مەديتسينا • 19 ماۋسىم، 2020

1406 بايلانىس ورتالىعىنا حابارلاسۋشىلار سانى 2 ەسە ارتتى

97 رەت كورسەتىلدى

1406 بايلانىس ورتالىعىنا كۆي-عا تەست تاپسىرۋ ماسەلەسى بويىنشا حابارلاسۋشىلار سانى 2 ەسە ارتتى. بايلانىس ورتالىعىنا تۇسەتىن قوڭىراۋلاردىڭ كوپشىلىگى كوروناۆيرۋس بويىنشا اۋرۋحاناعا ورنالاستىرۋ ماسەلەلەرىنە قاتىستى. بۇل تۋرالى "الەۋمەتتىك مەديتسينالىق ساقتاندىرۋ قورى" كەاق-نىڭ نۇر-سۇلتان قالاسى بويىنشا ءباسپاسوز قىزمەتى حابارلايدى، دەپ جازادى Egemen.kz

ايىم ءداۋىت

تۇرعىندار پتر-تەست تاپسىرۋ، كوروناۆيرۋس جانە سىرقاتتىڭ سيمپتومسىز اعىمىنىڭ بەلگىلەرى تۋرالى سۇرايدى. مەديتسينا ۇيىمدارىنىڭ جۇمىسىن، اۋرۋحاناعا جوسپارلى جاتقىزۋ جاعىن ءتۇسىندىرۋدى وتىنەدى.

ء"بىزدىڭ ايماقتىق فيليالدارىمىز جەرگىلىكتى دەنساۋلىق ساقتاۋ باسقارمالارىمەن تىعىز بايلانىستا، ەلىمىزدىڭ ءاربىر تۇرعىنىنا بارىنشا كومەكتەسۋگە تىرىسادى. پتر-تالداۋ تاپسىرۋعا قاتىستى سۇراقتار ءتۇسىپ جاتقاندىقتان، ايتا كەتكىم كەلەدى: باس سانيتارلىق دارىگەردىڭ قاۋلىسىنا سايكەس، 10 سانات بويىنشا COVID-19-عا تەستىلەۋ اقىسىن قور تولەيدى"، دەپ اتاپ ءوتتى الەۋمەتتىك مەديتسينالىق ساقتاندىرۋ قورىنىڭ باسقارما توراعاسىنىڭ ورىنباسارى مارات شورانوۆ.

ناقتى ايتقاندا، قور قاراجاتى ەسەبىنەن كوروناۆيرۋسقا اقىسىز پتر-تالداۋدان وتۋگە قۇقىلى ازاماتتار:

تەگىن كەپىلدەندىرىلگەن مەديتسينالىق كومەك كولەمىندە:

ينفەكتسيالىق ستاتسيونارلارعا جاتقىزىلعان پاتسيەنتتەر;
COVID-19 بولۋى مۇمكىن دەگەن كۇدىكپەن پروۆيزورلىق ستاتسيونارلارعا جاتقىزىلعان پاتسيەنتتەر;
COVID-19 بولۋى مۇمكىن، جرۆي جانە پنەۆمونيا بەلگىلەرى بار، ستاتسيونارلىق دەڭگەيدەگى پاتسيەنتتەر;
ۇيدە وقشاۋلاۋعا جاعداي بولماعاندا كارانتيندىك يزولياتورعا سيمپتومسىز COVID-19-پەن جاتقىزىلعان ازاماتتار (پتر-تەكسەرۋ، بۇل ساناتتاعىلار ءۇشىن، سول جاتقان ستاتسيونارلاردا جۇرگىزىلەدى);
COVID-19 بولۋى مۇمكىن، جرۆي جانە پنەۆمونيا بەلگىلەرى بار، امبۋلاتورلىق دەڭگەيدەگى پاتسيەنتتەر;
سيمپتومسىز COVID-19-پەن بمسك دارىگەر باقىلاۋىنداعى ازاماتتار(پتر-تەكسەرۋ، بۇل ساناتتاعىلار ءۇشىن، تىركەلگەن ورنى بويىنشا ەمحانالاردا تاعايىندالادى);

