سونىمەن قاتار وبلىستىڭ باس مەملەكەتتىك سانيتارلىق دارىگەرى تىكەلەي ەفيردە وڭىردەگى تۋريستىك ايماقتارعا كىرۋگە تىيىم سالىناتىنىن ايتتى. ال ول جاقتاعى ادامدار الەۋمەتتىك قاشىقتىقتى ساقتاپ, ماسكا كيىپ ءجۇرۋى ءتيىس ەكەنىن ەسكەرتتى قانات اسقاروۆ.
سونداي-اق قانات اسقاروۆ 14 جاسقا دەيىنگى بالالارعا ەرەسەكتەرسىز ۇيدەن شىعۋعا تىيىم سالىناتىنىن, 65 جاستان اسقان ادامدارعا اسا قاجەتسىز كوشەگە شىعۋعا بولمايتىنىن حاباردار ەتتى.
"بارلىقتارىڭىزدى وسى نۇسقامالاردى بۇلجىتپاي ورىنداۋعا شاقىرامىن. جاندارىڭىزدا بالالار, جۇكتى ايەلدەر, قاريالار جانە سوزىلمالى سىرقاتپەن اۋىراتىن ادامدار بار ەكەنىن ەستە ۇستاڭىزدار. ولار COVID-19 ىندەتى بويىنشا تاۋەكەل توبىنا كىرەدى. ءوزىڭىزدىڭ دەنساۋلىعىڭىز بەن جاقىندارىڭىزدىڭ ءومىرى ءسىزدىڭ قولىڭىزدا", – دەدى قانات اسقاروۆ.
سونداي-اق, قاراعاندى قالاسىنىڭ اكىمى نۇرلان اۋباكىروۆ تە تىكەلەي ەفيرگە شىعىپ, ىندەتكە قارسى شارالاردى ساقتاۋدىڭ ماڭىزدىلىعىنا توقتالدى. ول قازىرگى تاڭدا وبلىس ورتالىعىنداعى مەديتسينالىق مەكەمەلەردىڭ ءوز مۇمكىندىكتەرىنىڭ شەگىندە جۇمىس ىستەپ جاتقانىن اتاپ ءوتتى.
"ەپيدەميا باستالعان كەزدە وعان سەنەتىندەردىڭ سانى از بولسا, قازىرگى جاعدايدا ىندەتتىڭ بار ەكەنىنە ەشقانداي كۇمان بولماۋى كەرەك. كوبىمىزدىڭ تۋىستارىمىز بەن جاقىندارىمىز كوروناۆيرۋس ينفەكتسياسىن جۇقتىردى. سىزدەردەن بەتپەردە, قولعاپ كيىپ ءجۇرۋدى, انتيسەپتيكتەردى پايدالانىپ, ادامدار كوپ جينالاتىن جەرلەردەن اۋلاق بولۋلارىڭىزدى ءوتىنىپ سۇرايمىن. جاقىن ارادا قالىپتى ومىرگە قايتا ورالۋىمىز سانيتارلىق نورمالاردى قانشالىقتى قاتاڭ ۇستانۋىمىزعا بايلانىستى بولماق", – دەدى كەنشىلەر استاناسىنىڭ اكىمى.
ەسكە سالار بولساق, كارانتيندىك شەكتەۋلەردى الىپ تاستاۋ كوروناۆيرۋس ينفەكتسياسىنىڭ كۇندەلىكتى ءوسىمى اپتا بويى 7 پايىزدان اسپاعاندا عانا مۇمكىن بولادى.
