توي جاسايمىن دەپ جازالى بولعاندار

ايماقتار • 29 ماۋسىم، 2020

توي جاسايمىن دەپ جازالى بولعاندار

716 رەت كورسەتىلدى

وتكەن دەمالىس كۇندەرى قىزىلجاردا توي وتكىزۋدىڭ ەكى فاكتىسى انىقتالىپ، ءتيىستى ادامدار جازاعا تارتىلدى، - دەپ حابارلايدى Egemen.kz.

جاقسىباي سامرات

وبلىستىڭ باس سانيتارلىق دارىگەرى سەنبى-جەكسەنبى كۇندەرىن كارانتين دەپ جاريالاپ، بارلىق كوڭىل كوتەرۋ ورىندارى جابىلاتىنىن جاريالاعانىنا قاراماي «كونگرەسس» پەن «ەميرات» مەيرامحانالارىندا توي وتكەن. ماشينەلەرىن الىسقا توقتاتىپ، قوناقتاردى مەيرامحانانىڭ قىزمەتتىك ەسىكتەرىنەن كىرگىزگەنىمەن قىراعى كورشىلەر ۇيلەنگەندەردىڭ دە قوسالقى ەسىكتەن كىرىپ بارا جاتقانىن ءتۇسىرىپ الىپ، جەلىگە سالىپ قويعان...

ارينە، توي وتكىزۋشىلەردى دە تۇسىنۋگە بولادى. ولار قۋانىش كۇنىن الدىن الا بەلگىلەپ قويعان، الىس-جاقىنداعى قوناقتارىن شاقىرىپ قويعان. ەندى كەلىپ قالعان قوناقتارعا قايتا كەتە بەرىڭدەر دەمەيدى عوي. بىراق... زامان تالابىن دا ءتۇسىنۋ كەرەك. پرەزيدەنت ق.توقاەۆ ءبىز پاندەميامەن كۇرەستە «سوعىس جاعدايىندامىز» دەگەندە «سوعىس» دەگەن ءسوزدى جاي ايتقان جوق. بەتىن اۋلاق قىلسىن، سوعىس بولا قالسا دا ەشقانداي توي بولمايدى عوي. مىناۋ دا سودان كەيىن بولماي تۇر ەمەس پە؟ قوناقتاردىڭ تىم بولماسا 1-2 ناۋقاس بولسا، باسقالارعا دا جۇقتىرادى. ال ناۋقاس جۇقتىرعانداردىڭ ءبارى بىردەي ءتاۋىر بولىپ كەتىپ جاتقان جوق... سوندىقتان حالقىمىز ءوزىن-ءوزى جانە جاقىندارىن امان ساقتاۋ ءۇشىن توي-تومالاقتان باس تارتا تۇرۋى كەرەك. تويدى كەيىنگە قالدىراۋدان بۇزىلعانى جامان. جالعىز بالاسىنىڭ ءومىر-بويى اڭساعان تويىن دارىگەردىڭ تالابىمەن پوليتسيا كۇشى تاراتىپ جاتسا، ول دا جاقسىلىق ەمەس...

ازىرگە، ونداي ورەسكەلدىك جوق، تەك توي وتكىزگەن جانە ونى قابىلداعان مەيرامحانا قوجايىنىنا سوتتىڭ شەشىمىمەن 300 اەك دەيىن ايىپپۇل سالىنۋى مۇمكىن. توي كەيىن دە بولادى، ەڭ باستىسى اماندىق بولۋى كەرەك.

جالپى، پەتروپاۆلدا توتەنشە جاعداي باستالعاننان بەرگى سوڭعى ەكى ايدىڭ ىشىندە وسىنداي بەس فاكتى انىقتالعان.

پەتروپاۆل

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز