1928-1929 قازىرگى جيدەباي بي سەلولىق وكرۋگىنە قاراستى ءۇشارال اۋىلىندا "ويان" كولحوزى (كيروۆ, كوممۋنيزم كولحوزى كەيىندە قوڭىرات سوۆحوزى) ۇيىمداستىرىلعان. سول كەزدە اكەسى نۇرجان اقساقال دا وتباسىمەن كولحوزعا كىرەدى. قازىبەكتىڭ بالالىق شاعى وسى اۋىلدا ءوتىپ, العاشقى "قىزىل مۇعالىم" اتانعان يسا سۇراۋباەۆتان باستاۋىش سىنىپتاردا ءبىلىم الادى. 4 سىنىپتى ۇزدىك ءبىتىرىپ, 1932-1935 جىلدارى اقتوعاي سەلوسىنداعى شارۋا جاستار مەكتەبىندە وقىپ, 7-سىنىپتى اياقتايدى. جوعارعى سىنىپتاردا جاباس كەڭەسباەۆتان (قازاق كسسر-ءنىڭ ەڭبەك سىڭىرگەن مۇعاىمى) ءبىلىمىن شىڭدايدى.
1935-1937 جىلدارى قارقارالى قالاسىنداعى پەداگوگيكالىق ۋچيليششەدە (العاشقىدا تەحنيكۋم بولعان) وقىپ, مۇعالىمدىك ءبىلىم الادى. ۋچيليششەنى تامامداعان سوڭ كيروۆ كولحوزىنداعى (قازىرگى ءۇشارال اۋىلى) ءوزى وقىعان مەكتەپتە مۇعالىم بولادى.
1939 جىلدىڭ 15 قازانىندا شەت اۋدانىنىڭ اسكەري كوميسسارياتى ارقىلى قىزىل ارميا قاتارىنا شاقىرىلادى. قازىبەك بىرگە شاقىرىلعان جولداستارىمەن حاباروۆسك ولكەسىندەگى, امۋرداعى كومسومولسك قالاسىندا №1 قىزىل تۋلى قۇرىلىس پولكىنىڭ 2-ءشى روتاسىندا اسكەري دايارلىقتان ءوتىپ, كىشى سەرجانت شەنىن الادى.
ەرلىك – ەلگە مۇرا, ۇرپاققا – ۇران
قازىبەك مايدان وتىنە ءوزى سۇرانىپ, 1942 جىلدىڭ ءساۋىر ايىندا اتتانادى. العاشقىدا بريانسك مايدانىندا ستالينگراد, كۋرسك ۇرىستارىنا قاتىسىپ, ودان ءارى 2-بەلارۋسسيا مايدانى, 3-ارميا, 40-اتقىشتار كورپۋسى, 5-اتقىشتار ديۆيزياسىنىڭ تانكى جويعىش 61-ديۆيزيونى تانكىگە قارسى قارۋلار روتاسىنىڭ تانكىگە قارسى 45 مم. زەڭبىرەگىمەن قارۋلانعان اتقىشتار بولىمشەسى قۇرامىندا بولادى. باستاپقىدا سوعىسقا برونبۇزعىش زەڭبىرەكتىڭ اتقىشى, نىساناشىسى رەتىندە ارالاسىپ, از ۋاقىتتا سول بولىمشەنىڭ كومانديرى بولىپ تاعايىندالادى. ونىڭ باسشىلىعىمەن برونبۇزعىش زەڭبىرەكشىلەر بولىمشەسى جاۋدىڭ تالاي تانكىسىن, بروندى تەحنيكاسىن ىستەن شىعارادى.
