توتەنشە جاعداي توقتاعاننان كەيىن بوساڭسىپ كەتكەنىمىز راس. سونىڭ سالدارىنان ۆيرۋستىڭ ودان سايىن ورشۋىنە جول بەرىپ قويدىق. اينالامىزدا وسى بالەكەتكە ۇشىراپ, اۋىرىپ قالعان ادامداردى ءجيى كەزدەستىرىپ جاتىرمىز. بۇل ىندەت تۋعان-تۋىستارىمىز, دوستارىمىز, ارىپتەستەرىمىز, كورشىلەرىمىز – بارىنە جەتىپ ۇلگەردى. سوندىقتان قوعامنىڭ بۇتىندىگى, ەلدىڭ تۇراقتىلىعى ءۇشىن ەنگىزىلىپ جاتقان قاتاڭ كارانتين شارالارى وتە دۇرىس قادام دەپ بىلەمىن. شەكتەۋ شارالارى ەكونوميكامىزعا بارىنشا زيان كەلتىرمەيتىندەي, جان-جاقتى ماسەلەلەردى تەرەڭ تالداعاننان كەيىن قابىلدانىپ وتىر.
ءبىزدىڭ حالىق وسى زامانعا دەيىن باسىنان قانشاما ناۋبەتتى وتكىزدى. تالاي تار جول, تايعاق كەشۋدەن بىرلىگىمىزدىڭ, توزىمدىلىگىمىزدىڭ ارقاسىندا وتتىك. ءبىر ءۇيدىڭ بالاسىنداي ءبىر بىرىمىزگە جاناشىر, تىرەك بولا بىلسەك, كەز كەلگەن قيىنشىلىقتى ەڭسەرەمىز. «تارتىپكە باعىنعان ەل قۇل بولمايدى» دەگەن باۋىرجان مومىش ۇلى اتامىزدىڭ دانا ءسوزى بار عوي. بۇگىنگى تاڭدا تەمىردەي تارتىپكە بويۇسىنىپ, قاۋىپسىزدىك تالاپتارىن قاتاڭ ۇستانۋىمىز كەرەك. سوندا عانا بۇل تىعىرىقتان شىعىپ, بولاشاعىمىز جارقىن بولادى.
شەرزود پۋلاتوۆ,
قازاقستان حالقى اسسامبلەياسى توراعاسىنىڭ ورىنباسارى
