ۇلتتىق شۇعىل مەديتسينانى ۇيلەستىرۋ ورتالىعى باسقارما توراعاسىنىڭ مىندەتىن اتقارۋشى باۋىرجان ءجۇسىپوۆ ەلىمىزدەگى جەدەل جاردەم قىزمەتىنىڭ الەۋەتى مەن قازىرگى كۇردەلى جاعدايعا بايلانىستى ماسەلەلەرىن اتاپ ءوتتى.
قازاقستان بويىنشا جەدەل مەديتسينالىق كومەك قىزمەتى 18 دەربەس جەدەل مەديتسينالىق كومەك ستانساسىنان, 87 قالالىق كىشى ستانسادان جانە 288 اۋداندىق جەدەل كومەك بولىمشەسىنەن تۇرادى ەكەن. جالپى, ەلىمىزدە جەدەل كومەك شاقىرتۋلارىنا 1400-گە جۋىق جەدەل مەديتسينالىق كومەك بريگاداسى قىزمەت كورسەتەدى. ونىڭ 23 پايىزى – مامانداندىرىلعان دارىگەرلىك بريگادا, 77 پايىزى – فەلدشەرلىك بريگادا.
ال سانيتارلىق اۆتوكولىكپەن جابدىقتالۋ 93 پايىزدى قۇرايدى. قازىرگى تاڭدا 1967 سانيتارلىق اۆتوكولىك بار. 2019 جىلى جەدەل كومەك اۆتوكولىكتەرىنىڭ تاپشىلىعىن جابۋ ماقساتىندا وڭىرلەردە 293 كولىك ساتىپ الىندى. بيىل 807 كولىك ساتىپ الۋ جوسپارلانىپ وتىر. بارلىق كولىكتەر وتاندىق اۆتوكولىك وندىرۋشىلەردەن ليزينگ اياسىندا ساتىپ الىنادى. قازىرگى ۋاقىتتا جەدەل كومەك كولىكتەرىن كەزەڭ-كەزەڭىمەن دايىنداۋ جانە جەتكىزۋ جۇرگىزىلىپ جاتىر. جالپى, بارلىق كولىكتەر وسى جىلدىڭ قاراشا ايىنىڭ سوڭىنا دەيىن پايدالانۋعا بەرىلمەك.
– وسى جىلدىڭ 5 ايىندا جەدەل كومەك بريگادالارى 3 ملن-نان اسا شاقىرتۋ بويىنشا كومەك كورسەتتى. جالپى, رەسپۋبليكا بويىنشا جەدەل مەديتسينالىق كومەك بريگادالارى كۇنىنە 18 مىڭ شاقىرتۋعا شىقتى. سونىمەن قاتار وسى جىلدىڭ ماۋسىم ايىندا جەدەل كومەك شاقىرتۋلاردىڭ 10 پايىزعا وسكەنى بايقالادى. ونىڭ ىشىندە ايتارلىقتاي ءوسىم 15-22 ماۋسىم ارالىعىندا تىركەلدى. بۇل كۇندەرى جەدەل كومەك بريگادالارى تاۋلىگىنە 22 مىڭنان اسا شاقىرتۋلارعا قىزمەت كورسەتتى. وڭىرلەر بولىنىسىندە شاقىرتۋلاردىڭ ءوسۋى اقتوبە, قىزىلوردا وبلىستارىندا, شىمكەنت, الماتى جانە نۇر-سۇلتان قالالارىندا بايقالىپ وتىر. وسىعان بايلانىستى جەدەل كومەك بريگاداسىنىڭ شاقىرتۋ ورنىنا دەيىن كەلۋ ۋاقىتى 12 مينۋتتان 13 مينۋتقا ارتقانى بايقالادى. بۇل رەتتە بەكىتىلگەن ەرەجەگە سايكەس كەلۋ ۋاقىتى شاقىرتۋلاردىڭ جەدەلدىك ساناتىنا بايلانىستى ەكەنىن ايتا كەتۋ كەرەك. ياعني ناۋقاستىڭ ومىرىنە نەمەسە دەنساۋلىعىنا قاۋىپ تونگەن جاعدايدا جەدەل مەديتسينالىق كومەك بريگادالارىنىڭ كەلۋ ۋاقىتى 10-15 مينۋتتان اسپاۋى ءتيىس. ال پاتسيەنتتىڭ ومىرىنە, دەنساۋلىعىنا ايقىن قاۋىپ بولماعان جاعدايدا كەلۋ ۋاقىتى 60 مينۋتقا دەيىن وزگەرەدى, – دەدى باۋىرجان ءجۇسىپوۆ.
بۇعان قوسا سپيكەر كوروناۆيرۋس ينفەكتسياسىن دياگنوستيكالاۋ جانە ەمدەۋدىڭ كلينيكالىق حاتتاماسىنا سايكەس پاتسيەنتتەرگە جەدەل كومەك كورسەتۋ الگوريتمى بەكىتىلگەنىن اتاپ ءوتتى. وسىلايشا جەدەل كومەك بريگاداسى شاقىرتۋعا قىزمەت كورسەتۋ كەزىندە ءبىرىنشى كەزەكتە پاتسيەنتتىڭ جالپى جاي-كۇيى, ەنتىگۋىنىڭ بار بولۋى, مينۋتىنا تىنىس الۋ جيىلىگى, دەنە قىزۋى جانە قانىنىڭ وتتەگىمەن قانىعۋى باعالانادى جانە وسى كورسەتكىشتەرگە بايلانىستى ودان كەيىنگى ءادىس انىقتالادى. اۋرۋدىڭ جەڭىل اعىمى انىقتالعان جاعدايدا ەنتىگۋ جانە قاۋىپ فاكتورلارى جوق پاتسيەنت ۇيدە قالدىرىلادى. ءارى قاراي ەمحانانىڭ ۋچاسكەلىك دارىگەرىنىڭ قاداعالاۋىنا جىبەرىلەدى. ەگەر پاتسيەنتتە اۋىر نەمەسە ورتاشا اۋىر اعىمى, سونداي-اق قاۋىپ فاكتورى بار, ياعني جاسى 60-تان اسقان, قانت ديابەتى, وكپەنىڭ سوزىلمالى اۋرۋلارى سياقتى اۋرۋلار بولعان كەزدە ودان ءارى ەمدەۋ ءۇشىن ستاتسيونارعا جەتكىزىلەدى.