1943 جىلدىڭ 5 تامىزى كۇنى ورەل قالاسىن الۋ كەزىندە ۆزۆود كومانديرى جاراقات الىپ, قاتاردان شىعىپ قالۋىنا بايلانىستى باسقارۋدى دەرەۋ ءوز قولىنا الىپ, باتىل ءارى جىلدام شەشىم قابىلداپ, جاياۋ اسكەر بولىمىمەن بىرلەسە ۇرىس جۇرگىزىپ, قالاعا ءبىرىنشى بولىپ كىرەدى. وسى قاھارماندىعى "ەرلىگى ءۇشىن" مەدالىمەن اتالىپ وتىلەدى. اعا سەرجانت شەنىن الىپ, 61-تانكى جويعىش ديۆيزيونى, 3-باتارەياسىنىڭ بارلاۋشىسى مىندەتىنە كىرىسەدى.
1944 جىلدىڭ 8 اقپانىندا دنەپر وزەنىن ازات ەتۋ قيمىلدارى كەزىندە جاياۋ اسكەردىڭ الدىڭعى ساپىندا ءجۇرىپ, قولباسشىلارمەن ۇزدىكسىز بايلانىس ۇستاپ وتىرعان. شەشۋشى ساتتەردە باتارەياعا ورالىپ, جاۋ بەكىنگەن اتۋ نىساندارىن ءدال كورسەتكەن, قاجەتتىلىك بولعان جاعدايدا شايقاس الاڭقايىنا بارىپ, ۇرىس تا جۇرگىزگەن. دنەپر ءۇشىن ۇرىستا قازىبەك جاۋدىڭ 2 پۋلەمەت نۇكتەسىن جويادى. سول جولى "قىزىل جۇلدىز" وردەنىمەن ناگرادتالادى.
1944 جىلدىڭ ناۋرىز ايىندا ول 5-ءشى اتقىشتار ديۆيزياسىنىڭ 61-تانكى جويعىش ديۆيزيونى, 3-بارلاۋشىلار باتارەياسىنىڭ كومانديرى بولىپ تاعايىندالادى.
قازىبەك ءوزىنىڭ مايدان جولىندا ۆولگا مەن ورەل تۇبىندەگى ۇرىستارعا قاتىسىپ, زۋش, دەسنا, سوج, دنەپر, درۋت, بەرەزين وزەندەرىنەن كەسىپ ءوتتى. زولوتارەۆ تۇبىندە بولعان ۇرىستا قازىبەكتىڭ جەكە ءوزى زەڭبىرەگىمەن نەمىس تانكىسىن جويسا, تانكىگە قارسى قارۋلار روتاسى نەمىستىڭ 3 تانكىسىن قاتاردان شىعارادى.
ق.نۇرجانوۆتىڭ كوزسىز باتىرلىعى مەن تاپقىرلىعى جوعارى باعالانىپ, ونىڭ بارلاۋ ۆزۆودىنا ەڭ كۇردەلى تاپسىرمالار جۇكتەلەدى. ۆزۆودتىڭ نەگىزگى ماقساتى جاۋدىڭ شوعىرلانعان اتۋ بەكىنىستەرىن, جاسىرىلعان تانكىلەرى مەن بروندى تەحنيكالارىنىڭ ورنالاسقان جەرىن انىقتاپ, قولباسشىلىققا دەر كەزىندە جەتكىزىپ وتىرۋ بولاتىن. درۋت وزەنىنەن وتەردە ولار بوراعان جاۋ وعىنىڭ استىندا بارلاۋ جۇرگىزىپ, تانك شابۋىلىن تويتارۋعا جاعداي جاساعان باعالى مالىمەتتەر بەرەدى. جاۋ تىلىنا ەنىپ, ولاردىڭ شەگىنەر جولىن كەسىپ تاستايدى. فاشيستەر كەرى شەگىنگەندە ونىڭ ءبىر ءوزى 8 گيتلەرشىلدىڭ كوزىن جويىپ, ونىڭ ۆزۆودى 97 نەمىس سولداتىن تۇتقىنعا الادى. وسى ەرلىكتەرى ءۇشىن III دارەجەلى "داڭق" وردەنىمەن ناگرادتالادى.
