سەرتىنە سەنىمدى سەرىكتەستىك

الەمدى جايلاعان قارجىلىق داعدارىسقا جانە باسقا دا سەبەپتەرگە بايلانىستى ەلدەگى ۇلەستىك قۇرىلىستا ۇلكەن پروبلەمالاردىڭ ورىن العانى بەلگىلى. بىرقاتار قۇرىلىس سالۋشى كومپانيالار قارجى تاپشىلىعىنان باستاعان نىساندارىنداعى جۇمىستاردى اياقتاۋعا دارمەنسىزدىك تانىتسا, ەندى بىرەۋلەرى ۇلەسكەرلەردىڭ اقشالارىن جيناپ الىپ, وزدەرى قاشىپ كەتتى. مەملەكەتتىڭ ارالاسۋىنىڭ ارقاسىندا عانا وسى ءبىر شيەلەنىستى ءىس سوڭعى ۋاقىتتارى بىرتىندەپ شەشىمىن تابا باستادى. وسىنداي قيىن جاعدايعا دۋشار بولعاندار­دىڭ قاتارىندا  “اليانسستروينۆەست”   جاۋاپ­كەر­شىلىگى شەكتەۋلى سەرىكتەستىگى دە بار بولاتىن. اتاپ ايتقاندا, “ينفينيتي”, “گراتسيا”, “لەسنايا پوليانا” سياقتى تۇرعىن ءۇي كەشەندەرىنىڭ تاعدىرى ءدال وسى قۇرىلىس كومپانياسىنىڭ قولىندا. ال اتالعان ۇيلەردىڭ ولارعا ءوز قارجىلارىن سالىپ, باسپاناعا يە بولامىز دەگەن تالاي-تالاي جازىقسىز جانداردىڭ ۇمىتتەرىن ۇكىلەگەن دۇنيەلەرى ەكەنى ايتپاسا دا تۇسىنىكتى. ولاي بولسا, “اليانسستروينۆەست” جشس-ءنىڭ قازىرگى احۋالى قانداي, ول اياقتاۋعا ءتيىس قۇرىلىستاردىڭ كەلەشەگى نە بولماق دەگەن ساۋالدىڭ كىم-كىمدى دە قىزىقتىرارى كۇمانسىز. تاياۋدا سەرىكتەستىك باسشىلىعى بۇقارالىق اقپارات قۇرالدارى وكىلدەرىمەن كەزدەسىپ, ءوز جاعدايلارىنا قاتىستى اقپاراتتارمەن ءبولىستى. “اليانسستروينۆەست” جشس-ءنىڭ قارجى ديرەك­تورى ا.نۇعىمانوۆتىڭ, جوسپارلاۋ-وندىرىستىك ءبولىمىنىڭ باستىعى ن.بوتەنوۆسكايانىڭ, كليەنتتەر-مەن جۇمىس جونىندەگى ءبولىم باستىعى ا.كاتسا­پەنكونىڭ قاتىسۋىمەن وتكەن كەزدەسۋدە تومەندەگى جايتتەر اڭگىمە ارقاۋىنا اينالدى. داعدارىستى كەزەڭ سانالاتىن 2007 جىلدىڭ قازان ايى مەن 2009 جىلدىڭ شىلدە ايى ارالى­عىندا وزدەرى دە ەلەۋلى قيىنشىلىقتارعا دۋشار بولعان سەرىكتەستىكتىڭ قارجىلىق ارىپتەستەرى بۇ­رىن كەلىسىلگەن نەسيەلىك جەلىلەر بويىنشا قارجى-لاندىرۋدى توقتاتىپ تاستاعان. وسىدان كەيىن كومپانيا تولىقتاي قايتا قۇرۋلارعا بارىپ, تيىمدىلىگى از جانە جۇمىسسىز تۇرعان بولىمشەلەردى تاراتۋ, ۆاكانسيالاردى جانە جۇمىسشى مامان­دىقتارىن قىسقارتۋ, قىزمەتكەرلەردىڭ ەڭبەك­اقىلارىن تومەندەتۋ ەسەبىنەن شىعىنداردى ازايتۋ ماسەلەسىن قاراستىرۋعا ءماجبۇر بولادى. نە­سيەلىك قارجىلار مەن ۇلەسكەرلەر جارنالا-رىنىڭ بولماۋى ۇلەستىك قاتىسۋداعى تۇرعىن ءۇي قۇرىلىسى نىساندارىنداعى