جالپى, قازىرگى ۋاقىتتا جەدەل مەديتسينالىق كومەك بريگادالارىنىڭ بارلىق قىزمەتكەرى كوروناۆيرۋس ينفەكتسياسىمەن اۋىراتىن ناۋقاستاردى انىقتاۋ الگوريتمىنە وقىتىلعان. بارلىق قاجەتتى مەديتسينالىق جابدىقتارمەن, دارىلىك زاتتارمەن جانە قورعانۋ قۇرالدارىمەن جابدىقتالعان.
سونىمەن قاتار باۋىرجان ءجۇسىپوۆ جەدەل كومەك ستانسالارىنىڭ جانىنان ارنايى call-ورتالىقتار قۇرىلعانىن, وندا مەديتسينالىق كومەك كورسەتۋ ماسەلەرى بويىنشا بىلىكتى ماماندار كەڭەس بەرىپ جاتقانىن ايتتى.
بۇعان قوسا پرەزيدەنتتىڭ تاپسىرماسىن ورىنداۋ ماقساتىندا كوروناۆيرۋسپەن كۇرەس اياسىندا ەپيدەمياعا قارسى شارالاردى جۇرگىزۋگە تارتىلعان مەديتسينا قىزمەتكەرلەرىن ىنتالاندىرۋ جانە قولداۋ ءۇشىن جەدەل مەديتسينالىق كومەك قىزمەتكەرلەرىنە قوسىمشا تولەمدەر قاراستىرىلعان ەكەن. وسى جىلدىڭ مامىر ايىندا جەدەل مەديتسينالىق كومەكتىڭ 11 823 قىزمەتكەرىنە 2 ملرد تەڭگەدەن اسا قوسىمشا تولەماقى بەرىلدى.
ءوز كەزەگىندە نۇر-سۇلتان قالاسىنىڭ جەدەل مەديتسينالىق جاردەم ستانساسىنىڭ ديرەكتورى مۇرات ورازباەۆ ەلوردادا ەپيدەميالىق جاعدايدىڭ ناشارلاۋىنا بايلانىستى 103 قىزمەتىنە تۇسەتىن جۇكتەمە ارتقانىن مالىمدەدى.
ونىڭ ايتۋىنشا, ماۋسىم ايىنىڭ باسىنان باستاپ وتىنىشتەر سانى 4 ەسەگە ءوستى. تاۋلىگىنە ەلوردا تۇرعىندارىنان 4 مىڭنان اسا ءوتىنىش كەلىپ تۇسەدى. قوڭىراۋلار سانى ەكى ەسە ارتتى. كوشپەلى بريگادا تاۋلىگىنە 3 مىڭعا جۋىق قالا تۇرعىنىنا مەديتسينالىق كومەك كورسەتەدى.
قازىرگى ۋاقىتتا جەلىدە 118-دەن اسا كوشپەلى بريگادا جۇمىس ىستەيدى. بارلىق كوشپەلى بريگادا قاۋىپسىز جۇمىس ءۇشىن جەكە قورعانىس قۇرالدارىمەن قامتاماسىز ەتىلگەن جانە مەديتسينالىق جابدىقتارمەن 100% جاراقتاندىرىلعان.
– جەدەل مەديتسينالىق جاردەمنىڭ ديسپەتچەرلىك قىزمەتى بازاسىندا سovid-19 ماسەلەلەرى بويىنشا وتىنىشتەردى قابىلداۋ ءۇشىن بايلانىس ورتالىعىنىڭ قىزمەتى ۇيىمداستىرىلعان. قاجەتتى كەڭەس الۋ ءۇشىن قالا تۇرعىندارى 705-103 نومىرىنە حابارلاسا الادى. ەلوردادا كۇن سايىن 5-7 ادامعا دەيىن اۋىراتىن تۇتاس وتباسى تۇرىندەگى جاڭا ينفەكتسيا وشاقتارى انىقتالادى. بۇل جاعدايلار وتباسىلىق سالتاناتتاردى وتكىزۋ كەزىندە انىقتالادى, بۇعان جول بەرىلمەيدى. قاتاڭ سانيتارلىق نورمالاردى ساقتامايتىن ادامداردىڭ بەيقامدىعى وتباسىنىڭ مۇشەلەرىن, سونىڭ ىشىندە قاريالار, بالالار, جۇكتى ايەلدەردىڭ جۇقتىرۋىنا اكەپ سوقتىرادى, – دەدى مۇرات ورازباەۆ.
ازاماتتار ەلدەگى جاعدايدىڭ ۋشىعىپ بارا جاتقانىن ەسكەرىپ, سانيتارلىق نورمالاردى قاتاڭ ساقتاۋ, الەۋمەتتىك قاشىقتىقتى ۇستاۋ, ادامدار كوپ جينالاتىن جەرلەرگە بارماۋ سياقتى ساقتىق شارالارىنا بارىنشا ءمان بەرۋى كەرەك.