باتىردىڭ سوڭعى جورىعى
فاشيست باسقىنشىلارىن تۇپكىلىكتى تالقانداۋ, بەلارۋس جەرىن تولىق ازات ەتۋ ماقساتىنداعى "باگراتيون" وپەراتسياسىنىڭ اسا ماڭىزدى ءبىر بولىگى – بەلوستوك وپەراتسياسى بارىسىنداعى ۆولكوۆىسك قالاسىن ازات ەتۋ ۇرىسىندا 5-ءشى اتقىشتار ديۆيزياسىنا جاۋعا وڭتۇستىك-شىعىستان سوققى بەرۋ تاپسىرىلعان. ۆولكوۆىسك قالاسى سان تاراپ تەمىر جولدىڭ جانە كوتەرمە جولدىڭ توعىسقان جەرى, سونداي-اق بەلوستوك باعىتىنداعى نەگىزگى جول بولعاندىقتان, وندا دۇشپاننىڭ ەڭ ماڭىزدى تىرەك ءبولىمى مىقتاپ بەكىنگەن ەدى. قالانى الۋ ودان كەيىنگى شابۋىلدىڭ وربۋىندە ماڭىزدى ءرول اتقاردى. سوعان سايكەس, قالا كوشەلەرىندە كەسكىلەسكەن ۇرىس ءجۇردى. بۇل ۇرىسقا اعا سەرجانت قازىبەك نۇرجانوۆ باسقاراتىن بارلاۋشىلار ۆزۆودى بۇيىردەگى قامتۋ توبى قۇرامىندا قاتىسادى. توپتىڭ باتىل قيمىلىنان قاتتى ساسقان گيتلەرشىلەر سوعىس تەحنيكاسىن, قارۋ-جاراقتارىن تاستاپ قاشادى. ق.نۇرجانوۆ جاۋدىڭ ىزىنە ءتۇسىپ, ءفاشيستىڭ 3 سولداتىن جانە ءبىر وفيتسەرىن تۇتقىنعا تۇسىرەدى. ەرجۇرەك ازامات شابۋىلداۋشى جاياۋ اسكەردى سوڭىنان ەرتە ۆولكوۆىسكىگە ءبىرىنشى بولىپ كىرەدى. وكىنىشكە قاراي, ۆولكوۆىسك-ورتالىق تەمىرجول اۋدانىندا اياعىنىڭ استىنان جارىلعان مينا اسەرىنەن اۋىر جارالانادى.
قالا جاۋدان تولىق ازات ەتىلەدى. سول كۇنى تۇندە ماسكەۋدە قالانى ازات ەتۋشىلەر قۇرمەتىنە 127 ارتيللەريا قارۋىنان وق اتىلىپ, ساليۋت بەرىلەدى.
ديۆيزيونعا ەڭ قىمبات جاۋىنگەردىڭ العان جاراقاتىنىڭ وتە اۋىر بولۋىنا بايلانىستى اسكەر باسشىلىعى جاۋىپ تۇرعان وققا قاراماستان, ەس-ءتۇسسىز كۇيدەگى قازىبەكتى 50 شاقىرىمداي جەردەگى دەرەچين دەرەۆنياسىندا ورنالاسقان №196 اسكەري-دالالىق گوسپيتالىنە جەتكىزەدى. ونداعى جارالىلاردىڭ كوپتىگىنە جانە سوعىس كەزىندەگى بارلاۋشىلارعا قاتىستى زاڭدىلىققا سايكەس, قابىلداۋ جۋرنالىنا تەگى "مۋرجاكوۆ كازبەك" بولىپ جازىلىپ كەتكەن. 1944 جىلدىڭ 15 شىلدەسى كۇنى دالا گوسپيتالىنە باس سۇيەگىنىڭ اۋىر جاراقاتىمەن تۇسكەن قازىبەك اجالمەن 9 كۇن ارپالىسىپ, 24 شىلدەدە قايتىس بولادى. دەرەچين سەلوسىنداعى باۋىرلاستار زيراتىنا "مۋرجاكوۆ قازبەك" ەسىمىمەن جەرلەنەدى.
