ايماقتار • 26 ماۋسىم، 2020

اكىمدىكتەر جول ساپاسىن تەكسەرتۋگە نەگە ق ۇلىقسىز؟

56 رەت كورسەتىلدى

وزەكتى ماسەلە "ماڭعىستاۋ-ادالدىق الاڭى" جوبالىق كەڭسەسىنىڭ ءباسپاسوز الاڭىندا وتكەن بريفينگتە كوتەرىلدى. جيىندى قر سجقىا وڭىرلىك دەپارتامەنتى باسشىسىنىڭ ءبىرىنشى ورىنباسارى سەرىك قانىبەكوۆ تىكەلەي ەفيردە جۇرگىزىپ وتىردى. بۇل تۋرالى "جول اكتيۆتەرىنىڭ ۇلتتىق ساپا ورتالىعى" رمك موف ءباسپاسوز قىزمەتىنە سىلتەمە جاساي وتىرىپ Egemen.kz حابارلايدى.

الەۋمەتتىك جەلى قولدانۋشىلارى قاتىسىپ،  سۇراق جاۋدىرعان جيىنعا "جول اكتيۆتەرىنىڭ ۇلتتىق ساپا ورتالىعى" رمك ماڭعىستاۋ فيليالىنىڭ ديرەكتورى ەلتاي تاياليەۆ قاتىستى.

بريفينگ سپيكەرى الدىمەن ءوزى باسقاراتىن فيليال، قالا بەردى جول ساپاسىن باقىلاۋ ورتالىعى قىزمەتكەرلەرى اتقاراتىن جۇمىستاردىڭ رەتىن باياندادى. اتاپ ايتساق، ورتالىقتىڭ نەگىزى قىزمەتى - اۆتوموبيل جولدارىن سالۋ، قايتا جاڭارتۋ، جوندەۋ جانە كۇتىپ-ۇستاۋ كەزىندە جۇمىستار مەن ماتەريالداردىڭ ساپاسىن ساراپتاۋ. سونداي-اق جول اكتيۆتەرىن باسقارۋ بولىپ تابىلادى.

جول ساپاسىن باقىلاۋشىلار رەسپۋبليكالىق ماڭىزداعى تراسسالارعا شىعىپ، باقىلاۋ جۇرگىزۋى رەسپۋبليكالىق مەكەمەدەن قارجىلاندىرىلادى. ال جەرگىلىكتى ماڭىزداعى جولداردىڭ ساپاسىن تەكسەرۋگە بيۋدجەتتەن قارجى قارالماعان. ماسەلەنى شەشۋ ءۇشىن ايماقتارداعى فيليالدار جەرگىلىكتى اتقارۋشى ورگاندارعا، ياعني اكىمدىكتەرگە قىزمەتتىك حاتپەن شىعىپ، ءوز قىزمەتىن ۇسىنۋدا.

"شىن مانىسىندە قانداي دا ءبىر تراسسانى سالۋعا نەمەسە جوندەۋگە تاپسىرىس بەرۋشى وبلىس، قالا نە اۋدان اكىمدىگىندەگى اۆتوموبيل جولدارى جانە جولاۋشىلار كولىگى ءبولىمى بولىپ تابىلادى. تەندەر وينالىپ، ونى ۇتىپ العان مەردىگەر جولدى سالۋعا نەمەسە جوندەۋگە كىرىسەدى. ال ونىڭ قانشالىقتى ساپالى ءجۇرىپ جاتقانىن، كەمشىلىكتەردىڭ بار-جوعىن تەكسەرىپ، قورىتىندى بەرەتىن مەملەكەتتىك ورگان بارىن ءالى كوپ ادام بىلە بەرمەيدى. وسى رەتتە ماڭعىستاۋ وڭىرىندەگى بارلىق ەلدى مەكەن اكىمدىكتەرىن بىزبەن ارىپتەستىك بايلانىس ورناتىپ، كەلىسىمشارتقا وتىرۋىن سۇرايمىز"، دەيدى ە.تاياليەۆ.

