وندىرىستە اراقاشىقتىقتى ساقتاۋ اسا ماڭىزدى

كارانتيننىڭ كۇشەيتىلۋىنە 24 ماۋ­سىم كۇنى ۆيرۋس جۇقتىرعاندار سانى 25،4%-عا، ال اپتا كولەمىندە 16،6%-عا ارتقانى سەبەپ بولدى. قاۋلىعا سايكەس، 27 ماۋسىمنان باستاپ كولىك قوزعالىسى شەكتەلىپ، تۇرعىندار تەك رۇقساتتاما ارقىلى كوشەگە شىعۋدا. قوعامدىق كولىكتەر جۇمىس كۇندەرى 50%-عا قىسقارتىلسا، دەمالىس پەن مەرەكە كۇندەرىندە مۇلدە جۇرمەۋدە. بىراق بۇل كوروناۆيرۋس كەسەلىنە قان­شالىقتى توسقاۋىل بولا الدى؟ وكىنىشكە قاراي، بويىندا قاۋىپتى دەرت تابىلىپ، اۋرۋحانالارعا ءتۇسىپ جاتقان ناۋقاستار ءالى دە بارشىلىق. جۇرتتىڭ كوبى قوعامدىق ورىنداردا ماسكا كيمەي، الەۋمەتتىك قاشىقتىقتى ساقتاماي، رەسپيراتورلىق اۋرۋدىڭ بەلگىلەرى پايدا بولعان كەزدە بىردەن مەديتسينا قىزمەتكەرىنە حابارلاسپايدى ەكەن. وبلىس بويىنشا COVID-19 جۇقتىرعانداردىڭ ءوسۋ قارقىنى وتكەن اپتادا 8%-عا جەتكەن. ال وسكەمەندە بۇل كورسەتكىش ايماقتىق دەڭگەيدەن جوعارى، ياعني 9،9% قۇراپ وتىر.

وبلىستىڭ باس پۋلمونولوگ دارىگەرى زاعريپا ابديەۆانىڭ ايتۋىنشا، قازىرگى ۋاقىتتا وسكەمەندەگى اباي جانە شا­كارىم داڭعىلدارىندا ورنالاسقان ستاتسيونارلار 80-90%-عا تولىپ كەتكەن. وسىعان وراي، 29 ماۋسىمدا قوسىمشا 50 ورىندىق گوسپيتال جۇمىسىن باستادى.

«بارلىق قاجەتتى جابدىقتارمەن قامتاماسىز ەتىلگەن سول مەديتسينالىق مەكەمەدە 50 ناۋقاستى قابىلداي الامىز. ەشقانداي سيمپتوم بايقالماعان نەمەسە جەڭىل فورمادا اۋىرعان پاتسيەنتتەر ءۇي كارانتينىنە وقشاۋلانۋدا. ال ورتاشا جانە اۋىر دەڭگەيدەگى ناۋقاستار ستاتسيونارلارعا جاتقىزىلۋدا. ايماق حالقىن سابىر ساقتاپ، دۇربەلەڭگە سالىنباۋعا شاقىرامىن. ەگەر سىزدە جۇقپالى دەرتتىڭ قانداي دا ءبىر بەل­گىلەرى بايقالسا، ءوز بەتىڭىزبەن ەمدەلۋ جولدارىن ىزدەمەي، مەكەنجايىڭىز بويىن­شا وتباسىلىق امبۋلاتورياعا حابارلاسىڭىز. ءار امبۋلاتوريادا ارنايى ماماندار ازىرلەنگەن. ولار ۇيىڭىزگە كەلىپ، سىزدەن COVID-19-عا سىناما الىپ، ۇدايى باقىلاۋ جۇرگىزەدى. ەگەر ۆيرۋس انىقتالىپ جاتسا، ءتيىستى شارالار قابىلدانادى»، دەيدى ول.

ءوندىرىس ورىندارىندا سانيتارلىق تالاپتاردىڭ قانشالىقتى ساقتالعانىن ءبىلۋ ءۇشىن KAZ Minerals توبى كورپو­راتيۆتىك دەپارتامەنتىنىڭ مەنەدجەرى ەرمەك دۇزكەنوۆكە حابارلاسىپ كورگەن ەدىك. مىس وندىرەتىن ءىرى كومپانيادا باقىلاۋ-وتكىزۋ رەجىمى بارىنشا كۇ­شەيتىلگەن.

ء«بىز بارلىق الدىن الۋ شارالارىن قابىلداۋعا تىرىستىق. بوگدە ادامدار كاسىپورىن اۋماعىنا جىبەرىلمەيدى، قىز­مەت­كەرلەردىڭ دەنە قىزۋى ول­شەنىپ، ماسكا كيۋ رەجىمى قاتاڭ ساق­تالۋدا. ءىسساپارلار قىسقارتىلىپ، كاسىپورىندارعا اسا ءبىر قاجەتتىلىكسىز بارۋعا تىيىم سالىنعان. ءار رەيستەن كەيىن قىزمەتتىك اۆتوكولىكتەر دەزينفەكتسيالانادى»، دەيدى كومپانيا وكىلى.

