كوش باسىن نۇر-سۇلتان قالاسىنىڭ ىرگەسىنە بۇرعان حالىقتىڭ كوبەيۋىنە بايلانىستى تسەلينوگراد, ارشالى, شورتاندى اۋداندارىندا مەكتەپ جەتىسپەۋشىلىگى ورىن الۋدا. ءوڭىر مەكتەپتەرىن وقۋشىلار سانىنا بەيىمدەۋ جانە نەگىزگى عيماراتقا قوسىمشا قۇرىلىس جۇرگىزۋ – ماسەلەنى رەتكە كەلتىرۋگە باعىتتالعان ناتيجەلى قادام. وسى ماقساتقا "جۇمىسپەن قامتۋدىڭ جول كارتاسى - 2020" باعدارلاماسى اياسىندا 8,8 ملرد تەڭگە بولىنگەن. بۇل قارجىعا وڭىردەگى 102 ءبىلىم بەرۋ مەكەمەسىنە جوندەۋ جۇرگىزىلەدى.
"بيىل وبلىس اۋماعىندا 161 جوبا بويىنشا جوندەۋ جۇمىستارى جۇرگىزىلۋدە. مەملەكەت تاراپىنان ءبىلىم سالاسىنا ايرىقشا زور قامقورلىق جاسالىپ وتىر", دەيدى وبلىستىق ءبىلىم باسقارماسىنىڭ باسشىسى بەيبىت ءجۇسىپوۆ.
وتكەن جىلدارمەن سالىستىرعاندا ءبىلىم وشاقتارىن جوندەۋ كولەمى ەكى ەسە كوبەيگەن. ماسەلەن, وتكەن جىلى وڭىردەگى 12 ءبىلىم وشاعىنا كۇردەلى جوندەۋ جاسالسا, بيىل 32 نىسان تۇبەگەيلى جاڭعىرتىلادى. وزگە 129 نىساندا عيماراتتىڭ ارلەۋ جۇمىستارى, جىلۋ قازاندىقتارىن ورناتۋ, شاتىر الماستىرۋ ءتارىزدى اعىمداعى جوندەۋ جۇمىستارى اتقارىلۋدا.
"2020 جىلى اتباسار اۋدانىندا "جۇمىسپەن قامتۋدىڭ جول كارتاسى" اياسىندا 498 ملن تەڭگە ءبولىندى. بۇل قارجىعا 2 كۇردەلى جانە 6 اعىمداعى جوندەۋ جۇمىستارى جاسالادى", دەيدى اتباسار اۋداندىق ءبىلىم ءبولىمىنىڭ جەتەكشىسى ناتاليا نايمۋشينا.
اقمولا وبلىسىندا 556 مەكتەپ بار. نۇر-سۇلتان قالاسىنىڭ ىرگەسىندەگى اۋدانداردا ورىن جەتىسپەسە, شالعايداعى شاعىن اۋىلدارداعى تيپتىك جوبامەن سالىنعان عيماراتتاردا وقيتىن بالا سانى از. ول جەرلەردە مەكتەپتى ۇستاپ تۇرۋعا قىرۋار قارجى جۇمسالۋدا. وسى ءبىر ماسەلە جان-جاقتى شەشىم قابىلداۋدى قاجەت ەتەدى.
