بەكەتاەۆ اۋتسورسينگ ارقىلى قىلمىستىق ىستەر بويىنشا ىشكى ىستەر ورگاندارى تاعايىنداعان سوت ساراپتامالارىنىڭ كەيبىر تۇرلەرىن باسەكەلەستىك ورتاعا بەرۋ تۋرالى ادىلەت مينيسترلىگىنىڭ, ىشكى ىستەر مينيسترلىگىنىڭ جانە باس پروكۋراتۋرانىڭ بىرلەسكەن بۇيرىعىنا قول قويىلعانىن ايتتى.
سونىمەن, اتالعان بۇيرىق بويىنشا, الماتى, شىمكەنت قالالارىندا جانە پاۆلودار وبلىسىندا پيلوتتىق جۇمىس ىسكە قوسىلدى, سونداي-اق اعىمداعى جىلدىڭ ماۋسىم ايىنىڭ سوڭىنا دەيىن نۇر-سۇلتان قالاسىندا ىسكە قوسىلادى.
اۋتسورسينگ ارقىلى ساراپتامانىڭ كەلەسى تۇرلەرى بەرىلەدى: سوت-ساراپتامالىق اۆتوتاۋارتانۋ زەرتتەۋى, سوت قۇرىلىس ساراپتاماسى, سوت تراسولوگيالىق ساراپتاماسى, پسيحولوگيالىق جانە سوت-مەديتسينالىق ساراپتاماسى, سوت پسيحولوگيالىق-فيلولوگيالىق ساراپتاماسى, جول-كولىك وقيعاسى جاعدايلارى مەن كولىك قۇرالدارىنىڭ سوت ساراپتاماسى, كومپيۋتەرلىك تەحنولوگيا قۇرالدارىن سوت-ساراپتامالىق زەرتتەۋ جانە ءتىرى ادامدارعا سوت-مەديتسينالىق ساراپتاما جۇرگىزۋ.
قازىرگى ۋاقىتتا شىمكەنت جانە پاۆلودار وبلىسىندا پيلوتتىق جۇمىس اياسىندا جەكە سوت ساراپشىلارىمەن قىلمىستىق ىستەر بويىنشا 164 ءتۇرلى سوت-ساراپتامالىق زەرتتەۋلەر جۇرگىزىلگەنىن ايتقان ءجون (وسى جىلدىڭ مامىر جانە 17 ماۋسىمعا دەيىنگى ارالىقتاعى مالىمەتتەرگە سايكەس).
جالپى, اتالعان جوبا كەلەسى جاعدايلارعا ىقپال ەتەتىنى كۇتىلۋدە:
- ساراپتاما تاعايىنداۋ ۋاقىتىن قىسقارتۋ, اسىرەسە قاماۋدا وتىرعان ادامداردىڭ قىلمىستىق ىستەرى بويىنشا;
- مەملەكەتتىك ساراپشىلاردىڭ جۇكتەمەسىن ازايتۋ;
- جەكە سوت ساراپتاماسى ينستيتۋتىن دامىتۋ;
- مەملەكەتتىك بيۋدجەت شىعىندارىن قىسقارتۋ.
ەسكە تۇسىرسەك, 2018 جىلدىڭ قاراشا ايىنان باستاپ ادىلەت مينيسترلىگى جوعارعى سوتپەن بىرلەسىپ, سوتتاردىڭ نۇر-سۇلتان جانە الماتى قالالارى بويىنشا سوت-ساراپتاما ينستيتۋتتارىنا جەكە سوت ساراپشىلارىنا العاشقى سوت قۇرىلىس ساراپتاماسى, سوت تاۋارتانۋ ساراپتاماسى جانە سوت ەكونوميكالىق ساراپتاماسى بويىنشا ساراپتامالار تاعايىنداۋ پيلوتتىق جوباسى جۇزەگە اسىرىلدى. تاجىريبە ءوزىنىڭ وڭ ناتيجەسىن بەردى.
ماسەلەن, 2019 جىلى سوتتاردىڭ ۇيعارىمى بويىنشا جەكە سوت ساراپشىلارى ازاماتتىق ىستەر بويىنشا 706 سوت ساراپتامالارىن وتكىزدى, بۇل مەملەكەتتىك بيۋدجەتتىڭ شىعىندارىن 42 ميلليون تەڭگەدەن استام ازايتۋعا مۇمكىندىك بەردى.