اتالعان گوسپيتالدىڭ مەديتسينالىق جۋرنالىندا قارىنداشپەن جازىلعان جازبا باتىردىڭ تاعدىرى تۋرالى دەرەكتى 66 جىلدان كەيىن انىقتاۋعا مۇمكىندىك بەردى.
1944 جىلدىڭ 20 شىلدەسى كۇنى 61-تانكى جويعىش ديۆيزيوننىڭ كومانديرى, مايور ۆ.ميحەەۆ قازىبەكتى كەڭەس وداعىنىڭ باتىرى اتاعىنا ۇسىنىپ, سول كۇنى ناگرادا قاعازىن تولتىرىپ, ديۆيزيا باسشىلىعى قاراۋىنا جىبەرگەن, ياعني, قازىبەك قايتىس بولماي تۇرىپ, باتىر اتاعىنا ۇسىنىلعان.
جوعارعى اسكەري باسشىلىق پەن 2-بەلورۋسسيا مايدانى اسكەري كەڭەسىنىڭ "نەمىس باسقىنشىلارىمەن بولعان كۇرەستە كورسەتكەن ەرلىك پەن داڭقى ءۇشىن ق.نۇرجانوۆ جوعارعى ۇكىمەتتىك ناگرادا "كەڭەس وداعىنىڭ باتىرى" اتاعىن بەرۋگە لايىق" دەگەن قولداۋ حاتى كسرو جوعارعى كەڭەسىنە تەك 1945 جىلدىڭ 20 ناۋرىزىندا جەتەدى. وندا بىلاي دەلىنگەن:
"قورعانىس حالىق كوميسسارىنىڭ ورىنباسارى ارميا گەنەرالى ن.ا.بۋلگانين جولداسقا.
"2-بەلورۋسسيا فرونتى بويىنشا ماراپاتتاۋلار تۋرالى".
پرونيا, دنەپر, بەرەزينا وزەندەرىنەن كەشىپ وتكەنى, موگيلەۆ, ۆولكوۆىسك, شكلوۆ قالالارىن ازات ەتكەنى, شىعىس پرۋسسياداعى قارسىلاستاردىڭ توپتارىن تالقانداعانى جانە ۆيسلا وزەنىنىڭ جاعالاۋىنداعى پلاتسدارىمدى جەڭىپ العاندارى ءۇشىن, 2-بەلارۋسسيا فرونتىنىڭ جەكە قۇرامىن وردەندەرمەن ماراپاتتاۋ جانە سوۆەت وداعىنىڭ باتىرى اتاعىن بەرۋ تۋرالى جارلىقتىڭ جوباسىن ۇسىنامىن.
ماراپاتتاۋعا قىزىل اسكەردەن باستاپ, پولك كومانديرلەرىن قوسا العانداعى ارالىقتا بارلىعى 224 ادام ۇسىنىلادى, ماراپاتتاۋلاردى 2-بەلورۋسسيا فرونتىنىڭ اسكەري كەڭەسى قولدايدى. ءوز تاراپىمنان ۇسىنىستى قولدايمىن".
حالىق كوميسسارياتىنىڭ كادرلىق باس باسقارماسىنىڭ باستىعى, گەنەرال-پولكوۆنيك گوليكوۆ, 1945 جىل, 20 ناۋرىز.
كسرو جوعارعى كەڭەسى پرەزيديۋمىنىڭ 1945 جىلعى 24 ناۋرىزداعى جارلىعى بويىنشا كورسەتكەن قاھارماندىعى مەن ەرلىگى ءۇشىن قازبەك بەيسەن ۇلى نۇرجانوۆقا كەڭەس وداعىنىڭ باتىرى اتاعى بەرىلدى.
