الەمدىك دەڭگەيدە تارالعان كوروناۆيرۋستىق ينفەكتسيا پاندەمياسىنىڭ سالدارىنان, جىل سايىن ءداستۇرلى تۇردە وتكىزىلىپ كەلە جاتقان وليمپيادا ۇيىمداستىرۋ كوميتەتىنىڭ شەشىمى بويىنشا تۇڭعىش رەت قاشىقتىقتان وتكىزىلىپ وتىر.
وليمپيادا قازاق ءتىلى مەن ادەبيەتىن تەرەڭ بىلەتىن قازاق دياسپوراسى بالالارىنىڭ اراسىنان دارىندى وقۋشىلاردى انىقتاۋدى, ولاردىڭ انا ءتىلى مەن قازاق ادەبيەتى, قازاق حالقىنىڭ تاريحى, مادەنيەتى مەن ونەرى جونىندەگى تانىمدىق قابىلەتتەرىن ارتتىرۋدى, الەمنىڭ ءار ەلىندە تۇراتىن قازاق جاستارى اراسىندا دوستىق بايلانىستىڭ ورناۋىنا ىقپال ەتۋدى, سونداي-اق قازاق دياسپوراسى وكىلدەرى اراسىندا قازاق ءتىلىن مەڭگەرۋدىڭ ماڭىزدىلىعىن ارتتىرۋدى كوزدەيدى.
قاتىسۋشىلاردىڭ سانى بويىنشا بيىلعى وليمپيادا رەكوردتىق كورسەتكىشكە يە. ەڭ كوپ قاتىسۋشى وزبەكستان رەسپۋبليكاسىنان بولسا, بەلگيا ەلىنەن وقۋشىلار تۇڭعىش رەت قاتىسۋدا.⠀
رەسەي, قىتاي, يران, قىرعىزستان, مونعوليا, وزبەكستان, تۇركىمەنستان مەن تۇركيا ەلدەرىنەن وقۋشىلار جىل سايىن ءداستۇرلى تۇردە وليمپياداعا قاتىسىپ, ولاردىڭ ىشىنەن ەڭ ءبىلىمپازدارى جەڭىمپاز اتانىپ, ەلىمىزدىڭ جوعارعى وقۋ ورىندارىندا بىلىمدەرىن جالعاستىرۋدا, ال ولاردىڭ العى بۋىنى ەلىمىزدە ەڭبەك ەتىپ قىزمەت جاساپ جاتىر. بيىلعى وليمپياداعا قاتىسقان وقۋشىلاردىڭ جالپى سانى 146 قاتىسۋشى.
وليمپيادا قورىتىندىسى بويىنشا جەڭىمپازدار مەن جۇلدەگەرلەر قر ءبىلىم جانە عىلىم ءمينيسترىنىڭ I, II, III دارەجەلى ديپلومدارىمەن قوسا باعالى سىيلىقتارمەن ماراپاتتالادى.
بۇدان بولەك, جاقسى ناتيجەلەر كورسەتكەن قاتىسۋشىلارعا "دارىن" رەسپۋبليكالىق عىلىمي-پراكتيكالىق ورتالىعىنىڭ ءتۇرلى نوميناتسيالار بويىنشا تاعايىندالعان ديپلومدارى مەن ارنايى سىيلىقتارى بەرىلەدى, سونداي-اق "وتانداستار قورىنىڭ" سىيلىقتارى تابىستالادى. وليمپيادانىڭ بارلىق قاتىسۋشىلارىنا سەرتيفيكات بەرىلەدى.
