وتكەن جىلعى ارىستاعى جارىلىس, بيىلعى كوروناۆيرۋس ىندەتىنە بايلانىستى ەنگىزىلگەن توتەنشە جاعداي, ماقتاارال اۋدانىنداعى سۋ باسۋ ماسەلەسى, جاڭبىردىڭ شامادان تىس قاتتى جاۋعانى سالدارىنان بىرنەشە اۋداندا سەل ءجۇرۋى, تۇركىستان قالاسىنداعى قوناقۇيدىڭ ورتەنۋى, وسى جاعدايلاردىڭ بارىندە وبلىس پوليتسەيلەرى حالىقتىڭ قورعانى ەكەندىگىن كورسەتە الدى. سوڭعى ەكى جىلدا ەل پرەزيدەنتى قاسىم-جومارت توقاەۆتىڭ جارلىعىمەن تۇركىستان وبلىسىندا 1 پوليتسەيدىڭ «ايبىن» وردەنىمەن جانە 8 پوليتسيا قىزمەتكەرىنىڭ «ەرلىگى ءۇشىن» مەدالىمەن ماراپاتتالۋى سوزىمىزگە دالەل, قيىن شاقتا حالىق جانىنان تابىلعان جەكە قۇرامنىڭ جەتىستىگى دەسەك قاتەلەسپەسپىز. وبلىس پوليتسەيلەرىنىڭ تابيعي جانە تەحنوگەندىك اپاتتاردان بولەك, ەرلىك تۇرعىسىنداعى ماقتاۋعا تۇرارلىق ءىس-ارەكەتتەرى دە كوپ. مىسالى, قازىعۇرتتىق پوليتسەيدىڭ ءبۇتىن ءبىر وتباسىنىڭ اسىراۋشىسىن سۋيتسيد جاساماقشى بولعان جەرىنەن امان الىپ قالۋى, كوپىردەن سەكىرمەكشى بولعان كەلىنشەكتىڭ قۇتقارىلۋىنا قاتىستى وقيعانى ايتۋعا بولادى. تۇركىستان وبلىسى پوليتسيا دەپارتامەنتىنىڭ باستىعى, پوليتسيا گەنارال-مايورى قايرات دالبەكوۆ كەز كەلگەن كومەككە مۇقتاج ادامعا قىزمەتكەرلەرى ءوز جانىن تاۋەكەل ەتە وتىرىپ, كومەك قولىن سوزاتىنىنا سەنىمدى ەكەنىن ايتادى. «مەنىڭ تالاپ ەتەتىنىم دە وسى, پوليتسەي – حالىقتىڭ قورعاۋشىسى, جاردەمشىسى, قامقورشىسى بولا ءبىلۋى كەرەك. بيىل وبلىستا جىل باسىنان بەرگى بەس ايدا جالپى تىركەلگەن قىلمىستىڭ سانى بىلتىرعى ءدال وسى كەزەڭمەن سالىستىرعاندا 25,8 پايىزعا تومەندەدى. تارقاتىپ ايتسام, قوعامدىق ورىنداردا جاسالعان قىلمىستار, كوشەدە جاسالعان زاڭسىزدىقتار, بۇرىن سوتتى بولعاندارمەن جاسالعان قۇقىق بۇزۋشىلىقتار 40 پايىزعا دەيىن ازايدى. ال توناۋ 50 پايىزعا تومەندەسە, بۇزاقىلىق 42,2 پايىزعا كەمىدى. سونىمەن قاتار قىلمىستىق ىستەردىڭ اشىلۋى ارتتى. مۇنىڭ بارلىعى پوليتسيا دەپارتامەنتى جەرگىلىكتى پوليتسيا قىزمەتى باسقارماسىنىڭ قۇرىلىمدارىمەن قوعامدىق قاۋىپسىزدىكتى قامتاماسىز ەتۋ جانە قۇقىقتىق ءتارتىپتى نىعايتۋ باعىتىندا ۇيىمداستىرىلعان الدىن الۋ ءىس-شارالارىنىڭ ناتيجەلەرى», دەيدى گەنەرال-مايور.
