ايماقتار • 26 ماۋسىم، 2020

"جۇمىسپەن قامتۋدىڭ جول كارتاسى" ارقىلى 150 مىڭ تەڭگەدەن استام جالاقى الۋعا بولادى

271 رەت كورسەتىلدى

باعدارلاما بويىنشا 3 مىڭعا جۋىق جۇمىسسىز ازامات جۇمىسپەن قامتىلدى، دەپ حابارلايدى ەلوردا اكىمدىگىنىڭ رەسمي سايتى.

نۇر-سۇلتان قالاسىندا "جۇمىسپەن قامتۋدىڭ جول كارتاسى – 2020-2021" باعدارلاماسى ءساتتى جۇزەگە اسىرىلۋدا. "جول كارتاسى اياسىندا 15 مىڭ ادام جۇمىسپەن قامتىلادى. قازىرگى ۋاقىتتا باعدارلاما اياسىندا 2 956 ادام جۇمىسپەن قامتىلعان. نىسانداردا جۇمىسشىلار وتە قاجەت. باعدارلاما بويىنشا ەڭ از جالاقى 85 مىڭ تەڭگەنى قۇرايدى. بىراق قازىر قاراپايىم جۇمىسشى 150 مىڭ تەڭگەدەن استام جالاقى الادى"، – دەيدى قالالىق جۇمىسپەن قامتۋ ورتالىعىنىڭ ءبولىم باستىعى ازامات بايتاسوۆ. قازىرگى ۋاقىتتا بەيبىتشىلىك جانە كەلىسىم سارايى كۇردەلى جوندەۋدەن وتۋدە. مۇندا جۇمىسشىلار وتە قاجەت.

ء"بىز جۇمىسپەن قامتۋ ورتالىعىنان 45 قىزمەتكەر الدىق. گيدرووقشاۋلاۋ جۇمىستارى جۇرگىزىلۋدە. جاۋىن كەزىندە نىسانعا سۋ كەتەدى. قازىر بۇل ولقىلىقتار جويىلۋدا"، – دەيدى بەيبىتشىلىك جانە كەلىسىم سارايى مكقك باسشىسى ديلبار اميروۆا.

"جۇمىسپەن قامتۋدىڭ جول كارتاسى – 2020-2021" مەملەكەتتىك باعدارلاماسى ينفراقۇرىلىمدىق جوبالاردى جۇزەگە اسىرۋدى قاراستىرادى. باعدارلاما اياسىندا جۇمىسپەن قامتۋ ورتالىعى قاجەتتى بىلىكتىلىككە يە كادرلاردى ىرىكتەۋمەن اينالىسادى جانە ينفراقۇرىلىمدىق جوبالار بويىنشا جۇمىس بەرۋشىلەرمەن سۇحباتقا باعىتتايدى. جۇمىسپەن قامتۋ ورتالىعى قۇرىلىس، جوندەۋ، اباتتاندىرۋ جانە كوگالداندىرۋ سالاسىنداعى جۇمىستاردى ۇسىنادى.

ەسكە سالساق، نۇر-سۇلتان اكىمدىگىنىڭ جۇمىسپەن قامتۋ ورتالىعى ازاماتتارعا جانە جۇمىس بەرۋشىلەرگە ەڭبەك دەلدالدىعى، جۇمىسپەن قامتۋعا جاردەمدەسۋدىڭ بەلسەندى شارالارى، جۇمىسسىزدىقتان الەۋمەتتىك قورعاۋدى ۇيىمداستىرۋ بويىنشا مەملەكەتتىك قىزمەتتەردى ۇسىنادى. سونىمەن قاتار "ەڭبەك" جانە "جۇمىسپەن قامتۋدىڭ جول كارتاسى" مەملەكەتتىك باعدارلامالارىن جۇزەگە اسىرادى.

سوڭعى جاڭالىقتار

ۇقساس جاڭالىقتار