كاسىپقويلار اراسىندا اسا اۋىر سالماقتاعى ءابسوليۋتتى الەم چەمپيونى ۆلاديمير كليچكو بيىلعى جىلى ءۇش شايقاس وتكىزۋدى مەجەلەگەن ەدى. جىل باسىنان بەرى سولاردىڭ ەكەۋى ءوتتى. ال سوڭعىسىن اعايىندى كليچكولاردىڭ كوپ جىلداردان بەرگى ارىپتەسى - RTL تەلەارناسى جەلتوقسان ايىنىڭ 14-ءى كۇنى كورسەتەتىن بولىپ جوسپارلاپ قويعان بولاتىن.
بىراق بۇل شايقاستىڭ وتپەي قالاتىن ءتۇرى بار. سەبەبى, جاقىندا گولليۆۋدتىڭ 24 جاسار اكتريساسى حەيدەن پانەتتەريگە «قۇدا ءتۇسىپ, سىرعا تاعىپ» قويعان 37 جاسار ۋكراين بوكسشىسى ۆلاديمير كليچكو بولاشاق جارىنىڭ تالابىنا ساي ۇيلەنۋ تويىنىڭ قامىنا كىرىسىپ, بۇل ماتچتان باس تارتاتىن سياقتى.
«ۆزگلياد» پورتالىنىڭ اقپارىنا قاراعاندا, امەريكالىق كينو جۇلدىزىمەن بولاتىن بۇل ۇيلەنۋ تويى تۋرا 14 جەلتوقسان كۇنى وتەتىن كورىنەدى. الايدا, وسى جەردە كۇيەۋ جىگىت پەن قالىڭدىقتىڭ اراسىندا ءبىر عانا كەلىسپەۋشىلىك بولۋى مۇمكىن. بۇلاي بولاتىنى, ۆلاديمير نەكەلەسۋ ءراسىمىنىڭ كيەۆتە وتكەنىن قالاسا, حەيدەن اقش-تا بولعانىن قولاي كورىپ وتىر.
دەگەنمەن, بۇلاردىڭ ءبىر-بىرىنە جول بەرەتىن دە ۆاريانتى بار. مىسالى, تويدى ۋكراينادا وتكىزسە, ءبىر اپتادان كەيىن سالتاناتتى مۇحيتتىڭ ارعى جاعالاۋىندا جالعاستىرادى.
سوسىن جاس جۇبايلار ءۇشىن بال ايى ورنايدى. ولاي بولسا, ءۆلاديميردى 2014 جىلدىڭ ناۋرىزىنان بۇرىن شارشى الاڭنان كۇتۋ اۋرەشىلىك بولادى.
مۇرات ايتقوجا.
