اقتوبە قالاسىنىڭ قۇرمىش اۋدانىنداعى ماحامبەت كوشەسى بويىندا ورنالاسقان ۇيدە ساۋلەباي رىسقاليەۆتى اقىرعى ساپارعا شىعارىپ سالۋعا جۇزدەگەن ادام كەلدى. بۇل تۋرالى «موي گورود» پورتالى حابارلادى.
«قازانى شىعارىپ سالۋعا جۇزدەگەن ادام جينالدى. ول ءۇيدىڭ جانىنا قويىلعان كولىكتەردىڭ سانىنان-اق بايقالدى. ولاردىڭ باسىم كوپشىلىگى اتىراۋدىڭ مەملەكەتتىك ءنومىرى تاعىلعان كولىكتەر بولىپ شىقتى», - دەلىنگەن حابارلامادا.
مارقۇمنىڭ ءمايىتىن شىعارىپ سالار الدىندا جۋرناليستەردەن ۇيگە تىم جاقىنداماۋ وتىنىلگەن. سوسىن ىشكە ارنايى كولىك كىرىپ, قاقپا جابىلعان. اۋلاداعى كورىنىستەردى تۇسىرۋگە دە رۇقسات ەتىلمەگەن. جانازا جابىق اۋلانىڭ ىشىندە وتكەن. سودان كەيىن داربازا اشىلىپ, شىققان كولىكپەن بىرگە جۇرت تا سىرتقا بەتتەگەن. ولاردىڭ بىرقاتارى ساداقا بەرىلەتىن رەستورانعا كەتسە, تاعى ءبىر قوراسى بەيىتكە باراتىن كولىكتەرگە وتىرعان.
ساۋلەباي رىسقاليەۆ 78 جاسىندا قايتىس بولدى. تۋعان-تۋىستارى وسى وقيعاعا بايلانىستى جۋرناليستەرگە الدەنە ايتۋدان باس تارتقان. ال كورشى ايەل اقساقالدىڭ جاقسى ادام بولعانىن, بىراق ۇلدارى جونىندە ەشتەڭە بىلمەيتىنىن, سەبەبى, تانىستىعى جوق ەكەنىن ايتقان.
وسى وقيعاعا بايلانىستى كتك ءتىلشىسى جۇرگىزگەن حاباردا «ساۋلەباي اقساقالدىڭ جانازاسىنا ۇلدارى مەن ءۇش كۇيەۋ بالاسى جانە كىسى ولتىرۋگە تاپسىرىس بەردى دەپ ايىپتالعان قىزى قاتىسا الماعانى» ايتىلدى. اعايىندى رىسقاليەۆتەردىڭ اكەسى سوڭعى 10 جىلدان ءوزىنىڭ جانازاسى شىعارىلعان ۇيدە تۇرىپ كەلگەن. «جانازاعا جينالعانداردىڭ كوپ بولعانى سونشا, جول بويىنا قويىلعان كولىكتەردەن كوشەدەگى قوزعالىس بىرەر ساعاتقا توقتاپ قالدى», - دەيدى ءتىلشى ودان ءارى.
ءتىلشىنىڭ بايانداۋىنشا, بالالارى ەلدەن كەتكەلى بەرى ساۋلەباي رىسقاليەۆتىڭ جۇرەگى سىر بەرىپ ءجۇرىپتى. ءومىرىنىڭ سوڭعى كۇندەرىن ول حابار كۇتىپ, تەلەديدارعا تەلمىرەۋمەن وتكىزىپتى. «بالالارىن اڭسايدى عوي. اڭسامايتىن ادام بار ما؟ بالا-باۋىر ەتى عوي. بالاسىن اتا-اناسى اق ءسۇتىن بەرگەن, قالاي جوقتاماسىن؟», - دەيدى مارقۇمنىڭ دوسى الپىسباي جۇمىرعازين وسى ورايدا.
«دەنساۋلىعى, جۇرەگى اۋىرىپ جۇرەدى عوي. كۋرورتقا باردى, ەمدەلىپ ءجۇردى. ءبارىبىر ءدامى بىتكەن سوڭ كەتتى عوي. نە شارا...ءا", - دەيدى باسقا قۇرداسى قۇندىزباي بەرلەپەسوۆ.
تۋىستارىنىڭ ايتۋىنشا, بالالارىنىڭ اقتالاتىنىنا سەنگەن. جانە ۇنەمى: «ءالى زامان تۇزەلەدى, ءبارى ورنىنا كەلەدى» دەگەندى ءجيى ايتىپ ءجۇرىپتى.
اتىراۋدىڭ بۇرىڭعى اكىمى بەرگەي رىسقاليەۆ پەن ءماجىلىس دەپۋتاتى بولعان باۋىرى امانجان اكەلەرىن سوڭعى ساپارعا شىعارىپ سالا المادى. ولارعا 35 ادامنان تۇراتىن قىلمىستىق توپ قۇرىپ, 71 ملرد. تەڭگەنى جىمقىردى دەپ ايىپ تاعىلعان بولاتىن.
رىسقاليەۆتەردىڭ سىبايلاستىق كومانداسىندا بۇل اۋلەتتىڭ ءۇش كۇيەۋ بالاسى دا بولعان دەسەدى. ولار دا قازىر شەت ەلدەردە باس ساۋعالاپ ءجۇر. ال قارىنداسىنا كىسى ولتىرۋگە تاپسىرىس بەردى دەپ ايىپ تاعىلىپ, وعان قازىر حالىقارالىق ىزدەۋ جاريالانعان. قازىر شۆەيتساريا پروكۋراتۋراسى دا اعايىندى رىسقاليەۆتەرگە قاتىستى قىلمىستىق ءىس قوزعاپتى.
ساكەن مايلىباي.
