بۇگىن ليۆيا استاناسى تريپوليدە پرەمەر-مينيستر الي زەيداننىڭ ۇرلانعانى جونىندەگى اقپار قاتە بولىپ شىقتى. بۇل تۋرالى يتار-تاسس حابارلادى.
بۇدان بۇرىن باق وكىلدەرى «قارۋلانعان بەلگىسىز بىرەۋلەر پرەمەر-ءمينيستردى شتاب-پاتەرىندە وتىرعان جەرىنەن ۇرلاپ اكەتتى» دەگەن اقپار جاريالاعان بولاتىن. دەرەكتى دەرەۋ ليۆيا ۇكىمەتى دە راستادى. الايدا, كەيىن انىقتالعانىنداي, مۇنىڭ ءبارى جەرگىلىكتى ىشكى ىستەر مينيسترلىگىنىڭ جۇرگىزگەن وزىندىك شاراسى بولىپ شىقتى.
«پرەمەر-ءمينيستردى ەشكىم ۇرلاعان جوق», – دەدى ليۆيا ىشكى ىستەر مينيسترلىگى جانىنداعى قىلمىسپەن كۇرەس باسقارماسىنىڭ وكىلى ابدەل حاكيم ال-بۋليازي سوڭىنان. ول سونداي-اق ۇكىمەت باسشىسى الي زەيدان شىنىمەن قاماۋعا الىنعانىن ايتتى. قاماۋ باسقارما بۇيرىعىمەن جۇزەگە اسقان.
«سكاي نيۋس-ارابيا» تەلەارناسىنىڭ بەرگەن اقپارىنا قاراعاندا, الي زەيدانعا جەمقورلىق پەن اقش ارنايى جاساعىنىڭ بولجام بويىنشا «ال-كايدا» توبى جەتەكشىلەرىنىڭ ءبىرى ابۋ اناس ال-ءليبيدى ۇستاۋىنا قاتىسى بار دەگەن ايىپ تاعىلعان. وسى ايىپتارعا بايلانىستى ۇكىمەت باسشىسى ۇستىنەن تەرگەۋ امالدارى باستالدى.
ليۆيا ۇكىمەتى بۇل وقيعاعا بايلانىستى شۇعىل جيىن وتكىزدى.
ايدار ورىسباەۆ.
