ەندى Mac قۇرىلعىلارى تەك Apple Silicon اتتى پروتسەسسورلارمەن عانا شىعاتىن بولادى. كومپانيا بۇعان دەيىن Intel ونىمدەرىن پايدالاناتىن ەدى.
بۇل iPhone نەمەسە iPad-تارعا قويىلاتىن ARM-چيپ ەمەس, بۇل ازىرگە تەڭدەسسىز اناعۇرلىم كۇشتى پروتسەسسورلار ەكەنى ايتىلۋدا. Apple A4-تەن باستاپ A13-كە دەيىن چيپسەتتەر جاساۋدى ءوزى جۇزەگە اسىرىپ, وسى ۋاقىت ارالىعىندا ءتيىمدى پروتسەسسور جاساۋدى ابدەن مەڭگەردى. وسى كەزەڭدە iPhone-نىڭ ونىمدىلىگى 100 ەسەگە ارتقان. سول سەبەپتى كومپانيانىڭ جاڭا ءونىمى ەڭ ۇزدىك پروتسەسسور بولۋعا لايىق.
جاڭا وپەراتسيالىق جۇيە iOS 14 كورسەتىلدى. جۇيە ءار جاڭارعان سايىن ستيۆ دجوبس ءىزباسارلارى وعان ەلەۋلى جاڭالىق ەنگىزىپ وتىرادى. ەندى گادجەتتەگى قولدانبالار اۋتوماتتى تۇردە توپتاستىرىلادى. وعان قوسا ولشەمدەرى ءار ءتۇرلى اۋا رايى نەمەسە ساعات سياقتى ۆيدجەتتەردى ەكرانعا قولدانۋشى ءوزى قويا الادى. Siri اتتى كومەكشى بۇدان بىلاي 20 ەسە جىلدام جۇمىس ىستەيتىن بولىپتى.
كومپيۋتەر مەن نوۋتبۋككە ارنالعان macOS Big Sur دەپ اتالاتىن جاڭا وپەراتسيالىق جۇيەنىڭ تۇساۋى كەسىلدى. ول ديزاين جاعىنان جاڭارعان جانە ينتەرفەيسى بارىنشا ءموبيلدى iOS جۇيەسىنە ۇقساتىپ جاسالعان. جۇيەدە ۆيدجەتتەردىڭ ولشەمىن وزگەرتۋگە بولادى. Safari براۋزەرى ەندى 50 پايىزعا جىلدام جۇمىس ىستەيدى جانە ونىڭ كوپتەگەن فۋنتسيونالدىق مۇمكىندىكتەرى جەتىلدىرىلگەن.
سونىمەن بىرگە Apple كومپانياسىنىڭ قول ساعات تۇرىندەگى گادجەتتەرى مەن پلانشەتتەرى ءۇشىن جاڭادان watchOS 7 جانە iPadOS 14 سياقتى جاڭا وپەراتسيالىق جۇيەلەردىڭ شىققانى جانە AirPods قۇلاققابىنىڭ جەتىلدىرىلگەنى ايتىلدى.
