كەشە «نۇر وتان» حدپ-نىڭ ورتالىق كەڭسەسىندە پارتيا دوكتريناسى جوباسىن دايىنداۋ جونىندەگى جۇمىس توبىنىڭ قورىتىندى وتىرىسى بولىپ ءوتتى.
كەشە «نۇر وتان» حدپ-نىڭ ورتالىق كەڭسەسىندە پارتيا دوكتريناسى جوباسىن دايىنداۋ جونىندەگى جۇمىس توبىنىڭ قورىتىندى وتىرىسى بولىپ ءوتتى.
ونى پارتيا توراعاسىنىڭ ءبىرىنشى ورىنباسارى باۋىرجان بايبەك اشىپ, جۇرگىزىپ وتىردى. وتىرىسقا جۇمىس توبىنىڭ مۇشەلەرى, پارلامەنت ءماجىلىسىنىڭ دەپۋتاتتارى, ورتالىق جانە جەرگىلىكتى مەملەكەتتىك ورگان باسشىلارى, زيالى قاۋىم وكىلدەرى, عالىمدار مەن ساراپشىلار قاتىستى. ءماجىلىس بارىسىندا ايماقتاردا وتكەن تالقىلاۋلاردان كەيىن كەلىپ تۇسكەن ۇسىنىستاردى ەسكەرە وتىرىپ, دوكترينا جوباسىنىڭ تۇزەتىلگەن نۇسقاسى تالقىلاندى.
دوكترينا بويىنشا كەلىپ ءتۇسكەن بارلىق ۇسىنىستار نەگىزگى بەس باعىت بويىنشا توپتاستىرىلدى: جاستارمەن جۇمىستى كۇشەيتۋ, مەملەكەتتىك ءتىلدى دامىتۋ, جالپىعا ورتاق ەڭبەك قوعامىن قۇرۋ, ايماقتاردى دامىتۋ, قوعامدىق باقىلاۋ مەن ازاماتتىق باستاما.
ءماجىلىس بارىسىندا ب.بايبەك پارتيانىڭ تۇعىرناما, باعدارلاما جانە دوكترينا سياقتى نەگىزگى ءۇش قۇجاتى بولاتىنىن ايتتى. تۇعىرناما – پارتيانىڭ ءبىر سايلاۋ مەرزىمىنە ارنالعان قىسقا باسىمدىقتارى ايقىندالعان نەگىزگى قۇجات.
باعدارلامادا پارتيانىڭ جاڭا باسىمدىقتارى جازىلىپ, ول ۇزاق مەرزىمگە باعىتتالادى. ال دوكترينادا پارتيانىڭ ماقسات-مۇراتى مەن قۇندىلىقتارى الداعى بىرنەشە ونجىلدىقتارعا ارنالىپ جازىلادى, دەدى ب.بايبەك.
ەسكە سالا كەتەتىن بولساق, دوكترينا ەلباسى, پارتيانىڭ كوشباسشىسى ن.نازارباەۆتىڭ تاپسىرماسى بويىنشا ازىرلەندى. قۇجاتتى دايىنداۋ كەزىندە جەتەكشى شەتەلدىك پارتيالاردىڭ ۇقساس پارتيالىق قۇجاتتارىنىڭ ۇلگىلەرى قولدانىلدى. وسىعان دەيىن بولعان جۇمىس توبىنىڭ ءۇش ماجىلىسىندە دە دوكترينا جوباسى تالقىلانعان بولاتىن. دوكترينا دايىنداۋدىڭ سوڭعى كەزەڭىندە ونىڭ قازاق ءتىلدى ءماتىنىن جەتىلدىرۋ ءۇشىن ارنايى رەداكتسيالىق توپ قۇرىلدى. ساۋىتبەك ابدراحمانوۆ جەتەكشىلىك ەتەتىن ول توپتىڭ قۇرامىنا جابال ەرعاليەۆ, الدان سمايىل, امانگەلدى مىرزابەك, نامازالى وماشەۆ سىندى زيالى قاۋىم وكىلدەرى كىردى.
دوكترينا جوباسىندا العاش رەت يدەيالىق-دۇنيەتانىمدىق كوزقاراستار مەن قۇندىلىقتار ناقتى بەكىتىلگەن. ياعني, قۇجات جوباسىندا پارتيانىڭ ميسسياسى, ونىڭ قۇندىلىقتارى, مەملەكەت پەن ازامات اراسىنداعى ءوزارا ارەكەتتەستىكتىڭ جاڭا ۇستانىمدارى, تابىستىڭ 7 فاكتورى – بىرلىك پەن كەلىسىم, ءتول مادەنيەت پەن يماندىلىق, كۇشتى ەكونوميكا, ادىلەتتى الەۋمەتتىك ساياسات, زياتكەرلىك ۇلت, الەمگە اشىق قازاقستان مەن ءتيىمدى مەملەكەتتىك باسقارۋ ايقىندالعان. دوكترينا – پارتيا ءرولىن ايقىندايتىن نەگىزگى قۇجات. دوكترينا جوباسى «نۇر وتان» پارتياسىنىڭ XV سەزىندە دەلەگاتتاردىڭ تالقىلاۋىنا ۇسىنىلادى.
جاقسىباي سامرات,
«ەگەمەن قازاقستان».