مىندەتتى الەۋمەتتىك مەديتسينالىق ساقتاندىرۋ اياسىندا:

اۋرۋحاناعا جوسپارلى تۇردە جاتقىزىلعان پاتسيەنتتەر، ونىڭ ىشىندە 37 اپتا مەرزىمىندە بوساندىرۋعا رۇقسات بەرىلگەن جۇكتى ايەلدەر (پتر-تەكسەرۋ تىركەلگەن ورنى بويىنشا ەمحانالاردا تاعايىندالادى);
اۋرۋحاناعا شۇعىل تۇردە جاتقىزىلعان پاتسيەنتتەر، ونىڭ ىشىندە جۇكتى ايەلدەر مەن بالا بوسانعان انالار (پتر-تەكسەرۋ ستاتسيوناردا جۇرگىزىلەدى);
گەمودياليزدە جاتقان پاتسيەنتتەر (پتر-تەكسەرۋ تىركەلگەن ورنى بويىنشا ەمحانالاردا تاعايىندالادى);
جاڭا تۋىلعان نارەستەلەر، كلينيكالىق حاتتاماعا سايكەس (پتر-تەكسەرۋ ستاتسيوناردا جۇرگىزىلەدى).

زەرتتەۋ جۇمىستارىن ۇيىمداستىرۋمەن جانە باسقا دا قوسالقى ماسەلەلەرمەن ايماقتىق دەنساۋلىق ساقتاۋ باسقارمالارى اينالىسادى.

"قازىرگى ۋاقىتتا بىرقاتار ايماقتاعى مەديتسينا ۇيىمدارىنىڭ ينفراقۇرىلىمدارى قالىپتاسقان جۇكتەمەلەردى كوتەرە الماۋدا. وسىعان بايلانىستى تەست تاپسىرعىسى كەلەتىندەردىڭ كەزەگى بايقالادى. بۇل دا تەست ناتيجەسىنىڭ جىلدام ۇسىنىلۋىنا اسەر ەتەدى. قور تاراپىنان ءبىز مەديتسينالىق ۇيىمداردىڭ قىزمەت اقىسىن ۋاقىتىلى تولەۋ جونىندەگى مىندەتتەمەلەرىمىزدى ورىنداۋعا دايىنبىز، دەدى مارات شورانوۆ.

ەگەر قۇقىلى ازاماتتارعا تەگىن تالداۋ جاساۋدان باس تارتقان جاعدايدا، الەۋمەتتىك مەديتسينالىق ساقتاندىرۋ قورىنىڭ 1406 بايلانىس ورتالىعىنا نەمەسە Qoldau-24/7 ءموبيلدى قوسىمشاسى ارقىلى حابارلاسۋعا بولادى. بۇل كەزدە ءوتىنىم ونلاين تارتىپتە بىردەن مەديتسينا ۇيىمىنىنىڭ باس دارىگەرىنە تۇسەدى.

ەستەرىڭىزگە سالامىز، الەۋمەتتىك مەديتسينالىق ساقتاندىرۋ قورى حالىقتى دەنساۋلىق ساقتاۋ ماسەلەلەرى، ءمامس جۇيەسى جايىندا اقپاراتتاندىرۋ بويىنشا تاۋلىك بويى جۇمىس ىستەيتىن بايلانىس ورتالىعىن ۇيىمداستىردى. ال توتەنشە جاعداي كەزىندە كوروناۆيرۋس بويىنشا جەدەل جەلى رەتىندە جاريالاندى. جەلىگە مەديتسينالىق قىزمەت كورسەتۋ ساپاسىن مونيتورينگتەۋ ءبولىمىنىڭ ماماندارى تارتىلعان، ولار ءار ايماقتاعى مەديتسينا ۇيىمدارىمەن بىرلەسە وتىرىپ، جۇمىس ىستەيدى.