قازاقستاندا جاڭارتىلعان ءبىلىم بەرۋ باعدارلاماسى بويىنشا ءدارىس بەرەتىن مۇعالىمدەر مەن وقۋشىلاردى ىنتالاندىراتىن ءۇش بىردەي بايقاۋ بيىل بەسىنشى رەت وتكىزىلىپ وتىر. ءبىلىم جوباسىنىڭ ەرەكشەلىگى – ونلاين سيپاتىندا قورىتىندىلانىپ, ۇزدىكتەرگە حالىقارالىق باسپا كىتاپتارىنىڭ اۆتورلارى بوب وببي مەن دجوردج كوكولاس انگليادان ارنايى قۇتتىقتاۋ جولدادى. ەلىمىزدە كوپتىلدى ءبىلىم بەرۋدى ناسيحاتتايتىن شارا ءبىلىم جانە عىلىم مينيسترلىگى, "Edu Stream" وقۋ ورتالىعى جانە قازاقستاندىق مەكتەپتەردەگى بازالىق اعىلشىن ءتىلى كىتابىن دايىنداعان "Express publishing" حالىقارالىق باسپاسى ۇيىمداستىرۋىمەن قولعا الىنعان بولاتىن. شەتەلدىك ساراپشىلاردىڭ ءبىرى ونلاين-رەجىمدە ءبىلىم الۋ بۇكىل الەمدە قيىندىق تۋعىزعانىمەن ء بىلىم سالاسى قىزمەتكەرلەرى كەز كەلگەن جاعدايعا بەيىمدەلە الاتىنىن العا تارتسا, ەندى ءبىرى كارانتين سالدارىنان شاشىن قىسقارتا الماي جۇرگەنىن ايتىپ, تىلەگىن قالجىڭمەن جەتكىزگەن.
"ينتەرنەت پەن ونلاين جۇيە بارلىعىمىزدى ءبىر شارتقا باعىندىردى", – دەيدى سولتۇستىك قازاقستان وبلىسى, پەسكي اۋىلىندا تۇراتىن اعىلشىن ءتىلى ءپانىنىڭ مۇعالىمى سابينا تۇرمۇراتوۆا. – مەن 1-11 سىنىپ وقۋشىلارىنا اعىلشىن تىلىنەن ساباق بەرەمىن, سەبەبى ءبىزدىڭ شاعىن كەشەندى مەكتەپتە نەبارى 100 بالا وقيدى. سوعان قاراماستان شاكىرتتەرىم تالاي بايقاۋدا جەڭىمپاز اتاندى, ەندى مىنە, بۇگىن ءوزىم دە سونداي بايگەدەن جۇلدەگە يە بولىپ وتىرمىن.
ايتا كەتەتىن تاعى ءبىر جايت, رەسپۋبليكالىق بايقاۋ بىرنەشە كەزەڭنەن تۇرادى, سايىسقا قاتىسۋشىلار ىنتالاندىرۋ حاتتارىن, ساباقتى بەينەتاسپاعا ءتۇسىرىپ جولداعان, ارالارىندا قويىلىم ۇسىنعاندارى دا بار. ۇيىمداستىرۋشىلار بارلىق وبلىستان بايقاۋعا مىڭنان استام ءوتىنىش كەلىپ تۇسكەنىن ايتادى. جالپى ءبىلىم بايگەسىندە قىزىلوردا, الماتى, قوستاناي, اقمولا, پاۆلودار وبلىستارى مەن نۇر-سۇلتان, شىمكەنت قالالارىنىڭ ۇستازدارى مەن وقۋشىلارى بەلسەندىلىگىمەن ايرىقشا كوزگە تۇسكەن. سونىمەن قاتار جەڭىمپازدار قاتارىندا الىس ايماقتان قاتىسقان ۇزدىكتەردىڭ بارى قۋانتادى.