ونىڭ سوزىنشە، كومپانيا تسەحتا­رىنىڭ بىرىندە مەديتسينالىق ماسكالار تىگىلۋدە. جۇمىسشىلارعا تۇگەلدەي ماس­كالار جانە FFP2 ونەركاسىپتىك رەسپيراتورلار بەرىلگەن.

«ارنايى وقۋ-جاتتىعۋلار دا وتكى­زىلۋدە. ناقتى ايتساق، جۇمىسشىلار اراسىندا COVID-19 بەلگىلەرى انىقتالعان كەزدەگى ءىس-ارەكەتتەر پىسىقتالۋدا. ءاربىر كاسىپورىندا جانە كەڭسەلەردە ينفەكتسيا جۇقتىرعان قىزمەتكەرلەر انىقتالسا، ۋاقىتشا ورنالاستىرۋعا ارنالعان ءۇي-جايلار بەلگىلەندى. ەڭبەكتى قورعاۋ قىزمەتىنىڭ، دەنساۋلىق ساقتاۋ پۋنكتتەرىنىڭ ماماندارى مەن تىكەلەي باسشىلار قاجەت بولعان جاعدايدا قالاي ارەكەت ەتۋ كەرەكتىگىن بىلەدى. دەما­لىستاردان، ءىسساپارلاردان، اۋرۋحانادان ورالعان بارلىق جۇمىسشىلار جانە كومپانيا اۋماعىندا جۇمىس ىستەيتىن مەردىگەرلەر پتر-تەستىلەۋىنەن وت­كى­زىلەدى. الماتى، نۇر-سۇلتان جا­نە وسكەمەن قالالارىنداعى كەڭسە قىز­مەتكەرلەرى قاشىقتان ەڭبەك ەتۋ­دە. وندىرىستىك كاسىپورىنداردا دا ۇيدەن جۇمىس ىستەي الاتىندار وسىنداي فورماتقا كوشتى. اقتوعاي مەن بوزشاكول سياقتى ۆاحتالىق ادىسپەن جۇمىس ىستەيتىن كاسىپورىنداردا قىز­مەتكەرلەردىڭ دەنساۋلىعىنا قاۋىپ توندىرمەس ءۇشىن ۇزارتىلعان ۆاحتالار ەنگىزىلدى. بۇل كاسىپورىندارعا اۋىسىممەن كەلەتىن قىزمەتكەرلەر بىرنەشە جەدەل جانە پتر-تەست تاپسىرىپ، 7 كۇندىك وقشاۋلاۋدان ءوتىپ قانا كەن ورىندارىنىڭ اۋماعىنا كىرىپ، جۇمىسقا كىرىسە الادى»، دەيدى ەرمەك دۇزكەنوۆ.

قاۋىپتى دەرتكە شالدىقپاس ءۇشىن الەۋمەتتىك قاشىقتىقتى ساقتاۋ قا­جەت­تىلىگى جايلى ايتىلىپ تا، جازىلىپ تا جاتىر. وسى رەتتە ء«وندىرىس وشاق­تارىندا بۇل تالاپ قانشالىقتى ساقتالۋدا؟» دەگەن زاڭدى سۇراق تۋادى. بۇعان دەپارتامەنت مەنەدجەرى بىلاي دەپ جاۋاپ بەردى:

«ارينە، وندىرىستىك كاسىپورىندا الەۋمەتتىك قاشىقتىقتى ساقتاۋ وتە قيىن. دەگەنمەن ارىپتەستەرىمىزگە بۇل ساقتىق شاراسىن ءجىتى ءتۇسىندىرىپ، مۇمكىندىگىنشە بەكىتىلگەن اراقا­شىق­تىقتى ساقتاۋ قا­جەت­تىگىن ايتۋدامىز. ءتىپتى كومپانيادا قول الىسىپ، امانداسۋدى توقتاتتىق. جي­نا­لىس­تاردان، ماجىلىستەردەن تۇبەگەيلى باس تارتىلدى. بارلىق عيماراتتار مەن كەڭسەلەردە سانيتارلىق وڭدەۋدى بىرنەشە ەسە ارتتىردىق. ادامدار كوپ­تەپ جينالاتىن ورىندارعا باكتەريالاردى جوياتىن شامداردى ورناتىپ، انتيسەپتيكتەر قويدىق. جەكە گيگيەنا تۋرالى دا ۇنەمى ايتىپ كەلەمىز» دەيدى.

وسكەمەن