"بۇل باعىتتا ءبىزدىڭ الدىمىزدا 3 ءوزارا بايلانىستى مىندەت تۇر. ءبىرىنشىسى – حالىق اراسىنا زايىرلى مەملەكەت قۇندىلىقتارىن ناسيحاتتاۋ, ەكىنشىسى – دىنارالىق كەلىسىمدى ساقتاۋ, ءۇشىنشىسى – ءدىني ەكسترەميزمدى بولدىرماۋ. ال ەندى وسىلاردى ىسكە اسىرۋ ءۇشىن كەلەسى باعىتتاردا جۇمىس ىستەپ كەلەمىز. بۇل – اقپاراتتىق-ءتۇسىندىرۋ جۇمىستارى, دەسترۋكتيۆتى ءدىني كوزقاراستاعى ازاماتتاردى رايىنان قايتارۋ جانە ينتەرنەت ارقىلى ءدىني ەكسترەميزم يدەولوگياسىنا قارسى جۇمىستار", دەيدى ايدا بالاەۆا.
ءمينيستردىڭ ايتۋىنشا, وتكەن 2019 جىلى اقپاراتتىق-ءتۇسىندىرۋ توپتارىنىڭ كۇشىمەن 3 ميلليونداي ادامدى قامتىعان 50 مىڭنان استام ءىس-شارا وتكەن. ءدىن سالاسىنداعى پروبلەمالىق سۇراقتارعا جەدەل جاۋاپ بەرۋ ماقساتىندا 300 ادامنان تۇراتىن بىلىكتى لەكتورلار پۋلى قۇرىلعان.
سونىمەن بىرگە ايدا بالاەۆا: "كورىپ وتىرسىزدار, جۇمىس وتە ءتيىمدى. سوندىقتان دا, وسى جىلى ءبىز بۇل توپتارداعى مامانداردىڭ سانىن 500-گە دەيىن ارتتىرىپ, 1200 لەكتورلاردى قايتا دايارلىقتان وتكىزۋدى جوسپارلاپ وتىرمىز", دەيدى مينيستر.
"بۇدان بولەك, "جۋسان" وپەراتسياسىنىڭ ناتيجەسىندە ەلگە ورالعان 163 ايەل-ازاماتشالارىمىزبەن ماقساتتى تۇردە جۇمىس جۇرگىزگەننىڭ ارقاسىندا 144 ايەل راديكالدى ويلارىنان قايتىپ, ولاردىڭ ءبىرازى زايىرلى ءومىر سالتىنا ءوتتى. ارينە, ماسەلەنىڭ سالدارىمەن ەمەس سەبەبىمەن كۇرەسۋ كەرەك. سوندىقتان دا, 2019 جىلى 5300-دەن اسا ينتەرنەت-رەسۋرستارى ساراپتالىپ, ونىڭ 3200-نەن زاڭعا قايشى ماتەريالدار انىقتالدى. ولاردىڭ بارلىعى دەر كەزىندە بۇعاتتالدى", دەيدى ايدا بالاەۆا.
ءدىن ماسەلەسىندەگى ناقتى ويلارىنىڭ ءبىرى – حالىقتىڭ راديكالدى اعىمدارعا قارسى يممۋنيتەتىن قالىپتاستىرىپ, ەلدەگى دىنارالىق قاقتىعىستاردىڭ الدىن الۋ بولىپ تابىلاتىندىعىن ايتىپ ءوتتى.