"بايقاۋ قىزىق, مازمۇندى, ادىلەتتى ءوتتى, – دەپ ويىن ورتاعا سالدى اعىلشىن ءتىلى جەڭىمپازدارىنىڭ ءبىرى, ستەپنوگورلىق مۇعالىم ۆەرونيكا ششەربينا. – قازىلار القاسى – تاۋەلسىز, قاتىسۋشىلاردىڭ ەشقايسىسىن بولە-جارماي, تۋرا شەشىم شىعاردى. ناتيجەسىندە, بىرىنشىدەن باستاپ, سوڭعى كەزەڭگە دەيىن بارلىعى تازا باسەكەلەستىكپەن ءوتتى. وكىنىشكە قاراي, بۇگىندە مۇنداي جاعداي وتە سيرەك كەزدەسەدى. كەيدە الدىن-الا بارلىق ورىن بەلگىلەنىپ قويعان بايقاۋلارعا قاتىسۋدان باس تارتىپ جاتاتىنىمىز تاعى راس. نەگە دەسەڭىز, ونداي شارالار كاسىبي تۇرعىدا قارىن اشتىرىپ, شابىتتى تۇنشىقتىرادى. باقىتىمىزعا وراي, بۇل بايقاۋ – ونداي الا-قۇلالىقتان ادا. فيزيكا, حيميا, بيولوگيا جانە ينفورماتيكا پاندەرىن اعىلشىنشا وقىتاتىن ۇستازداردى دا كەلەشەكتە وسى بايقاۋعا قاتىستىرسا, نۇر ۇستىنە نۇر بولار ەدى. ءادىل قازىلار القاسىنىڭ قۇرامىنا ەنگەن لينگۆيستەر, ادىسكەرلەر, پسيحولوگ-ماماندار مەن جۋرناليستەر قاتىسۋشىلار ەڭبەگىن ەرەكشەلىگىنە, جاڭاشىلدىعىنا, ىڭعايلىلىعىنا جانە كرەاتيۆ پەن زاماناۋي جەتكىزىلگەنىنە قاراي باعالادى.
سونىمەن ءبىلىمنىڭ الامان بايگەسىندە قارا ءۇزىپ شىققان جەڭىمپازدارعا كەلسەك, 1-4 سىنىپقا اعىلشىن تىلىنەن ساباق بەرەتىن ۇستازدار اراسىندا الماتىداعى №32 مەكتەپتىڭ مۇعالىمى اقمارال مۇساەۆا جەڭىمپاز اتانسا, «ۇزدىك تەاترلىق قويىلىم» اتالىمى بويىنشا ارال اۋدانى قامىستىباس ستانساسىنداعى №21 مەكتەپتىڭ مۇعالىمى پەريزات تىنىشتىقباەۆا («Aldar Kosse and Greedy farmer» قويىلىمى ءۇشىن), قوستاناي قالاسى №2 مەكتەپ-ليتسەيدىڭ مۇعالىمى داريا لوزوۆايا («Story time The fire Owl» قويىلىمى ءۇشىن), «ەڭ بەلسەندى مەكتەپ» اتالىمىندا قىزىلوردا قالاسى دارىندى بالالارعا ارنالعان مامانداندىرىلعان سىنىپتا ءۇش تىلدە ساباق بەرەتىن «مۇراگەر» مەكتەپتەرى, «شىعارماشىلىقپەن جۇمىس ىستەيتىن ۇستاز» نوميناتسياسى بويىنشا سولتۇستىك قازاقستان وبلىسىنىڭ ياۆلەنكا اۋىلىنداعى ت. پوزولوتين ات. №1 ورتا مەكتەپتىڭ مۇعالىمى ۆالەنتينا ترۋشنيكوۆا جۇلدەگە يە بولدى. ال 5-10 سىنىپ وقۋشىلارى اراسىنداعى سايىستا 1-ورىن الماتى قالاسى №121 مەكتەپتىڭ وقۋشىسى ءاليا جۇماعۇلوۆا (جەتەكشىسى ەۆەلينا لۋتسەنكو), قىزىلوردا قالاسى «مۇراگەر» مەكتەبىنىڭ وقۋشىسى بالدىرعان بايماعامبەتوۆا (جەتەكشىسى ءدىلناز تولەگەن) ەنشىسىنە ءتيدى. ءپاندى اعىلشىن تىلىندە وقىتاتىن مۇعالىمدەر اراسىنان باس جۇلدە قوستاناي قالاسى ا. گوركي اتىنداعى گيمنازيانىڭ ينفورماتيكا ءپانىنىڭ مۇعالىمى الەكساندر بارمۋتاعا, 1-ورىن بالقاش قالاسى №15 مەكتەپ-ليتسەيىنىڭ ينفورماتيكا ءپانىنىڭ ۇستازى ءساتجان وماروۆقا, الماتى قالاسى №59 مەكتەپ-گيمنازياسىنىڭ ينفورماتيكا ءپانىنىڭ مۇعالىمى مەيىرگۇل قاجىتاەۆاعا, ستەپنوگور قالاسى ل. تولستوي ات. №4 مەكتەپ-گيمنازياسى بيولوگيا ءپانىنىڭ مۇعالىمى ۆەرونيكا ششەربيناعا بۇيىردى.
