ىندەت قارقىن العان تۇستا اۋرۋحانالارعا ادام سىيماي, دەرتتىڭ جەڭىل تۇرىنە دۋشار بولعاندار دارىگەرلەردىڭ كەڭەسىمەن ۇيلەرىندە ەم-دوم قابىلداۋدا. ۆيرۋس مەڭدەپ, مازاسى قاشقان مۇنداي ازاماتتاردىڭ كوبى انتيبيوتيك الماقشى بولىپ دارىحانالارعا قاراي انتالادى. بۇعان قوسا باسى اۋىرماعان بىلايعى جۇرت تا ىندەتتىڭ بەتالىسىنان قاۋىپتەنىپ, نۇسقاۋسىز بەرىلەتىن دارىلەردى الدىن الا الىپ قويۋعا قام جاساپ جاتىر. وسىدان كەلىپ سوڭعى كۇندەرى ءدارى-دارمەك تاپشىلىعى قاتتى سەزىلە باستادى. ونىڭ ۇستىنە ءدارىحانالاردىڭ الدىنداعى ۇزىن-سونار كەزەك ۆيرۋستىڭ تارالۋ قاۋپىن كۇشەيتە ءتۇستى.
كەشە دەنساۋلىق ساقتاۋ ءمينيسترى الەكسەي تسوي ءباسپاسوز ءماسليحاتىندا حالىقتىڭ جاپپاي ءدارى-دارمەك ساتىپ الۋ جاعدايىنا قاتىستى قانداي شارالار قابىلدانىپ جاتقانىن اتاپ ءوتتى.
«مەسسەندجەرلەر مەن الەۋمەتتىك جەلىلەردە تاراپ جاتقان ءارتۇرلى الىپقاشپا اڭگىمەلەردەن كەيىن حالىق جاپپاي «الدا كەرەك بوپ قالار» دەگەن جەلەۋمەن قور جيناۋ ماقساتىندا ءدارىحانادان كوپتەپ ءدارى-دارمەك ساتىپ الا باستادى. اسىرەسە ىستىق تۇسىرەتىن پرەپاراتتارعا سۇرانىس ارتا ءتۇستى. وسى رەتتە مۇنداي پرەپاراتتاردىڭ ەلىمىزدە جەتكىلىكتى كولەمدە وندىرىلەتىنىن, وڭىرلەرگە جەتكىزۋ جولعا قويىلعانىن ايتا كەتەيىن. ءدارىحانا الدىنداعى دۇربەلەڭدى ەسكەرە وتىرىپ, ءدارى-دارمەكتى ساتىپ الۋ مەن جەتكىزۋ ەرەجەلەرىن قايتا قاراۋ تۋرالى شەشىم قابىلداندى. وتاندىق وندىرۋشىلەر دەنە قىزۋىن تۇسىرەتىن پرەپاراتتاردىڭ ءىرى پارتياسىن جەتكىزدى. اپتانىڭ اياعىنا دەيىن 70 مىڭ قاپتاما «ينگاۆيرين» مەن 40 مىڭ قاپتاما «تەرافليۋ» كوتەرمە قويمالارعا جەتكىزىلىپ, ودان ءارى قاراي وڭىرلەرگە جىبەرىلەدى. بۇل پرەپاراتتار ەمدەۋ حاتتاماسىنا سايكەس امبۋلاتوريالىق دەڭگەيدە Covid-19 ىندەتىن ەمدەۋگە قولدانىلمايتىنىن قاپەرگە سالعىم كەلەدى», دەدى الەكسەي تسوي.
ءدارى-دارمەككە سۇرانىستىڭ كۇرت ارتۋىنىڭ ءبىر سەبەبى رەتىندە الدىن الۋ ماقساتىندا حالىقتىڭ جاپپاي پرەپاراتتاردى ساتىپ الىپ جاتقانىن ايتتىق. بۇل رەتتە جەتىسپەي جاتقان دارىلەردى ازاماتتار دارىگەرلەردىڭ نۇسقاۋىنسىز, ءوز بەتىنشە الىپ جاتىر ما دەگەن سۇراق تۋىندايدى. وسىنىڭ جايىن نۇر-سۇلتان قالاسىنداعى №10 ەمحانانىڭ تەراپيا ءبولىمىنىڭ مەڭگەرۋشىسى گۇلناز جومارتقىزىنان سۇراپ بىلدىك.
اتالعان ەمحانا دارىگەرىنىڭ ايتۋىنشا, جۇرت جاپپاي الىپ جاتقان «پاراتسەتامول» رەتسەپتىسىز ساتىلا بەرەدى ەكەن. ال باكتەرياعا قارسى «اميزون», «تاميفليۋ», «ازيتروميتسين» سياقتى پرەپاراتتار ەمدەۋ حاتتاماسىنا سايكەس مىندەتتى تۇردە دارىگەردىڭ نۇسقاۋىمەن ساتىلادى.
