پاۆلودار اكىمى قايرات نۇكەنوۆ پاۆلودارلىقتاردى ەكى بىردەي مەرەيلى كۇنمەن قۇتتىقتادى.
"كەلە جاتقان استانا كۇنىمەن شىن جۇرەكتەن قۇتتىقتايمىن", - دەيدى قايرات نۇكەنوۆ. – مەملەكەتىمىزدىڭ باستى ماقساتى – حالىقتىڭ ءال-اۋقاتىن كوتەرۋ. قازىرگى ۋاقىتتا الەۋمەتتىك جاڭعىرتۋ ماسەلەسىنە ەرەكشە نازار اۋدارىلعان. مىنە, بۇگىنگى ءۇيدىڭ اشىلۋى – تۇرعىن ءۇي ساياساتىمىزدىڭ ماڭىزدى ناتيجەسى. شاڭىراقتارىڭىز ارقاشان جاقسىلىققا تولا بەرسىن. بارلىقتارىڭىزعا ىرىس, باق-بەرەكە تىلەيمىن.
قالالىق قارجى ءبولىمى باسشىسىنىڭ ورىنباسارى اسىعات احمەتوۆتىڭ ايتۋىنشا, باسپانالى بولعان 72 ادامنىڭ 27-ءسى – جەرگىلىكتى اتقارۋشى ورگاندار وكىلدەرى. قالعاندارى – "تۇرعىن ءۇي قۇرىلىس جيناق بانكىنىڭ" سالىمشىلارى.
بۇگىن قونىس تويىن تويلاعان 3-قالالىق اۋرۋحانانىڭ ساۋلەلى دياگنوستيكا دارىگەرى مەيىرجان ماشراپوۆ قالا باسشىلىعىنا ريزاشىلىعىن ءبىلدىردى.
"بۇل ءومىرىمىزدىڭ ەڭ باقىتتى ساتتەردىڭ ءبىرى", - دەيدى ول. – اكىمدىك پەن "تۇرعىن ءۇي قۇرىلىس جيناق بانكىنە" مەملەكەتتىك باعدارلاماعا قاتىسىپ, سول ارقىلى ءبىر بولمەلى پاتەردىڭ يەسى بولعانىمىزعا العىس ايتامىز. وسىناۋ قيىن-قىستاۋ زاماندا ءۇي قۇرىلىسىنا اتسالىسقان ازاماتتارعا دا ريزامىز. دارىگەر رەتىندە بارلىقتارىڭىزعا زور دەنساۋلىق تىلەيمىن.
ايتا كەتەيىك, "سارىارقا" مولتەك اۋدانىندا بوي كوتەرگەن جاڭا ءۇي 72 پاتەردەن تۇرادى. ولاردىڭ 36-سى ءبىر, 18 – ەكى جانە قالعان 18-ءسى ءۇش بولمەلى پاتەرلەر.