ۆولكوۆىسك قالاسىن ازات ەتۋدەگى ۇرىستىڭ وتە اۋىر جانە ودان ارعى شابۋىلداردى جۇرگىزۋدە شەشۋشى ماڭىزعا يە بولعاندىعىنان ق.نۇرجانوۆپەن بىرگە 5-ءشى اتقىشتار ديۆيزياسىنان تاعى دا 4 جاۋىنگەر كەڭەس وداعىنىڭ باتىرى اتاعىنا ۇسىنىلادى. ولار بوريچەۆسكي ا.ي., مەدۆەدەۆ گ.ن., راي ا.م., كرىنين س.م. بۇلاردىڭ بارىنە دە كەڭەس وداعىنىڭ باتىرى اتاعى بەرىلگەن.
اقتوعاي جۇرتشىلىعى قازىبەككە باتىر اتاعى بەرىلگەنى تۋرالى حاباردى ىلە-شالا راديودان ەستىگەن بولاتىن. 1945 جىلدىڭ 19 مامىرىندا ۇلى جەڭىستەن كەيىن سول كەزدەگى توقىراۋىن اۋداندىق (قازىرگى اقتوعاي اۋدانى) "قىزىل تۋ" گازەتىندە قازىبەك نۇرجانوۆقا كەڭەس وداعىنىڭ باتىرى اتاعى بەرىلگەنى جايلى ء«بىزدىڭ باتىر» تاقىرىبىمەن ماقالا جاريالانعان.
قازىبەكتىڭ قازا بولعانى تۋرالى مالىمەتتىڭ گوسپيتالدەن ديۆيزيون باسشىلىعىنا, اسكەري كوميسسارياتتارعا جانە تۋىستارىنا جىبەرىلمەي قالۋى سەبەپتى, باتىر اتاعى بەرىلگەننەن كەيىن سوعىس ۋاقىتىندا جانە 1960 جىلعا دەيىن كسرو قورعانىس مينيسترلىگى ىزدەستىرۋ جۇمىستارىن جۇرگىزىپ كەلگەن. باتىر اتاعىن بەرۋ تۋرالى گراموتا تەك كسرو جوعارعى كەڭەسى پرەزيديۋمىنىڭ توراعاسى ل.برەجنەۆتىڭ قولىمەن 1960 جىلدىڭ 29 قاراشاسىندا تولتىرىلىپ, ياعني, باتىر اتاعى بەرىلگەننەن كەيىن 16 جىلدان كەيىن 1961 جىلدىڭ اقپان ايىندا اقتوعايعا جەتكىزىلىپ اكەسىنە سالتاناتتى تۇردە تابىستالعان. گراموتادا:
"نەمىس باسقىنشىلارىنا قارسى كۇرەس مايدانىندا جاۋىنگەرلىك تاپسىرمالاردى ورىنداۋداعى جەكە ۇلگىسى مەن جانقيارلىق ەرلىگى ءۇشىن قازىبەك بەيسەن ۇلى نۇرجانوۆقا كەڭەستىك سوتسياليستىك رەسپۋبليكالار وداعى جوعارعى كەڭەسى پرەزيديۋمىنىڭ 1945 جىلعى 24 ناۋرىزداعى جارلىعىمەن كەڭەس وداعىنىڭ باتىرى اتاعى بەرىلدى.
جوعارعى كەڭەس پرەزيديۋمىنىڭ توراعاسى ل.ي.برەجنەۆ. 1960 جىل. 29 قاراشا" دەپ جازىلعان.
