بەلورۋسسيا استاناسى مينسك قالاسىندا قازاقستان رەسپۋبليكاسىنىڭ مادەنيەت كۇندەرى ءوتتى
قازاقتىڭ ءان-كۇيى الەمنىڭ كەز كەلگەن مەملەكەتىندەگى تاڭداۋلى ساحنالاردا شىرقالىپ ءجۇر. تيىسىنشە, وزگە ەلدەردىڭ مادەنيەتى مەن ونەرىمەن تانىسۋعا بىزدە دە مۇمكىندىك كوپ. جىلىنا كەم دەگەندە 4-5 ەلدىڭ مادەني كۇندەرى ءوز ەلىمىزدە ۇيىمداستىرىلىپ جاتادى. بۇل جولعى بەلورۋسسيا ساپارى قازاقستاندىق ونەر شەبەرلەرىنە تاعى دا ءبىر ۇمىتىلماس اسەر سىيلاپ, جايما-شۋاق دوستىق پەيىلدىڭ ىقىلاسىنا بولەندى دەگەن ويدامىز.
بەلورۋسسيا استاناسى مينسك قالاسىندا قازاقستان رەسپۋبليكاسىنىڭ مادەنيەت كۇندەرى ءوتتى
قازاقتىڭ ءان-كۇيى الەمنىڭ كەز كەلگەن مەملەكەتىندەگى تاڭداۋلى ساحنالاردا شىرقالىپ ءجۇر. تيىسىنشە, وزگە ەلدەردىڭ مادەنيەتى مەن ونەرىمەن تانىسۋعا بىزدە دە مۇمكىندىك كوپ. جىلىنا كەم دەگەندە 4-5 ەلدىڭ مادەني كۇندەرى ءوز ەلىمىزدە ۇيىمداستىرىلىپ جاتادى. بۇل جولعى بەلورۋسسيا ساپارى قازاقستاندىق ونەر شەبەرلەرىنە تاعى دا ءبىر ۇمىتىلماس اسەر سىيلاپ, جايما-شۋاق دوستىق پەيىلدىڭ ىقىلاسىنا بولەندى دەگەن ويدامىز.
قازاقستان مەن بەلورۋسسيا اراسىنداعى مادەني بايلانىستار جىلدان-جىلعا نىعايىپ كەلەدى. ءبىر عانا مىسال. ەلىمىزدە جىل سايىن وتەتىن «وپەراليا» فەستيۆالىنە بەلارۋس مەملەكەتىنەن وپەرا انشىلەرى تۇراقتى تۇردە قاتىسىپ تۇرادى. سونداي-اق, سول ەلدە ۇيىمداستىرىلاتىن «سلاۆيانسكي بازار», «ليستوپاد» فەستيۆالدەرىندە ءبىزدىڭ ونەرپازدار دا باق سىناپ ءجۇر. ال, مادەني كۇندەرگە كەلەر بولساق, ەلىمىزدىڭ مادەني كۇندەرى وسىدان ءتورت جىل بۇرىن مينسك جانە گرودنو قالالارىندا وتكەن بولاتىن. ىلە-شالا 2010 جىلى بەلارۋس مادەنيەتىنىڭ كۇندەرى بىزدە ۇيىمداستىرىلدى.
