قازاقستان • 29 ماۋسىم، 2020

5 مىڭعا جۋىق قانداس ازاماتتىق الۋعا ءوتىنىش بەرگەن

901 رەت كورسەتىلدى

ازاماتتىق العىسى كەلەتىن قانداستارىمىزعا ارنالعان "وتانداستاردى اقپاراتتىق قولداۋ ورتالىعى" قۇرىلىپ، وعان بىلتىردىڭ وزىندە 5 مىڭعا جۋىق ءوتىنىش ءتۇستى. بۇل تۋرالى اقپارات جانە قوعامدىق دامۋ ءمينيسترى ايدا بالاەۆا ايتتى، - دەپ حابارلايدى Egemen.kz

"وسى ۇلتارالىق قاتىناس سالاسىنىڭ ۇلكەن ءبىر بولىگى – شەتەلدەگى قازاقتار مەن ەلگە ورالعان قانداستار ماسەلەسى. بۇل باعىتتاعى بارلىق سۇراقتاردى شەشۋ ءۇشىن قازىر "وتانداستار" قورىمەن بىرلەسە وتىرىپ، بىرقاتار جوبالاردى قولعا الدىق. وزدەرىڭىز بىلەسىزدەر، ۇكىمەت تاراپىنان بەكىتىلگەن "2018-2022 جىلدارعا ارنالعان ەتنيكالىق قازاقتاردى قولداۋ جوسپارى" بار. ونىڭ اياسىندا شەتەلدەگى قازاقتاردىڭ قاتىسۋىمەن كوپتەگەن مادەني-گۋمانيتارلىق ءىس-شارالار  وتكىزىلىپ كەلەدى"، دەدى ايدا بالاەۆا.

ءمينيستردىڭ ايتۋىنشا، ەلگە ورالعان قانداستارىمىزعا قۇجات ءراسىمى اناعۇرلىم جەڭىلدەتىلىپ، ء"بىر تەرەزە" ءپرينتسيپى ەنگىزىلگەن. وسىنىڭ ارقاسىندا قازىر  قانداستار 5-6 مەملەكەتتىك مەكەمەنى ارالاپ تابان توزدىرماي، بارلىق شارۋاسىن ءبىر جەردەن شەشەتىن بولادى. ولارعا قاجەت قۇجاتتاردىڭ سانى دا ەكى ەسەگە ىقشامدالىپ، راسىمدەۋ ۋاقىتى 6 ايدان 3 ايعا قىسقارادى. 

"قانداستاردىڭ الەۋمەتتىك-ەكونوميكالىق تۇرعىدان قولداۋ ماسەلەسى دە جىلدان جىلعا شەشىلىپ كەلەدى. قازىر ولار ەلىمىزدە ىسكە اسىرىلىپ جاتقان مەملەكەتتىك باعدارلامالارعا ەنگىزىلەتىن بولادى. ازاماتتىق العىسى كەلەتىن قانداستارىمىزعا ارنالعان "وتانداستاردى اقپاراتتىق قولداۋ ورتالىعى" قۇرىلىپ، وعان بىلتىردىڭ وزىندە 5 مىڭعا جۋىق ءوتىنىش ءتۇستى"، دەدى مينيستر ايدا بالاەۆا.

سونداي-اق "وتانداستار" قورىمەن بىرلەسىپ قازاقتار كوپ شوعىرلانعان شەت ەلدەردە قازاق مادەني-ىسكەرلىك ۇيلەرى اشىلاتىن بولادى. بۇل ەڭ الدىمەن قىتاي، رەسەي، موڭعوليا، وزبەكستان، گەرمانيا مەن تۇركيا سياقتى ەلدەرگە قاتىستى. ءمينيستردىڭ مالىمەتىنشە، قازىردىڭ وزىندە 12 ەلدىڭ 23 قالاسىندا 31 قازاق سىنىپتارى ونلاين رەجيمدە اشىلدى. وسى جىلى بۇل ەلدەردە 2،5 مىڭنان اسا بالالار انا ءتىلىن وقيتىن بولادى. 

سوڭعى جاڭالىقتار

ۇقساس جاڭالىقتار