تىكەلەي ەفير ۋاقىتىندا وبلىستىق جولاۋشىلار كولىگى جانە اۆتوموبيل جولدارى باسقارماسىمەن ارادا كەلىسىمشارت بار ەكەنى، بۇگىندە 8 وبەكتىسىندە تەكسەرۋ جۇمىستارى كەستەگە سايكەس ءجۇرىپ جاتقاندىعى ايتىلدى. ولاردىڭ قاتارىندا "ومىرزاق-ماەك"، "ماەك-جىلى جاعاجاي"، "جەتىباي-جاڭاوزەن" تاعى باسقا باعىتتارداعى تراسسالار بار. وكىنىشكە قاراي، اقتاۋ نەمەسە قالعان بەس اۋدانداعى اكىمدىكتەرمەن اراداعا ازىرگە بايلانىس جوق.

وبلىس ورتالىعىنا ەڭ جاقىن تۇرعان مۇنايلى اۋدانىنا ناۋرىز ايىنان بەرى ءۇش رەت قىزمەتتىك حات جازىلعان. الايدا بىردە-بىرىنە جاۋاپ كەلگەن جوق. تەك ماۋسىم ايىندا عانا قارسى تاراپ قوزعالىپ، ارىپتەستىك كەلىسىمگە وتىرۋعا ۋاعدالاسقان. بۇل، ەندىگى كەزەكتە اتالعان اۋدان اكىمدىگى وزىنە قاراستى اۋماقتا سالىنىپ جاتقان جانە ورتاشا جوندەۋ جاسالعان بارلىق تراسساعا جول ساپاسىن باقىلاۋشى مامانداردى شاقىرتىپ، جۇمىس ساپاسىن تەكسەرتە الادى دەگەن ءسوز.

بۇدان بولەك، تۇپقاراعان اۋدانىندا رەسمي تىركەلگەن ءۇش جەكە كومپانيا، ياعني جول سالۋشى مەردىگەر مەكەمە ورتالىققا اياقتاي كەلىپ، كەلىسىمشارتقا وتىرۋعا دايىن ەكەندىكتەرىن مالىمدەۋى قۋانتىپ وتىر. بۇل رەتتە ولار سالىپ نەمەسە قۇرىلىسىن اياقتاپ بولعان تراسسانىڭ ساپاسى تۋرالى مەملەكەتتىك قورىتىندىنى العا تارتاپ، اكىمدىككە اتقارىلعان جۇمىستار تۋرالى قۇجاتتاردى ەشقانداي كەدەرگىسىز تاپسىرا الاتىندىعى انىق.

"ەندىگى ۋاقىتتا ءدال وسىنداي بەلسەندىلىكتى اقتاۋ مەن جاڭاوزەن قالاسى، قاراقيا، ماڭعىستاۋ، بەينەۋ جانە تۇپقاراعان اۋداندارى اكىمدىگىنەن كۇتەمىز. ءوز كەزەگىندە، كەمشىلىگى دەر كەزىندە كورسەتىلىپ، تۇزەتىلگەن كولىك جولىنىڭ حالىق يگىلىگىنە ۇزاق جىلدار قولدانىسقا بەرىلۋىنە ىقپال ەتەرىمىزدى ۇمىتپايىق، ارىپتەستەر. بارلىعىمىز كوزدەگەنىمىز ءبىر مۇددە، ول كوپشىلىككە قىزمەت ەتۋ"، دەيدى ەلتاي قۇسپان ۇلى.

بريفينگ سوڭىندا س.قانىبەكوۆ سپيكەرگە العىسىن ءبىلدىرىپ، "ماڭعىستاۋ-ادالدىق الاڭى" جوبالىق كەڭسەسى مۇشەلەرىمەن بىرلەسە بەلسەندى ارەكەت ەتۋگە شاقىردى.

سوڭعى جاڭالىقتار

ۇقساس جاڭالىقتار