پارلامەنت سەسسياسىن جابۋ كەزىندە قازاقستان رەسپۋبليكاسىنىڭ مەملەكەتتىك ءانۇرانى ورىندالدى.
التىنشى سايلانعان قازاقستان رەسپۋبليكاسى پارلامەنتىنىڭ بەسىنشى سەسسياسى زاڭ شىعارۋ جۇمىسىنىڭ كولەمى بويىنشا دا, قابىلدانعان زاڭدار شەشىمىن تابۋعا ىقپال ەتەتىن مىندەتتەر بويىنشا دا وتە اۋقىمدى بولدى.
سەسسيا بارىسىندا پالاتالاردىڭ 3 بىرلەسكەن وتىرىسى ءوتتى, ءماجىلىستىڭ 41 جالپى وتىرىسىندا 296 ماسەلە قارالسا, سەناتتىڭ 25 جالپى وتىرىسىندا 165 ماسەلە قارالدى.
بەسىنشى سەسسيا كەزىندە قوس پالاتانىڭ قاراۋىندا 161 زاڭ جوباسى بولدى, ونىڭ 98-ءى قابىلداندى.
بۇگىنگى كۇنى پارلامەنت قابىلداعان زاڭداردىڭ 86-نە مەملەكەت باسشىسى قول قويىپ, ولار زاڭدى كۇشىنە ەندى.
دەپۋتاتتىق كورپۋستىڭ ۇكىمەتپەن, ورتالىق جانە جەرگىلىكتى اتقارۋشى ورگاندارمەن, سونداي-اق ازاماتتىق قوعاممەن سىندارلى
ءىس-قيمىلى قازاقستاننىڭ تۇڭعىش پرەزيدەنتى – ەلباسى نۇرسۇلتان ءابىش ۇلى نازارباەۆ ايقىنداعان ستراتەگيالىق باسىمدىقتار جانە مەملەكەت باسشىسى قاسىم-جومارت كەمەل ۇلى توقاەۆ پارلامەنت سەسسياسىنىڭ اشىلۋى كەزىندەگى قازاقستان حالقىنا جولداۋىندا العا قويعان مىندەتتەر بويىنشا ءتيىمدى جۇمىس ىستەۋگە مۇمكىندىك بەردى.
پارلامەنت قابىلداعان «2020 – 2022 جىلدارعا ارنالعان رەسپۋبليكالىق بيۋدجەت تۋرالى» زاڭ مەملەكەت ساياساتىنىڭ الەۋمەتتىك باعىتتىلىعىن تولىق كورسەتەدى. الەۋمەتتىك سالانى دامىتۋعا رەسپۋبليكالىق بيۋدجەتتىڭ بارلىق شىعىسىنىڭ جالپى كولەمىنىڭ 46% ءبولىندى.
ءۇش جىلدىق بيۋدجەت شىعىستارىنىڭ باسىم باپتارى ادامي كاپيتالدى دامىتۋ, ساپالى دەنساۋلىق ساقتاۋعا قول جەتكىزۋدى قامتاماسىز ەتۋ, حالىقتى ناتيجەلى جۇمىسپەن قامتۋدى ىنتالاندىرۋ. سونىمەن قاتار, بيۋدجەت باسىمدىقتارىندا: ەكونوميكانىڭ ناقتى سەكتورىن ءوسىرۋ, ەكونوميكا سالالارىن تەحنولوگيالىق جاڭعىرتۋ جانە تسيفرلاندىرۋ ءۇشىن جاعداي جاساۋ, تۇرعىن ءۇيدىڭ قولجەتىمدىلىگىن ارتتىرۋ سياقتى شىعىس باپتارى بار.
سونىمەن قاتار, ءماجىلىس توراعاسى نۇرلان نىعماتۋلين جالپى وتىرىستا تالقىلاۋ بارىسىندا ەكونوميكالىق ءوسۋدىڭ باستى فاكتورى بولىنەتىن قاراجات كولەمى مەن ولاردى يگەرۋ ەمەس, ءتيىمدى جوسپارلاۋ مەن ناقتى ناتيجەلەرگە قول جەتكىزۋ بولىپ تابىلاتىنىن اتاپ ءوتتى.
بۇل ماسەلەنى دەپۋتاتتىق كورپۋس 2019-2021 جىلدارعا ارنالعان بيۋدجەتكە تۇزەتۋلەر ەنگىزۋ كەزىندە, سونداي-اق ۇكىمەت پەن ەسەپ كوميتەتىنىڭ وتكەن جىلعى رەسپۋبليكالىق بيۋدجەتتىڭ اتقارىلۋى تۋرالى ەسەپتەرىن قاراۋ كەزىندە دە كوتەردى.
سونىمەن قاتار, پارلامەنت دەپۋتاتتارى قابىلداعان زاڭنامالىق تۇزەتۋلەر باسشىلاردىڭ بيۋدجەت قاراجاتىن ءتيىمسىز جوسپارلاۋ مەن پايدالانعانى ءۇشىن جاۋاپكەرشىلىكتى بەلگىلەيدى.
