"ەلوردالىق ءدارىحانالاردا تۇرعىندارعا قاجەتتى بارلىق ءدارى-دارمەكتەر بولۋى كەرەك. ءدارى-دارمەكتەردىڭ نەگىزگى اسسورتيمەنتىنىڭ بولۋىن باقىلاۋ قاجەت. دارىحانالارعا ءدارى-دارمەكتەردى ۋاقتىلى جانە جەتكىلىكتى مولشەردە ساتىپ الۋ كەرەك", دەدى نۇر-سۇلتان اكىمىنىڭ ورىنباسارى باقتيار ماكەن ءدارىحانا جەلىلەرى باسشىلارىمەن ونلاين-كەزدەسۋدە.
ء"بىز كوتەرمە ءدارىحانا ۇيىمدارىنا نۇر-سۇلتان قالاسىنىڭ دارىحانالىق ۇيىمدارىنا ءدارى-دارمەكتەر مەن مەديتسينالىق ماقساتتاعى بۇيىمداردى ۇزدىكسىز جەتكىزۋدى ۇيىمداستىرۋدى تاپسىرامىز", دەپ اتاپ ءوتتى ب.ماكەن.
"نۇر-سۇلتان قالاسىنىڭ فارماتسەۆتيكالىق اسسوتسياتسياسى" زاڭدى تۇلعالاردىڭ قوعامدىق بىرلەستىگى ديرەكتورى گۇلناراي المۋرزينانىڭ ايتۋىنشا, كەيبىر ءدارى-دارمەكتەردىڭ تاپشىلىعى بايقالادى.
"وتكەن اپتادان باستاپ قالا تۇرعىندارى ۆيرۋسقا قارسى پرەپاراتتار, ازيتروميتسين انتيبيوتيكتەرىن ساتىپ الدى. ءبىز اناليز جۇرگىزىپ, ءدارى-دارمەكتەردىڭ 41 اتاۋى كورسەتىلگەن كەستە قۇردىق. مەملەكەتتىك اگەنتتىكتىڭ ءدارى-دارمەكتەردى حالىققا قانشا مولشەردە تاراتۋعا بولاتىندىعى تۋرالى مەموراندۋمعا قول قويۋعا شەشىم قابىلداندى. ال انتيبيوتيكتەر مەن رەتسەپت بويىنشا ءدارى-دارمەكتەر, بۇرىنعىداي, دارىگەردىڭ نۇسقاۋىمەن عانا جىبەرىلەدى", – دەدى گ.المۋرزينا.
سونىمەن بىرگە, ول دەنە قىزۋىن تۇسىرەتىن ءدارى-دارمەكتەردىڭ جەتىسپەۋشىلىگىن ەسكەرە وتىرىپ, ولاردىڭ بالاما نۇسقالارى بارىنا نازار اۋداردى: "پانادول", "ەفەرالگان", "يبۋپروفەن", "يبۋفەن", "ميگ", "نوۆيگان", ولار ءدارىحانالاردا بار.
24 ماۋسىمداعى جاعداي بويىنشا كوروناۆيرۋس جۇقتىرۋدىڭ 3484 جاعدايى تىركەلدى. ونىڭ ىشىندە 2 501 ناۋقاس (69%) ەمدەلىپ شىقتى جانە 38 ءولىم جاعدايى (1,1%) ورىن الدى.
كۇندەلىكتى پنەۆمونيامەن اۋرۋحاناعا تۇسەتىن ناۋقاستاردىڭ سانى ارتتى, ولاردىڭ ءار ەكىنشىسى ۆيرۋستىق پنەۆمونيا. ولاردىڭ 90-ىنىڭ جاعدايى ورتاشا اۋىر. وسىعان بايلانىستى مەديتسينالىق ۇيىمدار مەن دارىگەرلەرگە ۇلكەن جۇكتەمە جۇكتەلەدى. اكىمنىڭ ورىنباسارى ازاماتتاردى كوروناۆيرۋس ينفەكتسياسىن جۇقتىرماس ءۇشىن قاتاڭ سانيتارلىق قاۋىپسىزدىك شارالارىن ساقتاۋعا شاقىردى: ماسكا, قولعاپ كيىپ, قولدى سابىنمەن ءجيى جۋىپ, الەۋمەتتىك قاشىقتىق ساقتاۋ قاجەت.