جۇمىستىڭ توقتاۋىنا اكەلىپ سوقتىرادى. ءسويتىپ, كومپانيا باستالعان قۇرىلىس نىساندارىن اياقتاپ شىعۋعا قاجەتتى قارجى تاۋىپ بەرە الاتىنداي بالاما ينۆەستورلار ىزدەۋگە كىرىسەدى. وسىلايشا, 2008-2009 جىلدار قوسىمشا قارجىلاندىرۋ كوزدەرىن ىزدەۋگە, كەلىسسوزدەر جۇرگىزۋ مەن كەلىسىم-شارتتار بەكىتۋگە كەتەدى. اقىرى جۇرگىزىلگەن جۇمىستاردىڭ ناتيجەسىندە, 2008 جىلى “اتف بانك” اق-تان 3 ميلليارد تەڭگە, 2009 جىلى مەملەكەتتىك جىلجىمايتىن م ۇلىك قورىنان 1,7 ميلليارد تەڭگە قارجى تارتى­لىپ, وسى جىلدىڭ اياعىندا جالپى كولەمى 6,6 ميلليارد تەڭگەنى قۇرايتىن قارجىلاندىرۋ جەلىسى اشىلادى. سونىمەن بىرگە “اليانسستروينۆەست” جشس “لەسنايا پوليانا” تۇرعىن ءۇي كەشەنىنىڭ 4-10-كەزەكتەرىن الۋ ءۇشىن “سامۇرىق-قازىنا” جىلجىمايتىن م ۇلىك قورى” اق-قا قوسىمشا ءوتىنىش بەرەدى. ءسويتىپ, مەملەكەتتىڭ ۇلەسكەرلەردىڭ قاتىسۋىمەن سالىنىپ جاتقان قۇرىلىستارعا قولداۋ كورسەتۋى, “سامۇرىق-قازىنا” قورى مەن اتف بانكتىڭ شەشىم قابىلداۋى ارقاسىندا كومپانيا ۇلەسكەرلەردىڭ قاتىسۋىمەن سالىنىپ جاتقان كەشەندەردەگى قۇرىلىس جۇمىستارىنىڭ ءبارىن دە باستاۋعا مۇمكىندىك الدى. سالىنىپ جاتقان تۇرعىن ۇيلەردىڭ وزىندىك قۇنىن ارزانداتۋ ءۇشىن سەرىكتەستىك مەملەكەتتىڭ قولداۋىمەن تسەحتار مەن زاۋىتتاردى ىسكە قوستى. ونىڭ ءوزى يندۋستريالىق-يننوۆاتسيالىق دامۋ باعدارلاماسىنا قوسىلعان بەلگىلى ءبىر ۇلەس بولىپ تابىلادى. 2010 جانە 2011 جىلدارى “اليانسستروينۆەست” جشس شامامەن بەس مىڭداي ادامنىڭ تۇرعىن ءۇي پروبلەمالارىن شەشۋدى ويلاستىرىپ وتىر. قارجىنىڭ ماقساتتى جۇمسالۋىن قامتاماسىز ەتۋ تۇرعىسىندا دا سەرىكتەستىك قولعا العان باستامالار بار. ماسەلەن, گەرمانيالىق “KVL” تاۋەلسىز حالىقارالىق اۋديتورلىق فيرماسى تۇراقتى نەگىزدە تارتىلىپ وتىر. سول سياقتى جۇمىس بارىسى مەن كومپانيانىڭ ءىس-قيمىلدارىنا قوعامدىق باقىلاۋ ورناتۋ ءۇشىن ۇلەسكەرلەر بىرلەستىكتەرىنىڭ وكىلدەرى دە سەرىكتەستىكتىڭ جينالىستارى مەن تەحنيكالىق كەڭەس وتىرىستارىنا ۇنەمى شاقىرىلىپ تۇرادى. سەرىكتەستىك وكىلدەرىنىڭ ايتۋلارىنشا, “اليانسستروينۆەست” جشس-دەگى قازىرگى تاڭداعى جاعداي ەشقانداي الاڭداۋشىلىق تۋدىرمايدى. كومپانيا باستالعان قۇرىلىس نىساندارىن مەجەلەنگەن ۋاقىتىندا اياقتاپ قانا قويماي, سونىمەن بىرگە جاڭا تۇرعىن ءۇي كەشەندەرى قۇرىلىسىن جۇرگىزۋدى دە جوسپارلاپ وتىر. سەيفوللا شايىنعازى.