الداعى دۇيسەنبى كۇنى الماتىداعى بالۋان شولاق اتىنداعى سپورت سارايىندا بوكستان الەمنىڭ XVII چەمپيوناتى باستالادى. ۇزىن-ىرعاسى 13 كۇن بويى وڭتۇستىك استانانىڭ تۇڭدىگىن جەلپىلدەتەتىن بۇل سايىس قازاننىڭ 26-سى كۇنى ءوز مارەسىنە جەتەدى.
الداعى دۇيسەنبى كۇنى الماتىداعى بالۋان شولاق اتىنداعى سپورت سارايىندا بوكستان الەمنىڭ XVII چەمپيوناتى باستالادى. ۇزىن-ىرعاسى 13 كۇن بويى وڭتۇستىك استانانىڭ تۇڭدىگىن جەلپىلدەتەتىن بۇل سايىس قازاننىڭ 26-سى كۇنى ءوز مارەسىنە جەتەدى.
قازاقستان بۇرىنعى كەڭەس رەسپۋبليكالارى ىشىندەگى بىلعارى قولعاپ شەبەرلەرىنىڭ جاھاندىق جارىسىن قابىلداپ وتىرعان ەكىنشى ەل بولعالى تۇر. مۇنىڭ الدىندا عانا مۇنداي سايىستىڭ ازەربايجان استاناسى – باكۋ قالاسىندا وتكەنى بەلگىلى. جالپى, كەشەگى كەڭەستىك كەزەڭدى قوسا ەسەپتەگەندە, بۇل ءبىزدىڭ اۋماقتاعى ءۇشىنشى سايىس بولىپ تابىلادى. ولاردىڭ ءبىرىنشىسى رەسپۋبليكالار ءالى وداقتان ەنشىلەرىن الماعان 1989 جىلى ماسكەۋدە وتكىزىلگەن بولاتىن. سودان بەرى بۇل قۇرمەتكە قول جەتكىزگەن باسقا پوستكەڭەستىك مەملەكەت جوق. وسىنىڭ ءوزى الاتاۋدىڭ باۋرايىندا شارشى الاڭدى شايقايتىن باسىرەلى باسەكەنىڭ ءباسى قانشالىقتى جوعارى ەكەنىن اڭعارتسا كەرەك. ءدال بۇگىنگى تاڭعا مۇندا كەلۋگە 110 ەلدىڭ 567 بوكسشىسى كەلىسىم بەرىپ قويدى. راس, وسىنىڭ الدىندا 116 ەلدەن 576 ساڭلاقتىڭ كەلەتىنى تۋرالى اقپار تاراعان بولاتىن. ەگەر سول مەجە بەلگىلەنسە, ول وسىنىڭ الدىنداعى باكۋ رينگىندەگى رەكوردتىڭ جاڭارعانىن بىلدىرەتىن ەدى. ال حازار تەڭىزىنىڭ يىنىندەگى شاھاردا 2011 جىلى 113 ەلدىڭ 570 بوكسشىسى جۇلدەلى ورىندار ءۇشىن جان بەرىپ, جان الىسقان كەسكىلەسكەن شايقاستار وتكىزگەن. بىراق سوڭعى ساتتە الماتىدا پلانەتا بوكسشىلارىنىڭ ءبىرىنشى رەت ءىرى حالىقارالىق جارىستى شلەمسىز, ياعني قورعانىش باس كيىمىنسىز وتكىزەتىنى تۇبەگەيلى شەشىلدى دە, مۇندا كەلۋگە نيەتتىلەردىڭ قاتارلارى ءسال دە بولسا سيرەپ قالدى.
دەگەنمەن, بۇل چەمپيونات قاتىسۋشى ەلدەرى مەن سپورتشىلارىنىڭ سانى بويىنشا ەڭ ۇزدىك كورسەتكىشكە قول جەتكىزبەگەنمەن, كوپ جىلدارعى ۇزىلىستەن كەيىن شايقاستى قايتادان شلەمسىز وتكىزۋدى باستاعان دودا رەتىندە تاريحتا قالاتىن بولادى. ونىڭ ۇستىنە, بۇل الامانعا قاتىسۋشى نەگىزگى بوكس دەرجاۆالارىنىڭ ءبارى دە وزدەرىنىڭ قازىرگى تاڭداعى ەڭ كۇشتى قۇرامدارىمەن كەلگەلى وتىر. مۇندا وتكەن چەمپيونات پەن لوندون وليمپياداسىندا جۇلدەلى ورىنداردان كورىنگەندەردىڭ دەنى كەلگەلى تۇر. مىسالى, كۋبانىڭ البيون جەرىندە چەمپيون اتانعان تارلاندارى روبەيسي راميرەس پەن روسنيەل يگلەسياستى, سونداي-اق, يرلاند ليۋك كەمپبەللدى ءبىز وسىندا دا كورەمىز. راس, التىن مەدالدىڭ قالعان يەگەرلەرى بولا قويمايدى. سەبەبى, ءبىزدىڭ سەرىك ساپيەۆ بۇل كەزگە دەيىن بوكستى اياقتاسا, زوۋ شيمين (قىتاي), ريوتو مۋراتا (جاپونيا), ۆاسيلي لوماچەنكو, الەكساندر ۋسيك (ەكەۋى دە – ۋكراينا), ەنتوني دجوشۋا (انگليا), ەگور مەحونتسەۆ (رەسەي) سىندى چەمپيوندار كاسىپقويلار ساپىنا اۋىسىپ كەتتى.
ەندى قازىرگى قازاقستان قۇراماسى جونىندە بىرەر ءسوز. ول تۇگەلگە جۋىق بيىل يوردانيادا وتكەن ازيا چەمپيوناتىنا قاتىسقان قۇراممەن جاساقتالدى. مۇندا تەك اسا جەڭىل سالماقتا (49 كگ) قۇرلىق چەمپيونى اتانعان تەمىرتاس ءجۇسىپوۆتى 2010 جىلعى ازيا ويىندارىنىڭ كۇمىس جۇلدەگەرى ءبىرجان جاقىپوۆ الماستىردى. قالعان سالماق دارەجەلەرى بويىنشا ەلىمىزدىڭ نامىسىن اممان رينگىندە اتوي سالعان ءىلياس سۇلەيمەنوۆ (52 كگ), قايرات ەراليەۆ (56 كگ), بەرىك ءابدىراحمانوۆ (60 كگ), مەرەي اقشالوۆ (64 كگ), دانيار ەلەۋسىنوۆ (69 كگ), جانىبەك ءالىمحان ۇلى (75 كگ), ادىلبەك نيازىمبەتوۆ (81 كگ), انتون پينچۋك (91 كگ) جانە يۆان دىچكو (+91 كگ) قورعايدى.
ءبىز الداعى اپتادان باستاپ گازەت بەتىندە وسى چەمپيونات جايلى ارنايى توپتامالار بەرە باستايمىز. سونىمەن بىرگە, بىرىنشىلىك بارىسىنداعى ءتۇرلى جاڭالىقتاردى egemennews.kz سايتى ارقىلى ساعات سايىن دەرلىك بەرىپ تۇراتىن بولامىز.
ىسكە ءسات, جىگىتتەر!
سەرىك ءپىرنازار,
«ەگەمەن قازاقستان».