قازاق ەلى بەلارۋس حالقىمەن كەدەن وداعى اياسىندا دا سەنىمدى سەرىكتەس. سوعان وراي بۇل ەلدە اتقارىلىپ جاتقان ىستەردىڭ ءبىر پاراسىمەن تانىسۋعا تۋرا كەلدى. مينسك قالاسىنا جەتكەن سوڭ قازاقستاندىق باق وكىلدەرى, ياعني, بىزدەر الدىمەن سونداعى توتەنشە جانە وكىلەتتى ەلشىنىڭ كەڭەسشىسى ايدار شالباەۆقا جولىعىپ, ەكى ەلدىڭ قارىم-قاتىناسى تۋرالى ءبىراز جايلارعا قانىقتىق. ءوزىمىزدى قىزىقتىرعان جەرلەرگە باردىق. العاشقى بارعان جەرىمىز بەلورۋسسيا ۇلتتىق تەحنيكالىق ۋنيۆەرسيتەتىندە اشىلعان اباي اتىنداعى قازاق ءتىلى, تاريحى جانە مادەنيەتى ورتالىعى بولدى. ونىڭ جۇمىسىمەن ورتالىقتىڭ جەتەكشىسى, سول ەلدە راديوتەحنيكا ماماندىعى بويىنشا ءبىلىم الىپ جاتقان ماگيسترانت حاميت ابىشەۆ تانىستىردى. ورتالىقتا فوتوكورمەلەر, سەمينارلار, دوڭگەلەك ۇستەلدەر, قازاقستاننىڭ اتاۋلى مەيرامدارىنا وراي مەرەكەلەر ۇيىمداستىرىلادى ەكەن. سونداي مەرەكەنىڭ ءبىرى رەتىندە بيىل تۇڭعىش رەت ءاز ناۋرىز مەيرامى تويلانعان جانە جىل سايىن وتكىزىلۋ قۇقىعىن يەمدەنگەن. ءحاميتتىڭ ايتۋىنشا, ورتالىق ۇيىمداستىرعان تاعى ءبىر ۇلكەن شارا – «تۋروۆسكي, اباي, گۋميلەۆ, كونفۋتسي, بوليۆار, گەتە: زاماناۋي مادەنيەتتىڭ فيلوسوفيالىق ديالوگىنداعى بەلورۋسسيا ءرولى» دەگەن تاقىرىپتا وتكەن عىلىمي كونفەرەنتسيا. بۇل كونفەرەنتسياعا ءبىزدىڭ ەلىمىزدەن دە عالىمدار قاتىسقان.
بەلورۋسسيا ۇلتتىق تەحنيكالىق ۋنيۆەرسيتەتىنىڭ حالىقارالىق ارىپتەستىك بويىنشا پرورەكتورى الەكساندر تسىگانوۆ ورتالىق تۋرالى دا, جالپى ەكى ەلدىڭ عىلىمي تۇرعىداعى بايلانىسى تۋرالى دا كەڭىنەن اڭگىمەلەدى. «سىزدەر ەكى ەلدىڭ كەدەن وداعىندا ارىپتەس ەكەنىن بىلەسىزدەر. سونىڭ اياسىندا ءبىلىم جانە عىلىم سالاسى بويىنشا ارىپتەستىكتىڭ دە ماڭىزى ەرەكشە. ەكى ەلدىڭ باسشىلارى قازاقستان مەن بەلورۋسسيانىڭ دامۋ باعىتى يننوۆاتسيالىق تۇرعىدا بولۋى كەرەكتىگىن ايتىپ ءجۇر. سول باعىتتا ەكى ەلدىڭ عىلىمي-زەرتتەۋ ينستيتۋتتارى مەن الدىڭعى قاتارلى تەحنيكالىق ۋنيۆەرسيتەتتەرى كىرەتىن كونسورتسيۋم قۇرىلدى. كونسورتسيۋمنىڭ باستاماشىلارى – ءبىزدىڭ ۋنيۆەرسيتەت جانە ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى. وسى ۋاقىت ارالىعىندا ەكى فورۋم ءوتتى. ونىڭ ءبىرى مينسك, ەكىنشىسى استانا قالاسىندا ۇيىمداستىرىلدى. ەكى جيىندا دا عىلىمي جوبالار تالقىلانعان بولاتىن. كەيىننەن بۇل جوبالار ەكى ەلدىڭ ءتيىستى مينيسترلىكتەرىنە تانىستىرىلىپ, قازىرگى ۋاقىتتا جوبالار بويىنشا جۇمىستار جاسالىپ جاتىر. ءبىر ايتا كەتەتىن نارسە – ەكى ەلدىڭ دە جوبالارى ءوز قارجىلارىمەن جۇزەگە