اقتاۋ قالاسىنداعى جۇقپالى اۋرۋلار ستاتسيونارىندا 70 ادام جاتىر, 4 ادام وتە اۋىر حالدە. بەينەۋ اۋداندىق جۇقپالى اۋرۋلار ستاتسيونارىندا – 14, جاڭاوزەن قالاسىندا – 27, ماڭعىستاۋ اۋدانىنىڭ شەتپە اۋىلىندا – 3, تۇپقاراعان اۋدانىنىڭ ستاتسيونارىندا 1 ادام ەم قابىلداۋدا. ولاردىڭ بىرقاتارى ساۋىعىپ شىقسا, 3 ادام قايتىس بولدى. پنەۆمونيا اۋرۋىنىڭ ءورشۋى دە «جىعىلعانعا جۇدىرىق» بولىپ تۇر. ال دارىگەرلەردىڭ, مەدبيكەلەر مەن سانيتارلاردىڭ جەتىسپەۋى – وڭىردە كۇردەلى ماسەلەنى العا تارتادى.
وبلىستىق دەنساۋلىق ساقتاۋ باسقارماسىنىڭ مالىمەتىنە سۇيەنسەك, بۇگىندە وڭىردە پنەۆمونيا دياگنوزىمەن 789 ادام تىركەلگەن. جاعدايى اۋىر ناۋقاستاردىڭ سانى – 71, ونىڭ ىشىندە 13-ءى وتە اۋىر كۇيدە جاتىر. بۇگىنگە دەيىن پنەۆمونيا دياگنوزىنان 74 ادام قايتىس بولدى. سوڭعى تاۋلىكتە ستاتسيونارلارعا 144 ادام ءتۇسىپ, ءبىر تاۋلىك ىشىندە 19 ناۋقاس قايتىس بولدى. قازىرگى ۋاقىتتا وبلىستىق اۋرۋحانادا قوسىمشا پروۆيزورلىق ستاتسيونار اشىلعان «ۆ» بلوگىندا جۇمىس ىستەۋ ءۇشىن مەدبيكەلەر مەن سانيتارلار قاجەت.
ءبىرىنشى كەزەكتە رەانيماتولوگتار جەتىسپەيدى. كەم دەگەندە 25 دارىگەر قاجەت. سونداي-اق اپتا سوڭىندا اقتوبە وبلىسىنان 20 دارىگەرلىك دەسانت كەلەدى دەپ كۇتىلۋدە.
جاعاجايداعى تەننيس ورتالىعىندا 150 توسەكتىك قوسىمشا پروۆيزورلىق ستاتسيونار اشىلدى. رەزەرۆ رەتىندە اشىلعاندىقتان ازىرگە وعان پنەۆمونيامەن اۋىراتىن ادامداردىڭ ەشقايسىسىن قابىلداپ جاتقان جوق. جۇمىس ىستەپ تۇرعان پروۆيزورلىق ستاتسيونارلار پنەۆمونيا دياگنوزى بار ناۋقاستاردى قابىلداۋعا ۇلگەرىپ جاتىر. ناۋقاستار قالالار مەن اۋدانداردا ورنالاسقان پروۆيزورلىق ستاتسيونارلارعا جاتقىزىلۋدا. اقتاۋ قالاسىنداعى پروۆيزورلىق ستاتسيونار وبلىستىق تۋبەركۋلەزگە قارسى ديسپانسەردىڭ بازاسىندا 100 ناۋقاسقا ارنالىپ ۇيىمداستىرىلسا, پسيحيكالىق دەنساۋلىق ورتالىعى عيماراتىنىڭ بازاسىندا 100 كەرەۋەتتىك پروۆيزورلىق ستاتسيونار اشىلدى. قوسىمشا 150 ورىنعا ارنالعان پروۆيزورلىق ستاتسيونار ماڭعىستاۋ وبلىستىق اۋرۋحاناسى بازاسىندا اشىلدى. پسيحيكالىق دەنساۋلىق ورتالىعى عيماراتىنىڭ بازاسىندا جانساقتاۋ بولىمشەسىندە 9 ورىن اشىلدى.
قۇزىرلى ورىنداردىڭ حابارلاۋىنشا, ماڭعىستاۋ وبلىسىنىڭ مەديتسينالىق مەكەمەلەرىندە تىنىس الۋ اپپاراتتارىنىڭ جەتىسپەۋشىلىگى ورىن العان جوق. قازىرگى ۋاقىتتا بارلىعى 92 وكپەنى جاساندى جەلدەتۋ اپپاراتى بار. NCOC كومپانياسى دەمەۋشىلىك تانىتىپ, مەديتسينالىق مەكەمە تاعى 10 اپپاراتقا تولىقتى. «ماڭعىستاۋمۇنايگاز» اق دا ءدال وسىنداي 20 اپپاراتقا قولداۋ كورسەتتى. سونداي-اق «قاراجانباسمۇناي» اق كومپانياسى دا 20 دانا ءوجج اپپاراتىن بەرەدى دەپ كۇتىلۋدە. بۇدان بولەك, دەنساۋلىق ساقتاۋ باسقارماسى ۇكىمەتتىك رەزەرۆ قاراجاتى ەسەبىنەن, ياعني رەسپۋبليكالىق بيۋدجەتتەن قوسىمشا 40 اپپارات ساتىپ الادى. وسىلايشا ايماقتا اتالعان اپپاراتتىڭ جەتىسپەۋشىلىگى ماسەلەسى جوق. سونىمەن قاتار وبلىس اكىمدىگىندە ءوتىنىم ماقۇلدانىپ, ءبىر اي ىشىندە ءوڭىردىڭ مەديتسينالىق مەكەمەلەرىنە وتتەگى كونتسەرتراتتارى كەلىپ تۇسەدى دەپ كۇتىلۋدە.
– جامان ايتپاي جاقسى جوق, جاعداي كۇردەلەنىپ, ناۋقاستار سانى ارتاتىن بولسا, وبلىس دەڭگەيىندە الەۋمەتتىك نىسانداردا ۋاقىتشا پروۆيزورلىق ورتالىقتار جاساقتاۋعا مۇمكىندىك بار. بارلىق پروۆيزورلىق ستاتسيونارلار قاجەتتى مەديتسينالىق قۇرال-جابدىقتارمەن, قورعانىش قۇرالدارىمەن جانە ءدارى-دارمەكتەرمەن قامتىلادى. ول جەردە جۇمىس ىستەيتىن دارىگەرلەرگە جاعداي جاسالىپ, قوناقۇيلەرگە ورنالاستىرىلماق», دەيدى وبلىس اكىمدىگىنىڭ وكىلدەرى.
ماڭعىستاۋ وبلىسى
