بۇگىندە وبلىس بويىنشا 1 547 باسپانا پايدالانۋعا بەرىلدى, ونىڭ ىشىندە – 931 جەكە ءۇي.
"نۇرلى جەر" مەملەكەتتىك باعدارلاماسى شەڭبەرىندە 2020 جىلى ينجەنەرلىك-كوممۋنيكاتسيالىق ينفراقۇرىلىم جانە تۇرعىن ءۇي قۇرىلىسىنا 21,1 ملرد تەڭگە ءبولىنىپ, 49 جوبا ىسكە اسىرىلادى. وسىلايشا 2 439 جۇمىس ورنىن قۇرۋ كوزدەلگەن.
اقتوبە وبلىسىندا بيىل 65 مىڭ شارشى مەتر جالعا بەرىلەتىن تۇرعىن ءۇي جانە كرەديتتىك تۇرعىن ءۇي پايدالانۋعا بەرۋ جوسپاردا بار. بۇل – 1 142 پاتەر. اتالعان ەكى باعىتتاعى جۇمىستى ىسكە اسىرۋ ءۇشىن 1800-گە جۋىق جۇمىس ورنى اشىلماق.
بۇدان باسقا, "نۇرلى جەر" مەملەكەتتىك باعدارلاماسى اياسىندا 2% نەسيە بەرىلەتىن "باقىتتى وتباسى" باعدارلاماسىن جۇزەگە اسىرۋعا اعىمداعى جىلى رەسپۋبليكالىق بيۋدجەتتەن وبلىس اكىمدىگىنە 302 تۇرعىن ءۇي قارىزىنا 3 ملرد. تەڭگە قاراستىرىلعان.
سونىمەن قاتار, تۇرعىن ءۇي قۇرىلىسى اۋداندارىنا ينجەنەرلىك-كوممۋنيكاتسيالىق ينفراقۇرىلىم جۇرگىزۋگە ارنالعان 24 جوبانى ىسكە اسىرۋ ءۇشىن 7,9 ملرد تەڭگە قاراستىرىلعان. بۇل رەتتە 661 ادامدى جۇمىسپەن قامتۋ كوزدەلىپ وتىر.