اسادى. ەكىنشىدەن, باستاماشى بولىپ وتىرعان ەكى جوعارى وقۋ ورنى ءوزارا قارىم-قاتىناستى جاقسارتۋ باعىتىندا دا جۇمىس ىستەپ جاتىر. وقۋ وردامىز تەحنيكالىق بولعانىمەن, ءبىتىرىپ شىققان تۇلەكتەرىمىزدىڭ مادەنيەتتى, زيالى بولعانىن قالايمىز. سوندىقتان وسىندا ءتۇرلى مادەني ورتالىقتار جۇمىس ىستەيدى. ونىڭ ءبىرى – اباي اتىنداعى قازاق ءتىلى, تاريحى جانە مادەنيەتى ورتالىعى. سايكەسىنشە, استاناداعى ەۋرازيا ۇلتتىق ۋنيۆەرسيتەتىندە بەلارۋس مادەنيەتى ورتالىعى ءوز دەڭگەيىندە جۇمىس ىستەپ جاتىر»,–دەدى الەكساندر تسىگانوۆ. ول «اباي» ورتالىعىندا ءتۇرلى كەزدەسۋلەر وتەتىنىن, وعان ەلشىلىك وكىلدەرىنىڭ قاتىساتىنىن, ەلشىنىڭ ءوزى وقۋ ورنىنا بىرنەشە رەت كەلگەنىن ايتىپ ءوتتى. ا.تسىگانوۆ قازاقستان مەن بەلورۋسسيانىڭ ءبىلىم-عىلىم سالاسىندا جاقسى قارىم-قاتىناسقا قول جەتكىزىپ كەلە جاتقانىن مالىمدەدى. ماسەلەن, اتالمىش وقۋ ورنى قاراعاندى تەحنيكالىق ۋنيۆەرسيتەتىمەن تىعىز قارىم-قاتىناس ورناتقان. سول ۋنيۆەرسيتەتتىڭ بازاسىندا ماشينا جاساۋ بويىنشا قۇرال-جابدىقتاردى بەلورۋسسيا تاراپى جەتكىزەتىن ورتالىق قۇرىلعان. قازىرگى تاڭدا ەكى جاق بىرىگىپ جۇمىس ىستەۋدە. «ءبىز جاقىن جىلدارى بيزنەس-ءوندىرىس قۇرۋدى قولعا الۋىمىز كەرەك. ارينە, عىلىمي-زەرتتەۋ باعىتىنداعى جۇمىستار دا كەرەك. بىراق, بۇل ەكى ەل بايلانىسىنىڭ ءبىرىنشى كەزەڭى. ەكىنشى كەزەڭدە بيزنەس-ءوندىرىس قۇرۋ ءىسى دە وتە ماڭىزدى. بۇنى ءبىر جاعىنان مەملەكەت قارجىلاندىرسا, ەكىنشى جاعىنان بيزنەسپەن شۇعىلدانىپ جۇرگەن جەكە تۇلعالار دا ورتاق ىسكە قاراجات سالارى ءسوزسىز. تاعى ءبىر ايتا كەتەتىن نارسە, سوڭعى كەزدە ەۋروپادا ءموبيلدى ستۋدەنت, ءموبيلدى اسپيرانت, ءموبيلدى وقىتۋشى دەگەن جەكە-جەكە باعدارلامالار بار. ەۋرووداق ەلدەرىنىڭ بۇل باعدارلاماسى بويىنشا ءبىر ستۋدەنت كەم دەگەندە ءبىر سەمەستر وزگە ەلدىڭ جوو-سىندا ءبىلىم الۋى شارت. بۇل دۇرىس نارسە. ستۋدەنتتەر باسقا عىلىمي مەكتەپتەرمەن تانىسادى. ءبىز وسى باعدارلامانى قازاقستاندىق ارىپتەستەرگە قولدانىپ جاتىرمىز. قازىرگى تاڭدا بەلورۋسسيا ۇلتتىق تەحنيكالىق ۋنيۆەرسيتەتىنىڭ قۇرىلىس فاكۋلتەتىنە قازاقستاندىق ستۋدەنتتەردىڭ ءبىر توبى كەلدى. ولار جارتى جىل بويى تاجىريبەدەن وتەدى. ءوز كەزەگىندە ءبىز دە ستۋدەنتتەرىمىزدى قازاقستانعا جىبەرۋدى جوسپارلاپ وتىرمىز. ادامدار سولاي تانىسادى. تەك تانىستىقتان سوڭ ارادا سەنىم پايدا بولادى. ءبىز كەڭەس وداعىنان شىقتىق. وداق قۇلاپ قالعانىمەن, دوستىق, ىسكەرلىك, ارىپتەستىك بايلانىستار ساقتالۋ كەرەك دەگەن ويدامىن», – دەيدى پرورەكتور.
