جۇقپالى دەرتتى العاشقى كارانتيندىك شارالار اياقتالعان كەزدە شەكارانىڭ اشىلۋىمەن رەسەيدەن جەرلەستەرىمىز اكەلگەن بولسا, قازىر رەسپۋبليكانىڭ ىشىندەگى قوزعالىستاردىڭ ناتيجەسىندە دە كوبەيىپ جاتىر. اۋرۋدىڭ تارالۋ وشاقتارى حالىق كوپ جينالاتىن جەرلەردە.
قازىرگى كەزەڭنىڭ ەرەكشەلىگى, اۋدان ورتالىقتارى مەن اۋىلدىق جەرلەردە دە اۋرۋ ءورشىپ تۇر. العاشقى كەزەڭدە مۇنداي جاعداي مۇلدە بايقالماعان ەدى. سونىڭ كەسىرىنەن ايىرتاۋ, اقجار, ش.ءۋاليحانوۆ, ع.مۇسىرەپوۆ جانە تايىنشا اۋداندارى تولىعىمەن كارانتينگە جابىلىپ, بلوك-بەكەتتەر قويىلدى. شال اقىن اۋدانىنداعى جاڭاجول مەن م.جۇماباەۆ اۋدانىنداعى تامان اۋىلدارى دا كارانتينگە جابىلدى. قازىر وبلىستاعى سىرقاتقا ۇشىراعاندار سانى 700-دەن استى جانە بۇل توقتاۋسىز وسۋدە.
سولتۇستىك قازاقستان وبلىسىنىڭ تاۋارلار مەن قىزمەتتەردىڭ قاۋىپسىزدىگى مەن ساپاسىن باقىلاۋ دەپارتامەنتىنىڭ باستىعى, باس سانيتارلىق دارىگەر سەرىكباي قاسماقاسوۆ پەن پەتروپاۆل قالاسى اكىمىنىڭ ورىنباسارى اسقار حابيبۋلين وبلىس پەن قالاداعى ىندەتكە قارسى كۇرەس تۋرالى باياندادى. س.قاسماقاسوۆ دەمالىس كۇندەرى قالاداعى بارلىق سۋپەر جانە گيپەرماركەتتەر جابىلاتىنىن ەسكەرتتى. «حالىقتىڭ جۇمىس پەن دارىحاناعا جانە ءۇيىنىڭ ماڭىنداعى ازىق-تۇلىك دۇكەندەرىنە عانا بارۋىنا رۇقسات ەتىلەدى. بارلىق ساۋدا ويىن-ساۋىق ورىندارى, ءدىني مەكەمەلەر, دەمالىس پاركتەرى, جاعاجايلار, بيزنەس ورتالىقتارى, بازارلار, قوعامدىق مونشالار مەن ساۋنالار جابىلادى, قوعامدىق كولىكتىڭ ءجۇرۋى توقتاتىلادى. پاتەر يەلەرى كووپەراتيۆتەرىنىڭ باسشىلارىنا وسى كۇندەرى اۋلالاردى, بالالار وينايتىن الاڭداردى, اۆتوتۇراقتاردى دەزينفەكتسيالاۋ ۇسىنىلادى», دەدى ول. سونىمەن بىرگە ادامداردىڭ ءبىر-بىرىنەن قاشىق بولۋى, قولدارىن ۇنەمى جۋىپ وتىرۋى, ىستىقتارىن ءجيى ولشەپ تۇرۋى سۇرالاتىنىن جەتكىزدى. «وسى شەكتەۋلەردى قاتتى ساقتاعاندا عانا ءبىز دەرتتى قۇرىقتاي الاتىن بولامىز. سوندىقتان ءبىزدىڭ تالاپتارىمىزعا تۇسىنىستىكپەن قاراڭىزدار», دەدى س.قاسماقاسوۆ.
قالا اكىمىنىڭ ورىنباسارى اسقار حابيبۋلين وسى تالاپتاردى ورىنداماعان زاڭدى تۇلعالار مەن جەكە تۇلعالارعا ايىپپۇل سالىناتىنىن جەتكىزدى. قازىردىڭ وزىندە 16 ماتەريال جينالىپ, ءىس سوتقا وتكىزۋگە دايىندالۋدا دەدى ول. «جاتتىعۋ زالدارىنا جاسىرىنىپ بارعىسى كەلەتىن ادامدارعا, وتباسىلىق شارالاردى ەسىكتەرىن جاۋىپ الىپ وتكىزگىسى كەلەتىن ءدامحانالار مەن مەيرامحانالارعا دا ايىپپۇل سالىناتىنىن ەسكەرتەمىن. قازىردىڭ وزىندە 4 مەيرامحانانىڭ جۇمىسى توقتاتىلىپ, ليتسەنزياسىن قايتارىپ الدىق. وسىنىڭ ءبارى حالىقتىڭ دەنساۋلىعىن ساقتاۋ ءۇشىن جاسالىپ جاتقان قاتاڭ شارالار, سوندىقتان وندايلارعا تۇرعىندار تۇسىنىستىكپەن قاراۋى كەرەك», دەدى ا.حابيبۋلين.
سونىمەن بىرگە دەرتتى تاراتۋ وشاقتارى حقكو مەن بالاباقشالاردان شىققانى دا بەلگىلى بولعان. سوندىقتان حقكو ونلاين رەجىمدە جۇمىس ىستەۋگە كوشىرىلگەن. قالانىڭ ءتورت بالاباقشاسى كارانتينگە جابىلعان. ءبىر دۇكەن, ءبىر سۇلۋلىق سالونىنا ايىپپۇل سالىنعان.
سولتۇستىك قازاقستان وبلىسى
