ساياسات • 26 ماۋسىم، 2020

بايقاۋ ناتيجەلەرىن جاريالادى

13 رەت كورسەتىلدى

پارلامەنت سەناتى بۇقارالىق اقپارات قۇرالدارى قىزمەتكەرلەرى كۇنى قار­ساڭىندا جۋرناليستەرگە ارنالعان «امانات» جانە «تۋعان ەل» باي­قاۋ­لارى­نىڭ قورىتىندىسىن جاريالادى. وعان رەسپۋبليكالىق جانە وڭىرلىك تەلەار­نالاردىڭ، مەرزىمدى باسىلىمداردىڭ تىلشىلەرى، بلوگەرلەر مەن تەلە­گرامم-ارنالاردىڭ اۆتورلارى قاتىسقان بولاتىن.

سەنات توراعاسى ماۋلەن اشىمباەۆ قاتىسۋ­شىلار مەن جەڭىمپازدارعا پالا­تانىڭ زاڭ شىعارۋ قىزمەتىن دارىپ­تەگەنى جانە ەلىمىزدىڭ كۇن تارتىبىندەگى ماسەلە­لەردى اقپاراتتىق تۇرعىدا ىلگەرىلەتۋدەگى ەرەن ەڭبەكتەرى ءۇشىن العىس ءبىلدىردى.

«بىلتىر مەملەكەت باسشىسىنىڭ باستاماسىمەن ەلىمىزدە جۋرناليستەر­دىڭ كاسىبي مەرەكەسى – بۇقارالىق اقپارات قۇرالدارى قىزمەتكەرلەرى كۇنى رەسمي تۇردە بەكىتىلدى. بۇل قادام ءتۇرلى وقيعالار مەن ەلىمىزدە قولعا الىنعان رەفورمالار تۋرالى حالىققا شىنايى جانە جەدەل حابار تاراتاتىن ماماندارعا دەگەن قۇرمەتتىڭ بەلگىسى. قازىرگى كۇردەلى ۋاقىتتا جۋرناليستەر دارىگەرلەرمەن، قۇقىق قورعاۋ ورگاندارىنىڭ قىزمەتكەرلەرىمەن جانە ەرىكتىلەرمەن بىرگە كوروناۆيرۋس ىندەتىمەن كۇرەستە الدىڭعى شەپتە ءجۇر. ولار قاۋىپ-قاتەرگە قاراماستان، ازا­مات­تاردىڭ دالەلدى ءارى دايەكتى اقپارات الۋى ءۇشىن ايانباي جۇمىس ىستەۋدە. وتاندىق جۋرناليستەردىڭ قىزمەتى ءاردايىم جوعارى باعاعا لايىق»، – دەدى ماۋلەن اشىمباەۆ.

سونداي-اق سەنات توراعاسى «امانات» جانە «تۋعان ەل» بايقاۋلارىنا ۇسى­نىلعان ەڭبەكتەردىڭ كاسىبي دەڭگەيدە دايىندالعانىن اتاپ ءوتتى. ونىڭ ايتۋىنشا، سەسسيا بارىسىنداعى زاڭ شىعارۋ قىزمەتى، سەناتورلاردىڭ ساۋالدارى مەن كوپتەگەن پارلامەنتتىك شارالار ماز­مۇندى تەلەۆيزيالىق سيۋجەتتەرگە، جان-جاقتى ساراپتامالىق ماقالالارعا، رەپورتەرلىك زەرتتەۋلەر جاساۋعا ارقاۋ بولعان.

بايقاۋعا كەلىپ تۇسكەن ماتەريالداردى ساراپتاۋ كوميسسيالارى مۇقيات تالداپ، ءوز باعالارىن بەردى. كوميسسيا قۇرامىنا سەنات دەپۋتاتتارى، بەلگىلى جازۋشىلار مەن جۋرناليستەر ەنگەنىن ايتا كەتكەن ءجون. كونكۋرس قورىتىندىسى بويىنشا جەڭىمپازدار مەن جۇلدەگەرلەردەن بولەك، بىرنەشە ارنايى ماراپاتتار دا تاعايىندالدى.

 

«امانات» بايقاۋىنىڭ لاۋرەاتتارى:

گران-پري – وڭعار توقانوۆ، «Qazaqstan» تەلەارناسىنىڭ ءتىلشىسى;

ءبىرىنشى ورىن – جادىرا جول­مۇحامەتوۆا، «ينفورمبيۋرو» اقپارات اگەنتتىگىنىڭ ءتىلشىسى;

ەكىنشى ورىن – لاۋرا تۇسىپبەكوۆا، «كا­زاح­ستان­سكايا پراۆدا» گازەتىنىڭ ءتىلشىسى;

ءۇشىنشى ورىن – تاتيانا كوۆالەۆا، «Zakon.kz» پورتالىنىڭ ءتىلشىسى.

 «تۋعان ەل» بايقاۋىنىڭ لاۋرەاتتارى:

گران-پري – ازامات قاسىموۆ، «Egemen Qazaqstan» گازەتىنىڭ ءتىلشىسى;

ءبىرىنشى ورىن – «ەۋرازيا» ءبىرىنشى ارناسىنىڭ» «سەنات online» تەلە­جوبا­سىنىڭ ۇجىمى;

ەكىنشى ورىن – ميرلان التىنبەك، «حابار 24» اگەنتتىگىنىڭ ءتىلشىسى;

ءۇشىنشى ورىن – ءامىربولات حۋسايان، «Azat­tyq Ruhy» اقپارات اگەنتتىگىنىڭ ءتىلشىسى­.

بايقاۋ كوميسسياسىنىڭ شەشىمىمەن بلوگەرلەرگە، تانىمال جاريالانىم­دار­دىڭ اۆتورلارى مەن ەرەكشە اقپارات­تىق ماتەريالدارعا ارنايى ماراپاتتار تاعايىندالدى. ولاردىڭ قاتارىندا:

عازيز ابىشەۆ – Abishev Analytics تەلەگرامم-ارناسىنىڭ اۆتورى;

يۆان سۋحورۋكوۆ پەن رومان پاۆلوۆ – «Tengrinews» ينتەرنەت-رەسۋرسى­­نىڭ ءجۋرناليسى جانە بەينەينجەنەرى;

ۇلپان بەگالينا – «Atameken business» ارناسىنىڭ ءتىلشىسى;

ايحان ءشارىپوۆ – «AIQYN» گازەتىنىڭ ءتىلشىسى;

سىرىم يتقۇلوۆ – «Hola news» شەف-رەداكتورى;

«Ainews» جانە «Aitube.kz» ينتەرنەت جوبالارىنىڭ ۇجىمدارى بار.

ۇيىمداستىرۋشىلار بايقاۋعا بەلسەندى قاتىسقانى ءۇشىن بارلىق قاتىسۋشىلارعا العىس بىلدىرەدى. وسى رەتتە COVID-19 ىندەتىنىڭ تارالۋ قاۋپى سەيىلمەۋىنە بايلانىستى جۋرناليستەرمەن ءداستۇرلى كەزدەسۋ جانە لاۋرەاتتاردى ماراپاتتاۋ ءراسىمىن 2020 جىلدىڭ كۇزىنە اۋىستىرۋ تۋرالى شەشىم قابىلداندى.

سوڭعى جاڭالىقتار

شىعىسقا قار ءتۇستى

ايماقتار • كەشە

ۇقساس جاڭالىقتار