ءسىز – ولەڭسىز!

ادەبيەت • 23 ماۋسىم، 2020

ءسىز – ولەڭسىز!

224 رەت كورسەتىلدى

ولەڭدى تۇسىنەرسىڭ – ءوزى جوقتا…
ءومىردى تۇسىنەرسىڭ – كۇزدە عانا…

جاننا ەلەۋسىز

ولەڭ – جۇرەكتىڭ ءسوزى. ول جاننىڭ تولقىنىسىنان تۋسا كەرەك. كوڭىلدەگى كىربىڭ، زار، مۇڭ، ساعىنىش پەن وكىنىش، ارمان مەن اڭساردىڭ ءتۇبى – ولەڭ. ءمولدىر ولەڭ. ەشكىم جازايىن دەپ جازبايدى ء(ھام جازبايىن دەپ جازباي كەتپەيدى ەكەن). اقىن قالامىنان تۋعان ولەڭنىڭ ءبارى – ءومىردىڭ ءىسى. جالپى، ولەڭدى جازۋ دا، ولەڭدى وقۋ دا – جۇرەكپەن. ادام كەز كەلگەن ۋاقىتتا ولەڭگە بارمايتىنى تاعى انىق. قۇلازيدى. كوڭىلى بوسايدى. جالىعادى. بالكي، بىرەۋدى ساعىنار. سوسىن ولەڭ وقيدى. اقىن سوزىمەن جىرتىق كوڭىلىن جامايدى. جۇبانادى.

مارجان ءابىش

كوللاجدى جاساعان امانگەلدى قياس، «EQ»

قامىعىپ تۇسسە قارا ءتۇن

اينالار جىرعا كۇندىزگى وي…

ايدان دا اپپاق قاناتى

بۇل پىراق – بىزدەي ءبىر قىز عوي!..

قاباعىن بەرمەي كەيدە ءۇمىت،

جۇرەگىمىزدەن ءجۇن ءتۇتىپ!..

تىرىدە – اقىن… دەيدى جۇرت

ولگەننەن كەيىن – ءپىر تۇتىپ…

جانىمىز – كىتاپ كونەرگەن.

جارىعى – سوناۋ جۇلدىزدى ءىز!

جۇباتىپ ەلدى ولەڭمەن

كورىنبەي جەردە – ءجۇرمىز ءبىز…

ءتۇرلى تاعدىرلار توعىسقان جۇمىر جەردىڭ بەتىندە «كورىنبەي» ءجۇرىپ، تالاي جۇرەكتى جىلىتقان اقىن – جاننا ەلەۋسىز. مىنا حالىق جاننا ەلەۋسىزدىڭ ءوزىن بىلمەسە دە، ولەڭىنە قۇشتار. اقىن قالامىنان ءوز كۇيىن سەزگەن جۇرت – ولەڭدى قاپسىرا قۇشاقتاپ، ءتىپتى جىبەرگىسى كەلمەيدى. كوڭىل پەرنەسىن شەرتكەن ءمولدىر ولەڭگە جۇرەگىن شايىپ وتىرا بەرگىسى كەلەدى. قايتسىن... وسى جالعانداعى ءاربىرىمىز جىلت ەتكەن ۇمىتكە قۇلاي كەتىپ، جانىمىزعا ءدارۋ ىزدەپ ۇيرەنىپ قالعان جوقپىز با؟!. سودان بولار، ءار جۇرەكتە اقىننىڭ ءبىر ولەڭى قالدى. ماڭگىلىك.

...مەنىڭ جانىم ۇستىندەگى جەيدەسىن

جابادى ءۇنسىز جىلاعانعا:

«توڭاسىڭ»...

نەگە وسى قوڭىر كۇزدە ەڭسەنى مۇڭ باسادى؟ سارعايىپ تۇسكەن جاپىراقتا ساعىنىشىمىز بارداي ءبىرتۇرلى قيمايمىز. الدە كۇزدىڭ ەكىنشى اتى ساعىنىش پا... نەگە ادامدار كۇزدىڭ جاۋىنىنا جاسىن جاسىرادى؟ تال-اعاش بىتكەننىڭ ءبارى جاپىراعىنان ايىرىلىپ، سۇرەڭسىز قالىپتا قالۋى – ادامداردىڭ شاراسىزدىعىن سەزدىرەتىن بولار، ءسىرا. كوڭىلدىڭ جەل-قايىعىن تەربەگەن كۇرەڭ كۇز اقىن قالامىنا دا ءجيى ىلىگىپتى. بەينەبىر، سارعىش تارتقان ءار جاپىراق اقىننىڭ ءبىر ولەڭىن قۇشىپ، جەرگە اسىققانداي. بالكي، وسى تىرشىلىكتەگى بار بەلگىسىزدىكتىڭ سىرىن كۇز عانا بىلەتىن شىعار. سول ءۇشىن جاننا ەلەۋسىز ءوز مەزگىلىنە اسىعاتىن بولار...