1944 جىلدان 2010 جىلعا دەيىنگى ارالىقتا, ياعني, 70 جىلداي ۋاقىت كەڭەس وداعىنىڭ باتىرى قازىبەك نۇرجانوۆ تۋرالى جازىلعان دەرەكتەردە باتىردىڭ ۆولكوۆىسك قالاسىنداعى سوڭعى ەرلىگى كورسەتىلىپ, سول جولى باسىنان قاتتى جاراقات الدى دەپ اياقتالاتىن. ونىڭ جەرلەنگەن ورنىن انىقتاۋ ماقساتىندا قازىبەكتىڭ ءوزى وقىعان, ۇستازدىق ەتكەن جانە قازىرگى كەزدەگى ق.نۇرجانوۆ اتىنداعى مەكتەبى وقۋشىلارى, اقتوعاي ەلى ۇزدىكسىز ىزدەستىرۋ جۇمىسىن جۇرگىزىپ كەلگەن بولاتىن. 1985 جىلى اقتوعاي اۋداندىق كومسومول كوميتەتىنىڭ باستاماسىمەن ارنايى قۇرىلعان دەلەگاتسيا بەلارۋس جەرىنە قازىبەكتىڭ مايدانداعى ىزىمەن بارىپ تا قايتقان ەدى. سول ساپار بارىسىندا دەلەگاتسيا مۇشەلەرىنە پ.باگراتيون اتىنداعى مۋزەي قىزمەتكەرلەرى ۇلى جەڭىستىڭ 40 جىلدىعى قارساڭىندا ۆولكوۆىسك قالاسىنىڭ باسپاحاناسىندا 1985 جىلى باسىلىپ شىققان 4 بەتتىك بۇكتەمە كىتاپشادا جانە اۋداندىق "زناميا" گازەتىندە, بۇرىنعى 5-ءشى قىزىل وردەندى ورلوۆتىق اتقىشتار ديۆيزياسى, 142-اتقىشتار پولكىنىڭ اتقىشى, 3-ءشى دارەجەلى داڭق وردەنىنىڭ جانە "ەرلىگى ءۇشىن" مەدالىنىڭ يەگەرى, ورلوۆ وبلىسى, ستارودۋب اۋدانىنىڭ تۇرعىنى, سوعىس ارداگەرى بوريس ليتۆەنكونىڭ ايتۋى بويىنشا جازىلعان "سول تاڭدا جاۋىن جاۋعان ەدى" (ۆ تو ۋترو پروشەل دوجد) اتتى ماقالا جاريالانعاندىعىن (اۆتورى – ۆالەري زاداليا), اتالعان ماقالادا باتىردىڭ مايدانداسى, قارت جاۋىنگەردىڭ ۆولكوۆىسك قالاسىن جاۋدان ازات ەتۋ كەزىندە تەمىرجول ماڭىندا قازىبەك نۇرجانوۆتىڭ باسىنان اۋىر جارالانعانىن جانە دەرەچين سەلوسىنداعى گوسپيتالگە جىبەرىلگەندىگى جونىندە جازىلعاندىعىن حابارلاپ, كىتاپشانىڭ ءبىر داناسىن جەرلەستەرىنە ەسكەرتكىش رەتىندە سىيعا تارتادى.
باتىردىڭ ءىنىسى وزبەك نۇرجانوۆقا 1986 جىلعى 17 مامىردا بەلورۋسسيانىڭ ستارىي قالاسىندا تۇراتىن قازىبەكتىڭ مايدانداس دوسى, جۋرناليست ا.ۆاسيلەۆتەن "قازىبەك ۆولكوۆىسك قالاسىندا جارالانعاننان كەيىن, دەرەچين سەلوسىنداعى گوسپيتالگە الىپ كەتكەن" دەگەن حات كەلەدى. قىسقاسى, بارلىق ىزدەۋ شارالارى دەرەچين سەلوسىنداعى دالا گوسپيتالىنە باعىتتاپ وتىرادى. سول سەبەپتى, اۋداننان بارعان قۇرامىندا باتىردىڭ تۋعان ءىنىسى ءو.نۇرجانوۆ, جازۋشى ق.قالەنوۆ, مايدانداس دوسى ش.سىزدىقوۆ, قوڭىرات سوۆحوزى كومسومول كوميتەتىنىڭ سەكرەتارى ت.جارماعانبەتوۆ, ق.نۇرجانوۆ اتىنداعى مەكتەپتىڭ مۇعالىمى ب.داۋلەتوۆ جانە باتىردىڭ نەمەرە ءىنىسى ت.جاقسى لىق ۇلى بار دەلەگاتسيا دەرەچين دەرەۆنياسىنداعى گوسپيتال ورنالاسقان جەرگە دەيىن بارىپ قايتادى. بىراق, ول ساپاردا باتىردىڭ جەرلەنگەن جەرىن انىقتاۋ مۇمكىن بولماعان ەدى.
