جاڭا كونتەينەرلەر نۇر-سۇلتانداعى اۋلا الاڭدارىنا ورناتىلدى. ولار قايتا وڭدەۋگە جارايتىن پلاستيك, شىنى, قاعاز سياقتى قالدىقتاردى جيناۋعا ارنالعان, دەدى قورشاعان ورتانى قورعاۋ جانە تابيعاتتى پايدالانۋ باسقارماسىنىڭ ءبولىم باسشىسى الماز رىساليەۆ.
"ولار تولىقتاي جانبايتىن مەتاللدان جاسالعان. كىشىگىرىم قوقىستى تاستاۋعا بولاتىن ارنايى قاقپاعى بار. ار تور ارقىلى ونىڭ ىشىندەگى قالدىقتاردى كورۋگە بولادى. سىرتىندا پلاستيك, قاعاز, شىنى مەن مەتالل تاستاۋعا بولاتىنى جازىلعان", دەدى ا.رىساليەۆ.
اتالعان جوبا پيلوتتىق بولىپ تابىلادى. سارى ءتۇستى كونتەينەرلەردى ورتەپ, سونداي-اق قوقىستى سۇرىپتاپ تاستاماعانى ءۇشىن ورتكە ءتوزىمدى تورلى كونتەينەرگە كوشۋ تۋرالى شەشىم قابىلداندى. ەلوردا اۋماعىندا قازىر 6 مىڭنان استام سارى كونتەينەر ورناتىلدى.
ەسكە سالا كەتەيىك, استانادا قاتتى تۇرمىستىق قالدىقتى سۇرىپتاپ جيناۋدى ۇيىمداستىرۋ جوباسى 2018 جىلدىڭ ماۋسىم ايىندا باستالدى. سارى كونتەينەرلەر قۇرقاق قالدىقتى, ياعني مەتالل, پلاستيك, قاعاز بەن شىنىنى سالۋعا كوزدەلگەن. ال جاسىل ءتۇستى جانە تسينكتەلگەن كونتەينەرلەرگە تاماق جانە ورگانيكالىق قالدىقتاردى سالۋ كەرەك.