...بوياۋى از مەزگىل –

كوپ نارسە بىلەتىن سەكىلدى:

قاي قۇستىڭ – قاي جاققا قونارىن،

قاي باقتى – قانداي جەل تونارىن،

قاي بۇلتتىڭ – جاڭبىر بوپ جاۋارىن،

قاي سۇراق – الارىن جاۋابىن،

قاي جارىق – ۇزاقتاۋ جانارىن،

قاي ارىق – قاي كولگە تامارىن،

قاي تەڭىز – قاي كۇنى شەگىنەن شىعارىن،

قاي جۇلدىز – قاي ءتۇنى كوگىنەن قۇلارىن،

قاي مۇڭنىڭ – قانشاعا جەتەرىن،

قاي شاتتىق – وتەرىن، كەتەرىن،

قاي ارمان – قاي كۇنى ورىندالارىن،

قاي سۇمنىڭ – ولگەنشە جولىن باعارىن،

قاي ءسوزدىڭ – قانشالىق بەكەمىن،

قاي ولەڭ – عاسىرلىق ەكەنىن...

تۇنەرىپ بىرەسە،

بىرەسە كۇلەدى كۇن – نەسىن؟

بۇل – كۇز عوي:

بىلگەسىن...

كەيدە ولەڭ اقىننىڭ كوز جاسى سياقتى. قوسىلىپ سەن دە جىلايسىڭ. كەيدە قارا ءتۇندى بۇزىپ-جارىپ ەستىلگەن شات كۇلكى سياقتى. وندا دا تىمىرايىپ وتىرمايسىڭ: سەن دە جىمياسىڭ. ولەڭ تابيعاتى جانىڭا مەدەۋ بولعان سوڭ اقىننىڭ كوڭىل كۇيىنەن الىستاپ كەتكىڭ كەلمەيدى. قاشاندا اقىن جانىنىڭ تولقىنىمەن بىرگە جۇزگىڭ كەلەدى. ويتكەنى ەكى جۇرەكتىڭ اراسىندا پەردە جوق. تەك ۇقساستىق بار. كەيدە سەندەگى وي ولەڭنەن تابىلادى. ءوز ءسوزىڭنىڭ اقىن قالامىمەن جىمداسىپ، ۇندەسىپ جاتقانىنا ارينە ءىشىڭ جىليدى. بىراق سەندەگى تەرەڭدە تۇنىپ جاتقان مارجان-سىردى كۇللى جۇرتقا جايىپ سالعان ولەڭگە، ءبىر جاعى، وكپەلەيسىڭ.

...اڭىز عانا – ولمەي قالدى.

از...

ايتپەسە، ناعىز ادام...

جۇرەگىمدى سەزبەيدى الگى...

قالاسى كووپ تاعى زامان.

باسپانا بوپ جانىما ولەڭ.

كەتەم شىعار...

ءسۇيىپ ەلەس.

...مەن بىرەۋدى ساعىنار ەم!

اتتەڭ...

ەشكىم – بيىك ەمەس...

P.S. ءبىز اقىن ەمەسپىز. قۇداي بىزگە ولەڭگە تەبىرەنىپ، جۇبانىش تابار جولدى عانا بۇيىرىپتى. ال جاننا ەلەۋسىز – شىن اقىن. دۇنيەدەگى ەڭ نازىك كوبەلەكتىڭ قاناتى دەرسىز. بىزدىڭشە، اۋەلدە ادامنىڭ جانى نازىك، سودان سوڭ جاننا ەلەۋسىزدىڭ قالامى نازىك سەكىلدى. اقىن ولەڭدەرى جۇرەكتەگى ساعىنىشتى الىپ-ۇشىپ، شوق جۇلدىزداي اعىپ وتەدى. انە، سوناۋ تۇنگى اسپاندا جۇلدىزدى ءىزى جاتىر. جاپ-جارىق.