2010 جىلى بەلورۋسسيا مەملەكەتتىك ۇلى وتان سوعىسى تاريحى مۋزەيىنىڭ مايدان تاريحى ءبولىمىنىڭ مەڭگەرۋشىسى س.ەزەرسكوي سانكت-پەتەربۋرگ قالاسىنداعى اسكەري-مەديتسينالىق قۇجاتتار ارحيۆىندە ساقتالعان №196 اسكەري دالالىق گوسپيتالدىڭ مەديتسينالىق جۋرنالىن قاراپ وتىرىپ, ءبىر بەتىنەن قارىنداشپەن جازىلعان "1944 جىلعى 24 شىلدەدە اعا سەرجانت كازبەك مۋرجاكوۆ باسىنداعى اۋقىمدى جاراقاتتان قايتىس بولىپ, دەرەچين دەرەۆنياسىنداعى شىركەۋدىڭ قاسىندا جەرلەندى" دەگەن جازۋدى انىقتايدى.
بەلارۋس رەسپۋبليكاسىنىڭ بارلىق اسكەري مۇراجايلارىنىڭ قازىبەكتى ىزدەۋشى "قىزىل ىزشىلەرى" مۋرجاكوۆ بولىپ جازىلىپ كەتكەن, ۆولكوۆىسكىنى ازات ەتۋشى قازىبەك نۇرجانوۆ ەكەندىگىن تولىقتاي دالەلدەگەن.
ەرلىك وشپەيدى, ەر ۇمىتىلمايدى
قازىبەكتىڭ قايتىس بولىپ, جەرلەنگەن جەرى ناقتى 2010 جىلى انىقتالۋىنا سايكەس, سول جىلى بەلارۋس رەسپۋبليكاسىنداعى دەرەچين سەلوسىندا قازىبەككە جانە ونىمەن بىرگە باۋىرلاستار زيراتىندا جەرلەنگەن 199 سولدات پەن وفيتسەرگە اعاشتان جاسالعان ەسكەرتكىش قويىلعان بولاتىن.
2015 جىلى بەلارۋس رەسپۋبليكاسىنداعى قازاقستان رەسپۋبليكاسى ەلشىلىگىنىڭ قىزمەتكەرلەرى ەرعالي بولەگەنوۆ پەن ومىرزاق بەيسپەكوۆتىڭ باستامالارى بويىنشا قاراعاندىلىق كاسىپكەر مۇرات جاداەۆتىڭ قارجىلاي كومەگىمەن ەسكەرتكىشكە قايتا قۇرىلىمداۋ (رەكونسترۋكتسيا) جاسالىپ, جاڭارتىلىپ, مرامورعا باتىردىڭ بەينەسى سالىنىپ, قالعان جاۋىنگەرلەردىڭ دە ەسىمدەرى جازىلىپ, ەلشىلىك قىزمەتكەرلەرىنىڭ قاتىسۋىمەن سالتاناتتى جاعدايدا اشىلعان ەدى.
ۆولكوۆىسك قالاسىندا 1978 جىلدان باستاپ قازىبەك نۇرجانوۆتىڭ قۇرمەتىنە جەڭىل اتلەتيكادان سپورتتىق جارىستار وتكىزىلىپ كەلەدى. اتالعان جارىس 2018 جىلى حالىقارالىق دارەجەدە ۇيىمداستىرىلىپ, وعان اقتوعاي سەلوسىندا تۇراتىن نەمەرە بالاسى مارات نۇرجانوۆ, "كوكبورى-كەرنەي" قورىنىڭ توراعاسى تورەحان مايباس جانە قاراعاندى وبلىستىق جەڭىل اتلەتيكادان مامانداندىرىلعان بالالار مەن جاسوسپىرىمدەر وليمپيادالىق رەزەرۆ مەكتەبىنىڭ وقۋشىلارى دا قاتىسىپ, جۇلدەمەن ورالدى.