ء«بىز ناۋقاستارعا دەنە قىزۋىن تۇسىرەتىن, قاننىڭ قويۋلىعىن سۇيىلتاتىن دارىلەر ۇسىنامىز. مۇنى مەن كۆي-ءدىڭ جەڭىل تۇرىنە ۇشىراعاندارعا قاتىستى ايتىپ وتىرمىن. ويتكەنى ولار دارىگەردىڭ باقىلاۋىمەن ۇيىندە ەمدەلەدى. مۇنداي ناۋقاستار مۇمكىندىگىنشە جەكە بولمەگە جايعاسىپ, ءار ەكى ساعات سايىن ماسكاسىن اۋىستىرىپ, قولىن سابىنداپ جۋىپ, ىدىستارىن دا جەكە قولدانعانى ءجون. جاقىندارىمەن كەمىندە 1,5-2 مەتر اراقاشىقتىق ۇستاۋى كەرەك. ال جاعدايى اۋىر نەمەسە ورتاشا اۋىر ناۋقاستار ارنايى ستاتسيونارلارعا جاتقىزىلادى. ۇيىندە وقشاۋلانعان ناۋقاستاردان دارىگەرلەر كۇنىنە ەكى رەت حابار الىپ تۇرادى. جالپى, 14 كۇن باقىلاۋىمىزدا بولادى. سودان كەيىن پتر-تەست الىپ, تاعى ءبىر تەكسەرەمىز. ەگەر ۆيرۋس وكپەگە ءتۇسىپ كەتسە, پتر-تەست انىقتاي المايدى. سوندىقتان كەيبىر ناۋقاستاردى كت مەن رەنتگەنگە تۇسىرەمىز», دەدى گۇلناز جومارتقىزى.
قازىر ەلورداداعى №10 ەمحانانىڭ پروۆيزورلىق كابينەتىندە 700-گە جۋىق ادام تىركەلگەن ەكەن. ياعني وسىنشا ادام كوروناۆيرۋس ينفەكتسياسىن جۇقتىرعان. ونىڭ ىشىندە ستاتسيونارعا جاتقاندارى دا, ۇيىندە وقشاۋلانعاندارى دا بار. بۇل ەمحاناعا كۇن سايىن مىڭعا جۋىق تۇرعىن جۇگىنەدى. جالپى, ەمحاناعا 85 مىڭ قالا تۇرعىنى تىركەلگەن.
دەنساۋلىق ساقتاۋ ۆيتسە-ءمينيسترى ليۋدميلا بيۋرابەكوۆا Facebook-تەگى پاراقشاسىندا COVID-19 كوروناۆيرۋس ينفەكتسياسىن دياگنوستيكالاۋ جانە ەمدەۋ كلينيكالىق حاتتاماسىنا تولىقتىرۋلار ەنگىزىلگەنىن جازدى.
«COVID-19-دى دياگنوستيكالاۋ جانە ەمدەۋ كلينيكالىق حاتتاماسىنىڭ 10-رەداكتسياسىنا كوروناۆيرۋس ينفەكتسياسىن ەمدەۋدە ايتارلىقتاي تولىقتىرۋلار ەنگىزىلدى. COVID-19 كەزىندە باكتەرياعا قارسى تەراپيانى باكتەريالىق ينفەكتسيا قوسىلعان جاعدايدا عانا قولدانۋعا باسا نازار اۋدارىلدى. COVID-19 كەزىندە وكپەنىڭ ۆيرۋسپەن زاقىمدانۋى ەمپيريكالىق باكتەرياعا قارسى تەراپيانى باستاۋ ءۇشىن كورسەتكىش بولا المايدى», دەدى ۆيتسە-مينيستر.
ونىڭ ايتۋىنشا, حاتتامانى ازىرلەۋشىلەر جاعدايى ورتاشا اۋىر ناۋقاستارعا ۆيرۋسقا قارسى پرەپاراتتاردى ستاتسيونارعا جاتقىزعانعا دەيىن امبۋلاتورلىق جاعدايدا قولدانۋ ۇسىنىسىن قۇپتاعان. بۇل ءۇشىن حاتتاماعا امبۋلاتورلىق كەزەڭدە ەمدەۋ سىزباسى قوسىلىپ وتىر: گيدروكسيحلوروحين جانە لوپيناۆير/ريتوناۆير.
بۇعان قوسا ەندىگى ۋاقىتتا ناۋقاستار ستاتسيونار دەڭگەيىندە جاپونيا مەن رەسەيدە COVID-19-دى ەمدەۋدە كەڭىنەن قولدانىلعان «فاۆيپيراۆير» ءدارىسىن الا الادى. پنەۆمونيانىڭ اۋىر تۇرىندە تەراپيا دەكسامەتازون پرەپاراتىمەن تولىقتىرىلدى.
حاتتامانىڭ 10-نۇسقاسى جاقىن ارادا دەنساۋلىق ساقتاۋ مينيسترلىگىنىڭ رەسمي سايتىندا جاريالانادى.
جالپى, دارىحانالارداعى ءدارى-دارمەك تاپشىلىعى ماسەلەسى كوپ ۇزاماي شەشىلەتىن سياقتى. بۇل ويدى نۇر-سۇلتان قالاسىنىڭ تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ فارماتسەۆتيكالىق قىزمەتتى باقىلاۋ ءبولىمىنىڭ باسشىسى ءاسيا مولديمانوۆا دا قۋاتتاي ءتۇستى.
«ەلوردادا ءدارى-دارمەكتىڭ كوتەرمە ساۋداسىمەن اينالىساتىن قويمالار نەگىزىنەن فيليالدار بولىپ كەلەدى. باستى كەڭسەلەرى الماتى, شىمكەنت, قاراعاندى قالالارىندا ورنالاسقان. ولار قازىرگى ەپيدەميالىق جاعدايدىڭ ۋشىعۋىنا بايلانىستى الدىمەن ءوز قالالارىنداعى ءدارىحانالاردى قامتاماسىز ەتىپ جاتىر. ەندى باسقا وڭىرلەرگە دە دارىلەر جىبەرە باستايدى. وسى اپتادا ءدارى-دارمەك استاناعا جەتەدى. سونداي-اق تەرمومەتردىڭ جەتىسپەۋشىلىگى دە جاقىندا شەشىلەدى. بۇل تاۋارلار قىتايدان اكەلىنەدى. قازىر كەدەندىك راسىمدەۋلەردى تەزدەتۋ تاپسىرىلدى», دەدى ول.