قازاقستاندىق باق وكىلدەرىن «زۆيازدا» باسپا ءۇيىنىڭ ديرەكتورى الەس كارليۋكەۆيچ پەن ونىڭ ورىنباسارى الەكسەي باداكتىڭ شىنايى ىقىلاسپەن كۇتىپ العانىن ايتقىمىز كەلەدى. بۇل مەكەمەدە «زۆيازدا» گازەتى, تاعى بىرنەشە رەسپۋبليكالىق جۋرنالدار مەن اۋدارما كىتاپتار باسىلىپ شىعادى ەكەن. «زۆيازداعا» بارعان ماقساتىمىز جۋىردا عانا جارىق كورگەن «نە ۆەدايا گرانيتس» دەپ اتالاتىن قازاقستان مەن بەلارۋس قالامگەرلەرىنىڭ شىعارمالارى جيناقتالعان كىتاپ تۋرالى كەڭىرەك ءبىلۋ بولاتىن. كىتاپتى قۇراستىرۋشى, ديرەكتوردىڭ ورىنباسارى الەكسەي باداك جيناقتىڭ جارىق كورۋىنە اقپارات ءمينيسترىنىڭ ءبىرىنشى ورىنباسارى ليليا ءانانيچتىڭ تىكەلەي ىقپالى تيگەنىن باياندادى. «كەڭەس وداعى تاراعاننان كەيىن 16 مەملەكەت ارقايسىسى بولەك كۇن كەشتى دە, ءبىز ءبىرىمىزدىڭ ادەبيەتىمىزدەن دە الشاقتاپ كەتتىك. تۇركىمەنستانعا بارساق تا, ارمەنياعا بارساق تا, جالپى قاي ەلگە بارساق تا, الدىمىزدان: «بۇرىنعى وداق ەلدەرىنىڭ ادەبيەتى قانداي حالدە؟» دەيتىن ساۋال كولدەنەڭدەيدى. تمد ەلدەرىنىڭ جانە ءوز قالامگەرلەرىمىزدىڭ شىعارمالارىن ورىس تىلىندە شىعارىپ وتىرمىز. ويتكەنى, وداقتاس ەلدەردىڭ وقىرماندارىنا تۇسىنىكتى بولسىن دەيتىن نيەتىمىز بار. وسى كىتاپتاردى شىعارۋ بارىسىندا ءبىر ۇلكەن قيىندىققا جولىقتىق. بۇرىنعى 16 مەملەكەتتىڭ كەيبىر ەلدەرىندە وسى جيىرما جىل ارالىعىندا ورىس تىلىنە اۋدارىلعان شىعارمالار وتە از ەكەن. ال, سىزدەرگە كەلەتىن بولساق, ورىس تىلىندە شىعارمالاردى جيناۋ اسا قيىندىق تۋدىرعان جوق. مىسالى «پروستور» جۋرنالىمەن, جازۋشى الەكسەي كيممەن قارىم-قاتىناسىمىز جاقسى»,– دەدى ا.باداك.
