ايماقتار • 06 شىلدە، 2020

ورداباسى اۋدانىندا 85 كانال ارقىلى 33 131 گەكتار سۋارمالى جەر يگەرىلەدى

27 رەت كورسەتىلدى

تۇركىستان وبلىسى، ورداباسى اۋدانىنداعى اۋىل وكرۋگتەرىندە جاز ايلارىندا ەگىستىك جەرلەرگە سۋ جەتكىزۋ جىلدار بويى وزەكتى ماسەلەگە اينالىپ كەلگەن-ءدى. وسى پروبلەمانى تۇبەگەيلى شەشۋ ءۇشىن بادام وزەنىنە بوگەت قويىپ، ۇزىندىعى 4،2 شاقىرىم جاڭا كانال قازىپ، "قاراسپان ماگيسترالدى" كانالىنا سۋ جىبەرۋ ارقىلى 2 664 گەكتار جەرگە سۋ جەتكىزىلمەك.

ءسويتىپ بەيسەن، جاڭاتۇرمىس، اقجول، ماقتاشى، سارىارىق، جۇلدىز ىنتىماق، مادەنيەت، سەمحوز ەلدى مەكەندەرىندە ەگىستىك جەردى سۋمەن قامتاماسىز ەتۋ جاقسارىپ، اۋىل شارۋاشىلىعى ءونىمى ارتاتىن بولادى.

"جالپى اۋدان بيۋدجەتىنەن بولىنگەن 91 ملن تەڭگەگە ءبورجار، بادام، قاراسپان، شۇبار اۋىل وكرۋگتەرىندە كانالداردى، ارىق-اتىزداردى مەحانيكالىق تازالاۋ جۇمىستارى جۇرگىزىلۋدە. قىركۇيەككە دەيىن 4 اۋىل وكرۋگىندەگى 5 كانال تولىق تازارتىلاتىن بولادى"، دەيدى اۋدان اكىمى نۇربول تۇراشبەكوۆ.

بۇگىنگى تاڭدا اۋدان كولەمىندە ەگىستىك جەرلەردى اعىن سۋمەن قامتاماسىز ەتىلۋىن جاقسارتۋ، شىلدە ايىندا سۋ جەتپەي قالۋ قاۋپىن سەيىلتۋ ماقساتىندا بىرقاتار كانالدارعا دەمەۋشىلەر ەسەبىنەن دە مەحانيكالىق تازالاۋ جۇمىستارى جۇرگىزىلۋدە. وسىنداي جۇمىستار جۇرگىزىلىپ جاتقان 380،9 شاقىرىمدى قۇرايتىن 43 كانالدا بۇگىندە 7 دانا تەحنيكا جۇمىس ىستەۋدە. ال قاراسپان اۋىل وكرۋگىندە 905 اگروقۇرىلىم 4 731 گەكتار سۋارمالى جەر كولەمىن پايدالانۋدا.

ونىڭ ىشىندە "قاراسپان ماگيسترالدى" كانالى ارقىلى جالپى ۇزىندىعى 80 شاقىرىم بولاتىن 17 ىشكى كانالدارمەن اۋىل شارۋاشىلىعىنداعى 4 258 گەكتار جەر سۋارىلادى. قالعان 473 گەكتارعا قاجىمۇقان اۋىل وكرۋگىنە قاراستى "قۇرتاي" كانالى ارقىلى جانە ناسوستار ارقىلى سۋ جەتكىزىلەدى. جالپى اۋدان بويىنشا 871 شاقىرىم بولاتىن 85 كانال ارقىلى 33 131 گەكتار اۋىل شارۋاشىلىعى ماقساتىنداعى سۋارمالى جەر يگەرىلمەك.

 

تۇركىستان وبلىسى

سوڭعى جاڭالىقتار

ۇقساس جاڭالىقتار