جاسوسپىرىمدەر اراسىنداعى قىلمىس تا ەداۋىر ازايعان. ناقتىراق ايتساق, بەس ايدىڭ قورىتىندىسى بويىنشا وڭىردە كامەلەتكە تولماعاندار اراسىنداعى قىلمىس 11,9 پايىزعا, ياعني 84-تەن 74-كە تومەندەپ وتىر. بۇل ورايدا پوليتسيا دەپارتامەنتىنىڭ بىرنەشە وقۋ ورىندارىمەن مەموراندۋم جاساۋى سەپتىگىن تيگىزىپ وتىرعانىن ايتا كەتەلىك. وقۋشىلارمەن, ستۋدەنتتەرمەن ارنايى كەزدەسۋلەر وتكىزىلگەن. بارلىق قالالىق, اۋداندىق پوليتسيا باسقارمالارى مەن بولىمدەرىندە ستۋدەنتتەر اراسىندا كاسىبي باعدار بەرۋ جۇمىستارى ۇيلەستىرىلدى. «اشىق ەسىك» كۇندەرى وتكىزىلدى. جاستاردى ىشكى ىستەر سالاسىنا جۇمىسقا شاقىرا وتىرىپ, ول ءۇشىن قاجەتتى شارالار تۇسىندىرىلگەن. «وسىنداي كەزدەسۋلەردەن كەيىن جاستار اراسىندا ناقتى شەشىم قابىلداعان 52-ءسى قاڭتار-اقپان ايلارىندا جاريالانعان بوس لاۋازىمدار كونكۋرسىنا قاتىستى. ۇمىتكەرلەردىڭ 41-ءى بارلىق سىناقتان سۇرىنبەي كونكۋرستىق ىرىكتەۋدەن ءوتتى. سونىڭ 30-ى بوس لاۋازىمدارعا تاعايىندالدى. ال 11 ۇمىتكەر بۇگىندە دەپارتامەنتتىڭ كادرلىق رەزەرۆىندە تۇر. بۇدان بولەك, پوليتسيا دەپارتامەنتىنىڭ جولداماسىمەن ىشكى ىستەر مينيسترلىگىنىڭ الماتى قالاسىنداعى وقۋ ورتالىعىنا باستاپقى دايارلىق كۋرستارىنا – 4, اقتوبە وقۋ ورتالىعىنا – 9, قاراعاندى اكادەمياسىنا 9 تاعىلىمدانۋشى جىبەرىلدى», دەيدى قايرات دالبەكوۆ.
وڭىردە مال ۇرلىعى وزەكتى ماسەلە بولىپ تۇر. قولعا ءتۇسىپ, ءتيىستى جازاسىن الىپ جاتقان ۇرىلار دا از ەمەس. مىسالى, تۇركىستان جانە كەنتاۋ قالالارىنىڭ اۋماعىندا قۇنى 70 ميلليون تەڭگەدەن استام تۇراتىن 150-دەن كوپ جىلقى مەن سيىر ۇرلاۋعا قاتىسى بار, سول سياقتى وبلىستىڭ ءۇش اۋدانىندا جايىلىمنان جىلقى ايداپ اكەتۋ ۇرلىعىمەن اينالىسقان قىلمىستىق توپ انىقتالدى. كۇدىكتىلەردىڭ 14 مال ۇرلىعى وقيعاسىنا قاتىسى بارى بەلگىلى بولدى. جابىرلەنۋشىلەرگە كەلتىرىلگەن شىعىننىڭ جالپى كولەمى – 300 ميلليون تەڭگەگە جۋىق. ال شاردارادا بىرنەشە جىل بويى زاڭسىز بالىق اۋلاۋمەن اينالىسىپ كەلگەن ۇيىمداسقان قىلمىستىق توپ ۇستالدى. گەنەرال-مايور قايرات دالبەكوۆ بۇدان بولەك, پاتەر ۇرلىعى, بۇزاقىلىق, اۋىر جانە اسا اۋىر قىلمىستاردى اشۋ جۇمىستارىندا دا ايتارلىقتاي ناتيجە بارىن ايتادى. پوليتسەيلەر جىل باسىنان بەرى 52 قىلمىسكەردى ۇستاعان. ولاردىڭ 10-ى اۋىر جانە اسا اۋىر قىلمىستارى ءۇشىن ىزدەستىرىلۋدە جۇرگەندەر.
پوليتسەيلەردىڭ الەۋمەتتىك ماسەلەسى دە نازاردان تىس قالماعان. بۇگىنگە دەيىن 39 قىزمەتكەرگە وبلىس ورتالىعىنداعى وتىرار شاعىن اۋدانىنان پاتەر بەرىلگەن. تاياۋدا تاعى دا بىرنەشە قىزمەتكەر جاڭا پاتەرلەرگە قونىستاناتىن بولادى. ال كەلەسى جىلى پوليتسيا دەپارتامەنتىنىڭ جەدەل باسقارۋ ورتالىعى عيماراتىنىڭ قۇرىلىسى باستالماق.
تۇركىستان وبلىسى
