2014 جىلى 4 ماۋسىمدا جۇمىسىن باستاعان قور بيىل 6 جىلدىعىن تويلادى. قوعامدىق قور باسشىسى ايسۇلۋ ەرنيازوۆا يگى ىسپەن اينالىسامىن دەگەن كەز كەلگەن 14 جاستان اسقان ازاماتتىڭ ليگاعا مۇشە بولا الاتىنىن ايتادى. ء«بىزدىڭ قاتارىمىزدا مەكتەپ وقۋشىلارى, ستۋدەنتتەر, ءتىپتى «كۇمىس ۆولونتەرلەر», ياعني 50 جاستان اسقان زەينەت جاسىنداعى ادامدار بار. كاسىبىنە, بىلىمىنە قاراماستان كەز كەلگەن ادام ەرىكتىلەر قاتارىنا قوسىلا الادى. ءبىز ءۇشىن ولاردىڭ قوعامعا پايدالى بولسام دەگەن نيەتى ماڭىزدى», دەيدى قور جەتەكشىسى.
ەلدە كارانتين جاريالانعاننان كەيىن «ۆولونتەرلەر ليگاسى» بارلىق ايماقتا بولىمشەلەرىن اشىپ, جۇمىسقا كىرىستى. ولار تەك كومەكپەن شەكتەلىپ قويماي, جاستار ۇيدە ۋاقىتىن پايدالى وتكىزسىن دەگەن ماقساتتا ءتۇرلى باعىتتار بويىنشا رەسپۋبليكالىق ونلاين كۋرستاردى اشتى. «ەرىكتىلەر اعىلشىن, قازاق, قىتاي, تۇرىك تىلدەرىن, حيميا, بيولوگيا, ماتەماتيكا جانە باسقا دا پاندەردى اقىسىز وقىتتى. الماتى قالاسىندا ۆولونتەرلەر الماتى اكىمدىگى جانىنداعى ەرىكتىلەردىڭ جەدەل شتابىمەن بىرلەسىپ, كوروناۆيرۋس ينفەكتسياسىنىڭ تارالۋىن توقتاتۋ ءۇشىن الەۋمەتتىك قامسىزداندىرۋ بولىمىنە جانە قالانىڭ اۋدان اكىمدىكتەرىنە كومەكتەستى.
ۆولونتەرلەر قاۋىپسىزدىك شارالارىن ساقتاۋ ءۇشىن جەكە قورعانىس زاتتارىمەن قامتاماسىز ەتىلدى. ولارعا ارنايى كيىم, ماسكا, قولعاپتار, اياقكيىم مەن انتيسەپتيكتەر ۋاقىتى ۇلەستىرىلىپ وتىردى. سونىمەن قاتار ارنايى كولىك ءبولىنىپ, مەزگىلىمەن تاماق ءىشىپ تۇردى», دەيدى ا.ەرنيازوۆا.
بۇگىنگە دەيىن الماتىلىق ۆولونتەرلەر 10 000-نان استام مۇقتاج جانە الەۋمەتتىك جاعىنان از قامتىلعان ازاماتقا كومەك كورسەتكەن, 12 000-نان استام ازىق-ت ۇلىك پاكەتىن جيناعان. قۇزىرلى ورگاندار ۇسىنعان تىزىمگە سايكەس, مۇگەدەكتەر ساناتىنداعى تۇرعىندارعا, قارتتارعا تاماق, ءدارى-دارمەكتەردى جەتكىزىپ وتىرعان.
«الەمدەگى جاعداي ۆولونتەرلىكتىڭ ماڭىزىن ءتۇسىندىرىپ, ال ەرىكتىلەرگە وزدەرىن جاڭا قىرىنان تانىتۋعا مۇمكىندىك بەرگەندەي. ويتكەنى ءبىزدىڭ جاستار كوروناۆيرۋس ينفەكتسياسى وشاقتارىندا جۇمىس ىستەپ, ماماندارعا كومەك كورسەتتى. كوروناۆيرۋستىڭ ەمى دە, سالدارى دا بەلگىسىز. وسىنداي قيىن-قىستاۋ كەزەڭدە وزدەرىنىڭ پايدالى بولسام دەگەن ىزگى نيەتتەرىنەن تايماي, ءبىراز جاس بەل سىبانىپ ەڭبەككە ارالاستى. مەديتسينا قىزمەتكەرلەرىمەن, قۇقىق قورعاۋ ورگاندارىمەن بىرلەسىپ جۇمىس ىستەدى. بۇل – ۇلكەن تاجىريبە. جاستار وزدەرىنىڭ بويىنداعى بۇرىن-سوڭدى بىلمەگەن, اشىلماعان قىرلارىن تابا ءبىلدى. ويتكەنى كوروناۆيرۋسپەن كۇرەس كەشەندى جۇمىستى تالاپ ەتەدى. سول كەشەندى جۇمىسقا بەلسەندى تۇردە اتسالىسۋى جاستارىمىزعا قانات ءبىتىرىپ, ولاردىڭ ىنتا-جىگەرىن ەسەلەي ءتۇستى. كارانتين كەزىندە 5 قايىرىمدىلىق اكتسياسى وتكىزىلدى», دەيدى ايسۇلۋ.
ۇيىم باسشىسى ايتىپ وتكەندەي, ۆولونتەرلەر قۇقىق قورعاۋ ورگاندارىنا دا قولعابىس ەتكەن. قوعامدىق مونيتورينگ نەگىزىندە قۇقىق بۇزۋشىلىقتار انىقتالىپ, ءتيىستى ورگاندار قاجەتتى شارالار قابىلداپ وتىرعان. ۆولونتەرلەر كوبىنە توتەنشە جاعداي كەزىندە جۇمىس ىستەۋىنە شەكتەۋ قويىلعان ساۋدا ورتالىقتارىنىڭ جانە باسقا دا قىزمەت كورسەتۋ نىساندارىنىڭ ءتارتىپ بۇزعانىن ايتتى.
