ءتىلدىڭ بايلىعى ءوز قۇرامىن ءسوزجاسام ارقىلى تولىقتىرىپ وتىرادى.
سونىڭ ىشىندە سالالىق تەرمينولوگيانى دامىتۋدا ەسكەرىلەتىن قازىرگى قازاق تەرمينولوگياسىنىڭ وزەكتى ماسەلەلەرىنىڭ ءبىرى – تەرمينولوگيالىق سوزدىكتەر. عىلىمي قاۋىم ءۇشىن قازىرگى شىعىپ جاتقان جانە وسى ۋاقىتقا دەيىن شىعارىلعان تەرمينولوگيالىق سوزدىكتەردىڭ توڭىرەگىندە وزەكتى ماسەلەلەردىڭ بارى ايقىن. اتاپ ايتقاندا, سوزدىكتەردەگى تەرميندەردىڭ كوبىسىنىڭ شەتتىلدىك تەرمين قالپىندا بەرىلۋى, قازاق ءتىلىنىڭ زاڭدىلىعىنا سايكەس يگەرىلمەۋى جانە ت.ب.سوندىقتان دا شىعارىلىپ جاتقان تەرمينولوگيالىق سوزدىكتەردىڭ ساپاسىن ارتتىرۋ وزەكتى ماسەلە بولىپ تابىلادى.
وسىنىڭ ءبارى سەميناردىڭ نەگىزگى تاقىرىبى بولدى.
بۇدان باسقا تەرمينولوگيالىق سوزدىكتەردىڭ قولدانىس اياسىن كەڭەيتۋ جولدارى, تەرمينولوگيالىق سوزدىك قۇرىلىمىنداعى جۇيەلىلىك, تەرميندەردىڭ سوزدىك قۇرىلىمىندا دۇرىس بەرىلۋى, كىرمە تەرميندەردىڭ سوزدىكتەردە بەرىلۋىندەگى قيىندىقتار ت.ب. وزەكتى ماسەلەلەر تالقىلانىپ, شەشۋ جولدارىن ۇسىنىلدى.
فيلولوگيا عىلىمدارىنىڭ كانديداتى, دوتسەنت سارسەنباي قۋانتاي ۇلى قۇلمانوۆ: "قازاق تەرمينولوگياسىندا, تەرمينولوگيالىق بىرىزدەندىرۋدىڭ باسقا تۇرلەرىن ايتپاعاندا, بەلگىلى ءبىر سالا شەڭبەرىندەگى بىرىزدەندىرۋ جۇمىستارى كوڭىل كونشىتپەيدى. تەرميندەردىڭ اركەلكى نەمەسە كەرىسىنشە بىركەلكى قولدانىلۋى ىسقاعازدار تىلىندە, ءارتۇرلى تەحنيكالىق قۇجاتتاردى دايىنداۋ كەزىندە تۇسىنىسپەۋشىلىك تۋعىزىپ قانا قويماي, مەديتسينا سياقتى ادام ومىرىمەن تىكەلەي بايلانىستى سالاعا قاتىستى قۇجاتتاردى تولتىرۋدا اسا كوڭىل الاڭداتارلىق جايت بولىپ تابىلادى. مەمتەرمينكوم بەكىتكەن تەرميندەردى قولدانۋدا اركەلكىلىك ورىن الىپ وتىرعانى جاسىرىن ەمەس".
ونىڭ پىكىرىنشە, بۇل ولقىلىقتاردى جويۋ ماقساتىندا قازاقستان رەسپۋبليكاسى ۇكىمەتى جانىنداعى رەسپۋبليكالىق تەرمينولوگيالىق كوميسسيا تەرمين بەكىتۋ جۇمىستارىن قارقىندى تۇردە جۇرگىزىپ, قازاقستان رەسپۋبليكاسى مادەنيەت جانە سپورت مينيسترلىگى ءتىل ساياساتى كوميتەتىنىڭ تاپسىرىسى بويىنشا ش.شاياحمەتوۆ اتىنداعى ء"تىل-قازىنا" عىلىمي-پراكتيكالىق ورتالىعى مەن ا.بايتۇرسىن ۇلى اتىنداعى ءتىل ءبىلىمى ينستيتۋتى سالالىق تەرمينولوگيالىق سوزدىكتەردەگى تەرميندەرگە كەشەندى ساراپتاما جاساۋمەن اينالىسۋدا.
ءوزىنىڭ ونلاين-ءدارىسىن: "ءار ءپاننىڭ ءوزىنىڭ جەكە سويلەۋ ءستيلى بار, ونى ناقتى ءپاننىڭ "اكادەميالىق ءتىلى" دەپ اتاۋعا بولادى. اكادەميالىق ءتىل ءپان مازمۇنىن مەڭگەرۋ, ويلاۋ جانە وسى پاندە قولدانىلاتىن ۇعىمدارمەن جۇمىس ىستەۋ قابىلەتىن جاقسارتۋعا ارنالعان باستى قۇرال بولىپ تابىلادى", – دەپ باستاعان فيلولوگيا عىلىمدارىنىڭ كانديداتى, دوتسەنت اقبوتا تۇراعۇلقىزى قوڭىروۆا جاڭا تەرميندەردى بالا ۇعىمىنا قالاي تەز سىڭىرۋگە بولاتىنى جونىندە ناقتى مىسالدارمەن قىزىقتى اڭگىمەلەپ بەردى.
پەداگوگيكا عىلىمدارىنىڭ ماگيسترى, تەرمينشى سەرىك ابدىرەش ۇلى ەرعالي 1906 جىلى ورىنبوردا باسىلىپ شىققان "ورىسشا-قازاقشا (قىرعىزشا) قىسقاشا سوزدىكتەن" باستاپ, تاۋەلسىزدىكتىڭ العاشقى ونجىلدىعىندا جارىق كورگەن 100-دەن استام سوزدىككە دەيىن شولۋ جاساپ ءوتتى.
ودان ءارى ءوز ويىن: "دەسەك تە, ءوز الدىنا ەل عانا ەمەس, ءتىل دە ەگەمەن بولادى. دەمەك, تاۋەلدى حالىقتىڭ تىلىنە قوياتىن تالاپتان ازات حالىقتىڭ تەرمينولوگياسىنا قويىلاتىن تالاپ مۇلدە باسقا اۋقىم مەن دەڭگەيدى قامتۋى ءتيىس. بۇگىنگى كۇن تالابىنا ءتىپتى سايكەسپەيتىن سوزدىكتەر كەزدەسەدى. جىل سايىن مىڭداعان جاڭا تەرميندەر تۋىنداۋدا, ونى ءتىلدىڭ تەرمينولوگياسىنا سىڭىرەيتىندەي لينگۆيستيكالىق الەۋەت پەن رەسۋرس قاجەت",– دەپ تۇيىندەدى.
ءىس-شاراعا تىكەلەي ەفير ارقىلى قاتىسقان سالا ماماندارى, فيلولوگتار مەن جوعارى وقۋ ورنىنىڭ ستۋدەنتتەرى, جالپى جۇرتشىلىق تاقىرىپ بويىنشا ءوز ويىن ءبىلدىرىپ وتىردى.
ونلاين-سەميناردى ش.شاياحمەتوۆ اتىنداعى ء"تىل-قازىنا" عىلىمي-پراكتيكالىق ورتالىعىنىڭ اتقارۋشى ديرەكتورى ە.تىلەشوۆ قورىتىندىلادى.