«زۆيازدا» باسپا ءۇيىنىڭ ديرەكتورى الەس كارليۋكەۆيچ داڭقتى جازۋشى مۇحتار اۋەزوۆتىڭ «اباي جولى» رومانىن اناتولي كيمنىڭ اۋدارماسىندا ورىس تىلىندە باسىپ شىعارعاندارىن ايتتى. «جالپى, مۇحتار اۋەزوۆتىڭ «اباي جولى» ەپوپەياسىنىڭ 4 تومى دا بىزدە جاڭادان باسىلىپ شىقتى. ونى بەلارۋس تىلىنە اۋدارۋ الداعى كۇندەردىڭ ەنشىسىندە. ويتكەنى, اناتولي كيم بۇل شىعارمانى ورىس تىلىنە اۋدارۋ ءۇشىن ءبىر جىل عانا ەڭبەكتەنبەگەنى شىندىق. «نە ۆەدايا گرانيتس» جيناعىنا كەلەتىن بولساق, ورىس تىلىندە جارىق كورگەن بۇل كىتاپقا قازاقتىڭ مۇحتار اۋەزوۆ, ولجاس سۇلەيمەنوۆ, ءابىش كەكىلباەۆ, مۇقاعالي ماقاتاەۆ, قادىر مىرزاليەۆ, فاريزا وڭعارسىنوۆا, نۇرلان ورازالين, تاعى باسقا دا بىرقاتار تالانتتى قالامگەرلەرىنىڭ شىعارمالارى توپتاستىرىلدى. جيناقتىڭ ءبىرىنشى بولىگىندە قازاق قالامگەرلەرىنىڭ شىعارمالارىنا ورىن تيسە, ەكىنشى بولىگى بەلارۋس قالامگەرلەرىنىڭ شىعارماشىلىعىنا ارنالعان. ءبىز ازەربايجان, ارميان, تۇركىمەن, ت.ب ەلدەردىڭ قالامگەرلەرىنىڭ شىعارمالارى توپتاستىرىلعان تۋرا وسىنداي تاعى دا 10 جيناق شىعاردىق. بۇل ارادا بەلگىلى اۋدارماشى قايرات باقبەرگەنوۆكە العىس ايتقىمىز كەلەدى. ول بىزگە اباي ولەڭدەرىن بەلارۋس تىلىنە اۋدارۋعا ۇلكەن كومەگىن تيگىزدى. ەكىنشىدەن, وسى جيناقتاعى قازاق اۆتورلارىنىڭ شىعارمالارىن قۇراستىرۋعا كومەكتەستى»,–دەدى ا.كارليۋكەۆيچ.
قازاقستاندىق جۋرناليستەر مينسكىدەگى جازۋشىلار وداعىندا بولىپ, وداق توراعاسى نيكولاي چەرگينەتسپەن كەزدەستى. ول ءوز كەزەگىندە قازاقستان پرەزيدەنتى ن.ءا.نازارباەۆتىڭ ۇلكەن جيىنداردا ەكى ەلدىڭ تاۋار اينالىمىنا, مادەني بايلانىستارىنا ەشقانداي دا كەدەرگى بولماۋ كەرەك دەگەندى سوناۋ 90-شى جىلداردان باستاپ ايتىپ كەلە جاتقانىن, سوڭعى جىلدارى قۇرىلعان كەدەن وداعىنىڭ دۋالى اۋىزدان شىققان ءسوزدىڭ ناتيجەسى ەكەنىن بايانداي كەلىپ, قازاقستان دا, بەلورۋسسيا دا ەكونوميكالىق ءھام الەۋمەتتىك ماسەلەلەردى شەشۋ تۇرعىسىندا الىسقا ۇزاپ كەتكەنىن اڭگىمەلەدى. «ءبىز قازاقستانعا ءتۇرلى تەحنيكالار, اۆتوموبيلدەر مەن جەر وڭدەۋ تەحنيكالارىن جىبەرەمىز. ءوز كەزەگىندە قازاقستاننان دا ءتۇرلى تاۋارلار الىپ وتىرمىز. بۇل ءبىر-ءبىرىمىزدى قولداپ, قۋاتتاپ جاتقانىمىزدىڭ ايعاعى. ال, ادەبيەت مادەني بايلانىستىڭ ءبىر عانا بولشەگى. رەسمي تۇردە ايتار بولسام, بەلورۋسسيادا قازاقستاننىڭ جوق دەگەندە بەس كىتابىن شىعارۋ جوسپاردا بار. بۇعان تولىقتاي مۇمكىندىگىمىز جەتەدى. ويتكەنى, قازاقستاننىڭ جازۋشىلار وداعىمەن بايلانىسىمىز جاقسى جولعا قويىلعان», – دەيدى بەلورۋسسيا جازۋشىلار وداعىنىڭ توراعاسى.
قازاقستاننىڭ بەلورۋسسياداعى مادەنيەت كۇندەرى اياسىندا مادەنيەت جانە اقپارات ءمينيسترى مۇحتار قۇل-مۇحاممەدتىڭ مينسكىدەگى بىرقاتار مادەنيەت وشاقتارىندا بولعانىن دا اتاپ ايتۋىمىز كەرەك. سونىڭ ءبىرى – مينسكىدەگى ۇلتتىق اكادەميالىق وپەرا جانە بالەت تەاترى. مۇحتار ابرار ۇلى وسى ەلدىڭ مادەنيەت ءمينيسترى بوريس سۆەتلوۆپەن, ۇلتتىق اكادەميالىق وپەرا جانە بالەت تەاترىنىڭ باس ديرەكتورى ۆلاديمير گريديۋشكومەن بىرگە ەكىجاقتى كەلىسىمدەرگە قول قويدى. رەسمي حاتتامادان كەيىن مادەنيەت جانە اقپارات ءمينيسترى مۇحتار قۇل-مۇحاممەد ەكى ەلدىڭ ءباسپاسوز وكىلدەرىنىڭ سۇراقتارىنا جاۋاپ بەردى. «بەلورۋسسيا مەن قازاقستاننىڭ بايلانىسى تامىرىن تەرەڭگە جىبەرگەن, ەل باسىنا كۇن تۋعان اۋىر شاقتا سىنالعان, تاريحتىڭ سۇزگىسىنەن وتكەن بەكەم بايلانىس. ءبىز وسىنداعى ورتالىق الاڭدا بولدىق. ول جەردەن كەڭەس وداعىنىڭ باتىرى اتانعان ونشاقتى قازاقستاندىق ازاماتتاردىڭ اتى-ءجونىن كەزدەستىردىك. سۇندەتقالي ەسقاليەۆ باستاعان قازاقتاردىڭ مينسك قالاسىن جاۋدان بوساتۋ ءۇشىن شايقاسىپ, ەرلىك كورسەتكەنىن تاريح ۇمىتپايدى. جالپى, ارىپتەستىكتى ۇزدىكسىز دامىتۋعا مۇمكىندىگى مول بىردەن-ءبىر سالا دەپ مادەنيەتتى اتار ەدىم. شىن مانىندە ەكى ەل اراسىنداعى بايلانىستاردىڭ توقتاپ قالعان كەزى جوق. كەڭەس ۇكىمەتى كەزىندە دە, تاۋەلسىزدىك العان جىلدارى دا بۇل بايلانىستار جالعاسىپ كەلەدى»,–دەدى مادەنيەت جانە اقپارات ءمينيسترى. ول سونداي-اق, مادەني بايلانىستار ءتۇرلى دەڭگەيدە دامىپ كەلە جاتقانىن, سونىڭ ىشىندە ەكى ەل تەاترلارى, مۇراعاتتارى مەن مۇراجاي ۇجىمدارىنىڭ جاقسى قارىم-قاتىناستا ەكەنىن ءسوز ەتتى. «مىنە, ۇلى جەڭىستىڭ جەتپىس جىلدىعى قارساڭىندا مۇراعات دەڭگەيىندەگى تىعىز ارىپتەستىك بايلانىستىڭ ارقاسىندا ءتۇرلى جۇمىستار اتقارىلىپ جاتىر. ءبىز جىل سايىن جاڭا مۇراعات دەرەكتەرىمەن تانىسۋدامىز. بەلورۋسسياداعى شايقاستا حابارسىز كەتكەن سولداتتاردىڭ قاتارىندا بولعان اكەلەرىمىز بەن اتالارىمىزدىڭ اتى-جوندەرى جازىلعان دەرەكتەرمەن جەتپىس جىلدان اسا ۋاقىت وتكەن سوڭ قايتا قاۋىشۋ ۇستىندەمىز»,–دەدى مينيستر.
