"تەست دەگەنىمىز, — ەكى ۇشى بار تاياق سەكىلدى دەگەن اق ءۇي باسشىسى وكلاحوماداعى ميتينگ كەزىندە سويلەگەن سوزىندە. — مۇنىڭ ءبىر جامان جاعى تەستىلەۋ نەعۇرلىم كەڭ كولەمدى جۇرگىزىلسە, ناۋقاستار قاتارى دا كوبەيە بەرەدى. سوندىقتان مەن ءوز ادامدارىمنان تەست جونىندە ازداپ تورموز بەرۋدى سۇرادىم", - دەدى ول.
تەلارنانىڭ پىكىرىنشە, ترامپ بۇل جەردە تىم اشىلىپ كەتىپ وتىر. ويتكەنى اقش-تا كوروناۆيرۋستان 120 مىڭعا جۋىق ادام قايتىس بولىپ وتىرعان تۇستا بۇلاي دەۋدىڭ ءجونى قالاي بولادى ەكەن؟! ال مەديتسينالىق ساراپشىلاردىڭ مالىمدەۋىنشە, ۆيرۋستى باقىلاۋدا ۇستاۋ مەن ونىڭ تارالۋىن شەكتەۋدە تەستىلەۋ شەشۋشى ماڭىزعا يە بولۋدا.
ترامپ اكىمشىلىگىنىڭ وكىلى تەلەارنانى بۇل پرەزيدەنتتىڭ كەزەكتى قالجىڭى ەكەنىنە سەندىرىپ باققان. بىراق تەلەارنانىڭ دەرەگى بويىنشا ترامتىڭ باستى ساياسي باسەكەلەسى دجو بايدەننىڭ سايلاۋالدى شتابى پرەزيدەنتتىڭ وسى سوزىنەن ۇپاي تۇگەندەۋ ماسەلەسىنە كىرىسىپ كەتكەنگە ۇقسايدى. ولار پرەزيدەنتتىن ءدال وسى ءسوزىن ءوز جارنامالارىنىڭ اراسىنا كوبىرەك قىستىرۋدا.
پرەزيدەنت ميتينگىدەگى سوزىندە ساياسي باسەكەلەسى د.بايدەندى دە ۇمىتپاعان. قازىرگى شۋعا اينالىپ تۇرعان جۇيەلى راسيزم ماسەلەسىنە كوپ تەرەڭدەپ بارماي, تەك قارسىلاسىن ءبىر مۇقاتىپ قالۋ ماعىناسىندا: "دجو بايدەن قوعامدىق ومىردەن كەتكەن كەزدە عانا ناسىلدىك ادىلەتتىك باستالادى. ەندى بەس ايدان كەيىن ءبىز ۇيقىلى-وياۋ دجو بايدەندى جەڭەتىن بولامىز" دەگەن.
