگە سۇرانىس ارتۋدا. قالالار مەن اۋداندارداعى بىرقاتار مەكتەپتىڭ ىشىندە ورنالاسقان ەگۋ بولمەلەرى حالىققا مەديتسينالىق قىزمەت كورسەتۋ جۇمىستارىنا جۇمىلدىرىلىپ, مەكتەپتەردىڭ ەگۋ كابينەتتەرىندە كاسىبي بىلىكتى مەيىربيكەلەر تولىققاندى مەديتسينالىق ەم-شارالارىن جاساماق.
دارىگەرلەر دەسانتى كەلەدى
ماڭعىستاۋدا مەديتسينالىق مامانداردىڭ جۇمىس كولەمى ارتىپ وتىر. سوندىقتان وڭىردە مەديتسينا ماماندارىنىڭ جەتىسپەۋشىلىگى بايقالۋدا. اتاپ ايتقاندا, وڭىردە رەانيماتولوگتار, ينفەكتسيونيستەر, تەراپەۆتەر جانە جالپىپراكتيكا دارىگەرلەرى تاپشى. اتالعان مامانداردى وڭىرگە الدىرۋ بويىنشا جۇمىستار جۇرگىزىلىپ, الماتى, ماسكەۋ قالالارىنان جوعارى بىلىكتى ماماندار شاقىرتىلۋدا. الداعى ۋاقىتتا قوسىمشا ماماندار ءوڭىرىمىزدىڭ دارىگەرلەرىنە قولداۋ كورسەتەتىن بولادى. سونداي-اق قيىن كەزدە ۆولونتەرلەردىڭ قىزمەتى اسا ماڭىزدى. قازىرگى تاڭدا, پروۆيزورلىق ورتالىقتاردا 30-عا جۋىق ۆولونتەر قىزمەت ەتۋدە. ولاردىڭ ىشىندە, وبلىستىق ۆولونتەرلەر كورپۋسىنىڭ جاستارى, «مەيىربيكە» جانە «مەريديان» مەديتسينالىق كوللەدجىنىڭ ستۋدەنتتەرى, سونىمەن بىرگە قالىپتاسقان جاعدايعا بەيجاي قاراي الماعان بىرقاتار ازامات بار.
بايقاعانىمىزداي, ىندەتپەن كۇرەستە قول قۋسىرىپ قاراپ وتىرعان ەشكىم جوق. دەمەك, جۇدىرىقتاي جۇمىلعان جۇرتتى كورىپ, ىندەتتىڭ اياعىن تارتاتىن كۇن دە الىس ەمەس.
ماڭعىستاۋ وبلىسى
