باتىس ۋكرايناداعى روۆنو وبلىسىنىڭ وستروگ دەگەن قالاشىعىندا تۇراتىن ميحايل ياكۋبوۆيچ دەگەن جاس ۋكراين عالىمى «قۇراندى» ءوز تىلىنە اۋدارىپ شىقتى. بۇل تۋرالى ازەربايجاننىڭ «ءدايارلار» پورتالى جازدى.
جيىرما التى جاسار عالىم بۇل اۋدارمامەن بەس جىل بويى اينالىسىپتى. ونىڭ كىتابىندا ءاربىر سۇرەنىڭ تۇپنۇسقاسىمەن قوسا, ماتىنگە ۋكراين تىلىندە تۇسىندىرمە بەرىلگەن. ول تۇسىندەمەلەردى «قۇراندى» وقۋدىڭ كلاسسيكالىق بەدەلدى ۇلگىسىنە سۇيەنىپ جاساعان. وقىرماندار قازىردىڭ وزىندە قاسيەتتى كىتاپتىڭ ۋكراين تىلىندگى نۇسقاسىن ينتەرنەتتەن تاۋىپ وقي الادى.
ميحايل ياكۋبوۆيچ مۇنىمەن دە توقتاعان جوق. قازىرگى تاڭدا «وستروگ اكادەمياسى» ۇلتتىق ۋنيۆەرسيتەتىنىڭ عالىمدارى ونىڭ باسشىلىعىمەن «قۇراننىڭ» وستروزسكي تارجىمالاعان نۇسقاسىن زەرتتەۋدە. XVIII-XIX عاسىرلاردا تاپ وسى قالادا تاتار قاۋىمىنىڭ جيناقى بولىپ تۇرعانى بەلگىلى. سول كەزدە شىعارىلعان بۇل ۆاريانت پولياك جانە ۋكراين تىلدەرىندە جازىلىپتى. بىراق ءماتىنى اراب قارىپتەرىمەن تەرىلگەن.
«بۇگىندە ميحايل ياكۋبوۆيچ ءوزىنىڭ ۋكراين تىلىندەگى «قۇرانى» ۋكراينانىڭ كىتاپحانالار جۇيەسىنە كەڭىنەن تاراۋىن ارماندايدى», - دەپ جازادى The Kiev Times باسىلىمى وسىعان وراي.
اتاپ ءوتۋ كەرەك, مۇسىلمانداردىڭ قاسيەتتى كىتابىنىڭ ۋكراين تىلىندەگى تولىق اۋدارماسى الدىمەن ساۋد ارابياسىنداعى كورول فاحد اتىنداعى «قاسيەتتى قۇران» باسپا جونىندەگى كەشەنىندە جارىققا شىققان. بۇعان دەيىن بۇل نۇسقا ينتەرنەت ارقىلى تاراعان.
«ەلەكتروندى نۇسقا كەشەندە باسىلىپ شىققان مىڭ بەتكە تاياۋ باسپا ءونىمىنىڭ وزىندىك ءبىر پاراللەل باسىلىمى بولىپ تابىلادى», - دەيدى ميحايل ياكۋبوۆيچ.
ونىڭ ايتۋىنشا, اۋدارما كەڭ اۋديتورياعا جولداما الماس بۇرىن اۋەلى ساۋد ارابياسىنداعى ساراپشى-قۇرانشىلاردىڭ قولداۋىنا يە بولعان. سونىڭ ىشىندە «اراب ءتىلىنىڭ وقۋلىعى» كىتابىنىڭ اۆتورى دوكتور ۆ.ابدۋر-راحيم كوميسسيا توراعاسى جانە كەشەننىڭ اۋدارما ءبولىمىنىڭ جەتەكشىسى قىزمەتىن اتقارعان.
اۋدارمانىڭ دۇرىستىعى مەن دالدىگى تۋراسىنداعى تاپ وسىنداي جۇمىستى «قۇراندى» عىلىمي نەگىزدە وقۋشى مۇسىلماندار ورتاسىنداعى بەدەلدى ماماندار شەيح حازيم حايدار مەن شەيح ومار حاۆيا ورىنداعان. سونداي-اق كەڭەسشى رەتىندە مەدينا جانە كايردەگى ال-ازحار ۋنيۆەرسيتەتتەرىنىڭ پروفەسسورى احماد اش-شاركاۆي قىزمەت جاساعان.
ەسكە سالا كەتەيىك, «قاسيەتتى قۇراننىڭ» ءمان-ماعىناسىن ۆالەري باسىروۆ جاساعان ۋكراين تىلىندەگى اۋدارماسى 2010 جىلى جارىققا شىققان بولاتىن.
مۇرات ايتقوجا.