قازاقستان مەن بەلورۋسسيانىڭ نىق قارىم-قاتىناسىنىڭ ايعاعىنداي, وتكەن اپتادا عانا سول ەلدىڭ پرەزيدەنتى ا.لۋكاشەنكونىڭ استاناعا رەسمي ساپارمەن كەلىپ, ەكونوميكالىق بايلانىستان باستاپ مادەني گۋمانيتارلىق بايلانىسقا دەيىن قامتىلعان كەلىسىمشارتتارعا قول قويعانى ەستە. اراعا اپتا ارالاتىپ قانا قازاقستاندىق دەلەگاتسيا مينسكىگە بارىپ, مادەنيەت كۇندەرىن وتكىزدى. بۇل كۇندەردىڭ اياسىندا قازاقستاندىق ونەر شەبەرلەرىنىڭ بەلارۋس مەملەكەتتىك اكادەميالىق مۋزىكا تەاترىنىڭ ساحناسىندا گالا-كونتسەرتى ءوتتى.
كونتسەرتتىك باعدارلاما بارىسىندا ونەرپازدار قازاق حالقىنىڭ مۋزىكا مادەنيەتىنىڭ, بي ونەرىنىڭ الۋان تۇرلىلىگىن پاش ەتۋگە تىرىستى. مينسك تەاترىندا حالىق ءارتىسى روزا رىمباەۆا, ەڭبەك سىڭىرگەن قايراتكەرلەر بيبىگۇل جانۇزاق, ءجاميلا جارقىمباەۆا, نۇرلان بەكمۇحامبەتوۆ, اندرەي ترەگۋبەنكولار ءان شىرقاسا, «سازگەن سازى» فولكلورلىق-ەتنوگرافيالىق ءانسامبلى, « ۇلىتاۋ» توبى, «سەرپەر» دومبىراشىلار ءانسامبلى مەن «اققۋ» بي انسامبلدەرى قازاقتىڭ بي جانە كۇي ونەرىنىڭ شوقتىقتى شىعارمالارىن ورىندادى. بۇل ساحنادا قازاقتىڭ حالىق اندەرىمەن قوسا قۇرمانعازىنىڭ, ابايدىڭ جانە لاتيف ءحاميديدىڭ شىعارمالارى تىڭدارمانداردىڭ جۇرەگىنە جول تارتتى. سونداي-اق, الەمدىك كلاسسيكا ساناتىنداعى ا.ۆيۆالدي جانە ش.گۋنونىڭ اۋەندەرىن قازاقستاندىق ونەر شەبەرلەرىنىڭ ورىنداۋىندا بەلارۋس جۇرتى جىلى قابىلدادى.
قوناقجاي بەلارۋس حالقى قازاقستاندىق ونەر شەبەرلەرىنىڭ كونتسەرتىن ىستىق ىقىلاسپەن, قول سوعا وتىرىپ تاماشالادى. تىڭدارمانداردىڭ اراسىندا قازاقستاننىڭ مادەنيەت جانە اقپارات مينيسترى مۇحتار قۇل-مۇحاممەد جانە بەلارۋس رەسپۋبليكاسىنىڭ مادەنيەت مينيسترى بوريس سۆەتلوۆ, قازاقستاننىڭ بەلورۋسسياداعى توتەنشە جانە وكىلەتتى ەلشىسى ەرعالي بولەگەنوۆ باستاعان ەلشىلىك قىزمەتكەرلەرى, قازاقستاندىق دياسپورا وكىلدەرى دە بولدى. ءسوز سوڭىندا ايتارىمىز, قازاقستاننىڭ بەلورۋسسياداعى مادەنيەت كۇندەرىن قورىتىندىلاعان گالا-كونتسەرت دوستىعى جاراسقان ەكى ەل تىڭدارماندارىنىڭ دا رۋحاني الەمىنە جاڭاشا قۋات, تىڭ سەرپىن سىيلاعانداي اسەر ەتتى.
ايگۇل سەيىلوۆا,
«ەگەمەن قازاقستان».
–––––––––––––––––––––––
سۋرەتتەردى تۇسىرگەن
باۋىرجان جۋاسباەۆ.