ۆولكوۆىسك قالاسىنىڭ ءبىر كوشەسىنە ق.نۇرجانوۆتىڭ اتى بەرىلگەن, قاھارماندار اللەياسىندا ەسىمى جازىلعان.
1965 جىلى ءۇشارال اۋىلىنداعى باتىردىڭ ءوزى وقىپ, جۇمىس ىستەگەن مەكتەبىنە قازىبەك ڭۇرجانوۆتىڭ ەسىمى بەرىلىپ, 1975-1976 وقۋ جىلى مەكتەپ قوڭىرات سوۆحوزىنىڭ ورتالىعىنا (قازىرگى كەزدە – اقتوعاي اۋدانى, جيدەباي سەلولىق وكرۋگى, ساۋلە اۋىلى) جاڭادان سالىنعان مەكتەپكە اۋىستىرىلدى. سول جىلى مەكتەپتىڭ جانىنا ەسكەرتكىشى قويىلدى. اقتوعاي سەلوسىندا ق.نۇرجانوۆتىڭ اتىنداعى كوشە بار, باتىرلار ساياباعىندا ەسكەرتكىشى ورناتىلعان, ءۇشارال اۋىلىندا 2019 جىلى باتىردىڭ 100 جىلدىق مەرەيتويىنىڭ قۇرمەتىنە وراي– ساياباعى اشىلىپ, قاراعاندىنىڭ جەڭىل اتلەتيكا مانەجىنە جانە ءبىر كوشەسىنە ەسىمى بەرىلدى.
1972 جىلى اقىن-جازۋشى جەڭىس قاشقىنوۆتىڭ«قازىبەك نۇرجانوۆ» اتتى وچەركى باسىلىپ شىقتى.
جىل سايىن اۋدان كولەمىندە جانە باتىر اتىنداعى مەكتەپتە قازىبەكتىڭ تۋعان كۇنىنە وراي سپورتتىق جارىستار تۇراقتى ءوتىپ كەلەدى. 2018 جىلى مامىر ايىندا قاراعاندى قالاسىندا باتىر اتىنداعى مەكتەپتىڭ تۇلەگى, ۇلتتىق جەكپە-جەك سپورتى قاۋىمداستىعىنىڭ ۆيتسە-پرەزيدەنتى ن.ءشايحيننىڭ ۇيىمداستىرۋىمەن ق.نۇرجانوۆتى ەسكە الۋعا ارنالعان جەكپە-جەك ۇلتتىق سپورت تۇرىنەن جاستار مەن جاسوسپىرىمدەر اراسىنداعى رەسپۋبليكالىق چەمپيونات وتكىزىلدى. ال 2019 جىلى قاراعاندى قالاسىنداعى جەڭىل اتلەتيكادان وبلىستىق مامانداندىرىلعان بالالار مەن جاسوسپىرىمدەردىڭ وليمپيادالىق رەزەرۆ مەكتەبىندە حالىقارالىق دەڭگەيدەگى جارىس ۇيىمداستىرىلىپ, وعان بەلارۋس مەملەكەتىنەن سپورتشىلار كەلىپ قاتىسىپ, جۇلدەلى ورىندارعا يە بولدى.
قاراعاندى وبىلىسى كولەمىندە جانە تۋعان جەرى اقتوعاي اۋدانىندا 2019 جىلى باتىردىڭ 100 جىلدىق مەرەيتويى كەڭ كولەمدە تويلانىپ ءوتتى, اقتوعاي سەلوسى ورتالىعىنداعى باتىرلار ساياباعى قايتا جاڭارتىلىپ, باتىر اتىنداعى مەكتەپتىڭ جانىنداعى ەسكەرتكىشى قايتادان قويىلدى.
ايدىنعالىي ادامباي,
ق.نۇرجانوۆ اتىنداعى مەكتەپتىڭ تۇلەگى, زاڭگەر,
ۇلپان سەرىك,
ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ "تاريح" فاكۋلتەتىنىڭ ستۋدەنتى