وعان قوسا 700-دەن استام تۇرعىنعا سەنىم تەلەفوندارى ارقىلى كومەك كورسەتىلگەن. ازاماتتار ءتۇرلى ارىز-شاعىم, وتىنىشتەرمەن حابارلاسقان. ولاردىڭ ىشىندە ۇيگە شاقىرتۋ بويىنشا دا وتىنىشتەر كەلىپ تۇسكەن.
كوپتەگەن ايماقتا «ۆولونتەرلەر ليگاسى» Nur Otan پارتياسىمەن, Jas Otan جاستار قاناتىمەن جانە ءتۇرلى وبلىستىق ۇيىمدارمەن بىرگە جۇمىس ىستەدى. ۆولونتەرلەردىڭ تۇرعىندارعا ءتۇسىندىرۋ جۇمىستارىنا دا اتسالىسقانى بار.
«شىمكەنت قالاسىنداعى ورتالىق ساياباقتا جانە ارباتتا ۆولونتەرلەر كوروناۆيرۋس ينفەكتسياسىنان ساقتانۋ شارالارى, جولدارى تۋرالى ءتۇسىندىرۋ جۇمىستارىن جۇرگىزدى. 1000-عا جۋىق مەديتسينالىق بەتپەردە مەن اقپاراتتىق پاراقشالار تاراتتى. وسكەمەن, الماتى جانە پاۆلودار قالالارىندا ەرىكتىلەر وزدەرى بىرنەشە رەت پايدالانۋعا بولاتىن ماسكالار تىگىپ, مۇقتاج جاندارعا ۇلەستىردى. قىزىلوردا قالاسىنداعى ۆولونتەرلەر شەتەلدەردەن كەلگەن ادامدارمەن كەزدەسىپ, ساۋالدامالار جۇرگىزدى», دەيدى ا.ەرنيازوۆا.
جالپى, الەۋمەتتىك باعدارلامالاردى ازىرلەۋ جانە ادامدارعا كومەكتەسۋ ماقساتىندا «ۆولونتەرلەر ليگاسى» الەۋمەتتىك جانە مادەني ماڭىزى بار ءارتۇرلى قالالىق, رەسپۋبليكالىق جانە حالىقارالىق شارالارعا قاتىسادى.
وسى 6 جىلدا ۇيىم ۆولونتەرلەرى كوپتەگەن ۇلكەن شارانىڭ وتكىزىلۋىنە جاردەم ەتتى. ولاردىڭ قاتارىندا 2017 جىلى الماتىدا وتكەن XXVIII دۇنيەجۇزىلىك قىسقى ۋنيۆەرسيادا, ەكسپو-2017 حالىقارالىق كورمەسى, «الماتىنىڭ 1000 جىلدىعىنا 1000 يگى ءىس», ء«وز قالاڭىزدىڭ قاھارمانى بولىڭىز» اكتسياسى, Star of Asia, ەۋرازيالىق مەديافورۋم, الماتى كينوفەستيۆالى, قازاقستان-رەسەي جاستار فورۋمى, ىلە-بالقاش فەستيۆالى, Jastar Alańy جاستار ءسامميتى جانە باسقالارى بار. بۇل شارالاردىڭ بارلىعى بىلىكتىلىگىمىزدى ارتتىرىپ, ۆولونتەرلىك مادەنيەتىن تۇسىنۋگە مۇمكىندىك بەردى. 2019 جىلى «قازاقستاننىڭ ۆولونتەرلەر ليگاسى» قوعامدىق قورى Ashyq Júrek قايىرىمدىلىق جوباسىن ۇيىمداستىردى. «بۇل باستاما تۋرالى ءبىز ەلباسى نۇرسۇلتان نازارباەۆتىڭ الدىندا جاستار جىلىنىڭ اشىلۋىندا ايتقان بولاتىنبىز. جوبا اياسىندا 8 باعىت بويىنشا جۇمىس جۇرگىزىلدى. ءار باعىتتىڭ وزىندىك ميسسياسى بار. اتالعان جوبا اياسىندا كوپبالالى جانە از قامتىلعان وتباسىلارعا كومەك بەرۋ, ستۋدەنتتەرگە ءتۇرلى تاعىلىمدامالار ۇيىمداستىرۋ, مەديتسينالىق ەرىكتىلىك پەن سالاماتتى ءومىر سالتىن دارىپتەۋ, ەرەكشە قاجەتتىلىكتەرى بار ادامداردى الەۋمەتتەندىرۋگە اتسالىسۋ, جانۋارلارعا قامقورلىق كورسەتۋ, ارداگەرلەرگە كومەك كورسەتۋ جانە ەكوتۋريزم قاراستىرىلعان. «ۆولونتەرلەر ليگاسى» قاتارىمىزعا قوسىلامىن دەگەن ازاماتتارعا ءاردايىم اشىق. بيىلعىداي ۆولونتەر جىلىندا جاستار اراسىندا ەرىكتىلىك پەن قايىرىمدىلىقتىڭ ماڭىزىن تۇسىندىرۋگە تىرىسۋىمىز كەرەك. ال پاندەميا – ءبىر جاعادان باس شىعارساق ءبىز اسپايتىن اسۋ جوعىن كورسەتتى», دەپ تۇيىندەدى ءوز ءسوزىن ايسۇلۋ ەرنيازوۆا.
